Read Northwest Gbaya ƊUKA-TAAMƆ 7 Bible Online

ƊUKA-TAAMƆ 7 - Northwest Gbaya bible

ƊUKA-TAAMƆ 7

¹Mi mbɛt, mi nɛ fio hee o dɔka bii ga, bezaŋ kuti bii nɛ wa ɓoo nɛ gii. Nɛ́ kɔ̧ zaŋ naa a murtɛ‘m mboɗa ŋmaa sɛnɛ.

²Mi duka ɗɔɔ tɔk-zaŋ tɛ fiozɛ ɓu. Mi tɛɛ nɛ kparmɔ ko wiwii, nɛ́ mɔɔ-oi bɔtɛ ɔaa ko wiwii in okóò in ŋmaa a de am.

³Mi mbɛt, dika tɛ koa'm kasak, mi ɔma nɛ kpɔk ɔmi, nɛ o bii ɔm, ɓɛɛ mi tik kana kpɔk zaŋnu bɔnɛ'ɛ. Kuti hiɗimɔ kɔ‘m duka nɛ kɔ̧a̧, hee ko o dɔka obem ga.

⁴Wa daia'm nɛ o goi, tɛ aia-nú.

⁵Ŋma wannu nɛ tɛ̀ɛ́ kɔ‘i zaŋnu nɛ ŋma yuwar nɛtɛ bó na.

⁶Yuwar tɛaa zaŋnu in gboaa mbɛt nɛ́ kale kpɔk mɔ wen o bii lɛŋ.

⁷Kale-a a'i n'am kɔfa nɛ Sɔ̧, ɓɛɛ mi kpa kɔ-ta kɛ̧ɛ̧-mgbara-mɔ, mi aia nú‘m, ɓɛɛ ɔmi ɗuka-taamɔ ye tɛ‘m.

⁸Mi kɔ̧ɔ̧ ɗuka-taamɔ gan o dɔ́rá in kiti-wan, mi baa mbɔi e tɛ geemɔ ti a̧.

⁹De ta, nɛ gɛnɛ-a ŋgaia gan dɔkaa, hɔ́ gee hɔɔ ŋmaa in a̧ na; wen o lɔr zu nu lɛŋ nɛ́ gee nyɛmɛ ti a̧, bú-mbɔi mbɛt nɛ́ gee ɓɔtɛ sɛn ti a̧.

¹⁰Mi kɔ̧ɔ̧ a̧ gan hayatɛ in de saŋa-yí, mi kɔ̧ɔ̧ mɛ ba a̧ hee sa̧a̧mɔ kɔ‘m ga, wen n'aa kaɗi nyɛkaa ti'm na.

¹¹Nɛ́ mɔɔ n'aa tutura o demɔ nɛtɛ nɛtɛ lɛŋ tɛ nɛnɛ ha̧‘m; a̧ kaia o zɔm mbɔi nɛ‘i nyɛm mɛ tɔr na, tɛ nɛnɛ ha̧‘m.

¹²Mi nyɔŋa bɔtɛ o mbɔi nɔ‘i, wen nɛ́ ɗuka-taamɔ a ha̧wa ha̧‘m. Zu-a'i, mi iŋ so'e o mɔ nɔ‘i tɛ nɛ tɛ-a na.

¹³Mɔ n'am kpaa tɛ a̧, nɛ yuwar-a, mi tɛ usi lɛŋ h’ɛ́nɛ́. Mi beka gu nú‘m zu ŋma be mɔ n'am kpaa nɛ ɗoŋ-a na.

¹⁴Wen a̧ dúk wen o bii hee ŋma dɔka mbɔi nɛ beka kaɗi na ga. O wi nɛ kpaa a̧ dee nɛ sɛm in Sɔ̧, wen o demɔ nɛ wa kpaa tɛ yamba mɔ dee ha̧ Sɔ̧ mɛ kɔ̧ wa.

¹⁵Sɔ̧ a de ha̧‘m mɛ tɔ̧ wen nɛ yuwar-a, in ha̧‘m mɛ de taamɔ nyɛm ɗoŋ o ha̧a̧mɔ n'Aa ha̧ha̧‘m, wen nɛ́ A̧‘a dúk ti ha̧ ɗuka-taamɔ. A̧ nɛ wi dúk zu o wan-ɗuka-taamɔ mbɛt.

