Read Northwest Gbaya ƊUKA-TAAMƆ 6 Bible Online

ƊUKA-TAAMƆ 6 - Northwest Gbaya bible

ƊUKA-TAAMƆ 6

¹Ɓɛɛ, ɛ́nɛ́ o wannu, ɛnɛ yéŋ zer-‘nɛ́, ɛnɛ zií. Ɛ́nɛ́, o wi-gɔn-kita zu nu lɛŋ, ɛnɛ e ha̧ wi-iŋ-mɔ mɛ usi ɗoŋ mɔ h’ɛ́nɛ́.

²Ɛ́nɛ́, o wi nɛ ɔ wan zu o gíí bíí, ɓɛɛ n’ɛnɛ su nɛ tɛ-‘nɛ zu o dɔka dukbíí k’ɛ́nɛ́'ɛ, ɛnɛ hu̧i̧ zer-‘nɛ́.

³Nɛ́ Gasa Wan a ha̧ŋgai h’ɛ́nɛ́, nɛ́ Wan-mɛ-ŋgɔn mɛ a dee wan h’ɛ́nɛ́. Nɛ́ A̧‘a tɛ zɔk o mgbak tom k’ɛ́nɛ́, mbaɗi nɛ o ee-zu-mɔ k’ɛ́nɛ́ mbɛt,

⁴ka ɛ́nɛ́, o wi-de-tom wan kɔ̧-A̧, nɛ́ gɔna kita kɔ̧-A̧ nɛ yuwar-a na, k’ɛnɛ nɛ́ kasa heembea na, in k’ɛnɛ nɛ́ deemɔ n'A̧a̧ kɔ̧a̧ na.

⁵A̧ tɛ gɔm gbaŋa-nyaŋa nɛ nyimsea yor ti'nɛ́, wen kita ko o gasawi tɛ ŋgai nyɛmna.

⁶Wi nyɛma mɛ de ko ha̧ geɗɛk bii, in mɛ e ɗaŋmɔ ha̧ a̧, ɓɛɛ nɛ ko o ŋgaŋawi, wi tɛ yor zu wen kɔ-wa nɛ ŋgaiá.

⁷Ŋma bii, nɛ Wi nɛ ɔ wan zu bii lɛŋ tɛ pɛ̧ nɛ ndaa ti a̧ bó na; gasi ko bii de ŋma mɔ tɛ-A̧ na mbɛt. Nɛ́ A̧‘a dee o gasa bíí in o geɗɛk-a, ɓɛɛ A̧ kɛ̧ mgbara wa na, hakali nɛ wa lɛŋ.

⁸Ɓɛɛ kóó o wan-ŋgai, A̧ tɛ kii mgbara mɔ nɛ wa dea nɛ sa̧-a̧.

⁹Hegɔ, nɛ́ h’ɛ́nɛ́ o be-wan a'm tɔ̧ wen’ɛ, wen h’ɛ́nɛ́ mɛ yambi ɗuka-taamɔ, in k’ɛ́nɛ́ tɛ̀ɛ́ kɔ̧ naŋ-‘nɛ́ nɛ mɔ.

¹⁰Wen o wi nɛ tɛ ndak ɗoŋ o sa̧-a̧ heembea nɛ yuwar-a, wi tɛ zɔk wa hee o sa̧a̧ bíí ga, ɓɛɛ o wi nɛ tɛ yambi o heembea nɔ‘i tɛ kpa nú-wen kpasa tɛ.

¹¹Hegɔ, ɛnɛ dé wɔ zia wen kɔ‘m, ɛnɛ kɔ̧ wa nɛ ŋgaiaa, ɓɛɛ ɛ́nɛ́ tɛ iŋ mɔ.

¹²Ɗuka-taamɔ tok tok lak-lak, ɓɛɛ a̧ bi na; ɓán ná a̧ ee ha̧ o wi nɛ kɔ̧ɔ̧ a̧ mɛ zɔk a̧, in ha̧ o wi nɛ kii a̧ mɛ kpa a̧.

¹³A̧ yak ti ha̧ o wi nɛ de wɔ a̧, usi nɛ tɛ-a ti ha̧ wa.

¹⁴Wi nɛ gbo tuyɛ kií nɛ a̧ beka mbɔi na. Wi’ɛi tɛ kpa a̧ fara duká nu, mgbak dadàá nútua kɔ‘i.

¹⁵Ha̧-a̧ tɛ lɛŋ ha̧ a̧, nɛ́ kpasa kɛ̧ɛ̧-mgbara-mɔ. Ɓɛɛ ŋma mɔ beka ɓílí wi nɛ yaŋ yá kíí nɛ a̧ na.

¹⁶Wen a̧ yár yar nɛ zu-a kíí nɛ o wi nɛ nyɛma yi-a̧, usi nɛ tɛ ha̧ wa, sɛn yuwar kɔ-wa nɛ ko, ɓɛɛ a̧ a̧-a̧ ti ha̧ taamɔ kɔ-wa kpɔk kpɔk lɛŋ.

¹⁷Ku̧u̧naŋ ɗuka-taamɔ nɛ́ kia a̧ nɛ kpasaa, ha̧ a̧ mɛ de ha̧‘i mɛ iŋ mɔ,

¹⁸kia a̧ ha̧‘i mɛ iŋ mɔ, nɛ́ kɔ̧ɔ̧ a̧, kɔ̧ɔ̧ a̧ nɛ́ kasa o heembea kɔ̧-a̧, kasa o heembea kɔ̧-a̧ nɛ́ iŋaa kana nde wi tɛ dùk kpasa kpoo nɛ kpoo,

¹⁹ɓɛɛ dukaa kpoo nɛ kpoo ndaɗi nɛ́ wi in Sɔ̧.

²⁰Hegɔ, wɔ Ɗuka-taamɔ ba nɛ́ wi hɔ tɛ mɔɔwan.

²¹Ɓɛɛ, ɛ́nɛ́ o wi nɛ ɔ wan zu o dukbíí, kà wɔ kiti-wan in o dɔra-a nɛ́ gbɛɛ‘nɛ́, n’ɛnɛ ba kpasa Ɗuka-taamɔ e ti, ɓɛɛ ɛ́nɛ́ tɛ ɔ wan kpoo nɛ kpoo.

²²Ɓɛɛ Ɗuka-taamɔ‘i nɛ́ ge? A̧ tɛ nɛ dée? Mi tɛ sar ndaa-a̧ lɛŋ h’ɛ́nɛ́, ŋma mɔ tikiɗi n'am tɛ hu̧si bó na. Mi tɛ ɓa gun-aa h’ɛ́nɛ́ hɔ ɗɔɔkɔri-a. Mi tɛ de h’ɛ́nɛ́ mɛ iŋ ndaa-a̧ nɛ sa̧-a̧. Mi beka wɛr benaŋ tikiɗi nɛ ka̧ kpasa-wen na.

²³Mi beka ndak pata o ɗaŋ wɔ-mɔ nɛ gbɛ bii’ɛ na. Wen ŋma mɔɔ tɛ Ɗuka-taamɔ bó tɛ wa na.

²⁴Ɓɛɛ, nɛ́ dɔkaa ko o wan-ɗuka-taamɔ a kpasi o bíí zaŋnu; ɓɛɛ wannu nɛ a̧-a̧ nɛ ɗuka-taamɔ de dee ha̧ dukbii kɔ‘i mɛ kpa de dukaa.

²⁵Hegɔ, ɛnɛ zii o wen nu'm, ɓɛɛ tɛ gbak'nɛ́.