¹⁶Nɛ mbetɛ, ɛ́ɛ́ nɛ tɛ-yɛ, ɛ́ɛ́ ya lɛŋ kɔ̧ er-a, ɛ́ɛ́ gu nɛ o wen mɛ nú-yɛ, iŋamɔ k’ɛ́ɛ́, in o yuwar deemɔ k’ɛ́ɛ́ nɛtɛ nɛtɛ mbɛt.

¹⁷Hegɔ, A̧ dee ha̧‘m mɛ iŋ ndaa o mɔ n'Aa dea nɛ sa̧-a̧. A̧ dee ha̧‘m mɛ iŋ mgbara dukaa ko o mɔɔ-zaŋnu, in o tom kɔ-wa kpɔk kpɔk,

¹⁸ha̧‘m mɛ iŋ ku̧u̧naŋ ŋgimbi, kaɗa-a in bii-see-aa, ha̧‘m mɛ iŋ ŋgimbi nɛ wese kóó zɛ gan nɛ ŋmaa nɛ duraa in ŋgimbi kpaia ŋmaa ko bɛɛ in ɓar,

¹⁹ha̧‘m mɛ iŋ kpaia ŋmaa ko ŋgimbi zaŋ pɛ lɛŋ, in fara-yaa ko o mɔ nɛ nyɛk yi-zan.

²⁰Ha̧‘m mɛ iŋ yí o saɗi, in deemɔ ko o saɗi zaŋbɛɛ, ŋgai ko o ɗaŋ-sɔ̧, in o taamɔ ko o bii, yí o te nɛtɛ nɛtɛ, in tom ko o ku̧-nin-te lɛŋ.

²¹O mɔ nɛ‘i zɔk in o wan nɛ ya nɛ hu̧saa, mi iŋa, wen nɛ́ Ɗuka-taamɔ nɛ deemɔɔ zu nu lɛŋ a̧ usa wa ha̧‘m.

²²Wen, ɔmi-iŋamɔ a̧-a̧ tɛ Ɗuka-taamɔ‘i, ɔmi'i ɔ sa̧-a̧, a̧ kpɔk ɓɛɛ, ɓɛɛ o yuwar deemɔ kɔ̧-a̧ ɔ dɔka; a̧ kɔɓi mɔ nɛ hayaa, a̧ nɛ́ dam fara lɛŋ, a̧ zii ndaa mɔ yɛkɓɛlɛk, ndiŋ bo tɛ a̧ na, a̧ ɔ nyɛka, tɛ-a de nyir na, a̧ kɔ̧ɔ̧ nɛ́ demɔ, ɓɛɛ a̧ zii mgbara mɔ nɛ haya;

²³ŋma mɔɔ dor a bó na, a̧ de nɛ demɔ in bii, a̧ de nɛ sɛm in bii; a̧ ɔ nɔa, wi nyɛma mɛ e ta nɛ a̧, ɓɛɛ a̧ a̧-a̧ nɛ kpee-see mbɛt, ŋma mɔ gan ŋgai kɔ̧-a̧ na, ŋma mɔɔ yak yí-a na. A̧ ye tɛ o taamɔ ko bii lɛŋ, o wan nɛ zii mɔ zii, o wan nɛ ɔ sa̧-a̧, in o wan nɛ kɔɓi mɔ nɛ hayaa gan mbɛt.

²⁴Hegɔ, Ɗuka-taamɔ hayá gan o mɔ nɛ fo mɔ lɛŋ; a̧ gɔm yɛ tɛ mɔ lɛŋ, wen n'aa zaŋ ŋmaa in ŋma mɔ na.

²⁵A̧ nɛ́ nú búk-ŋgai ko Sɔ̧, mgbak nú sa̧a̧mɔ nɛ tɛ́ nɛ tɛ gasamɔ ko Wan nɛ a̧-a̧ nɛ ŋgaiamɔ lɛŋ. Mɛ nɛ́ hegɔ sa ŋma be ndiŋmɔ ye tɛ a̧ na.

²⁶A̧ nɛ́ giɔ̧ sa̧a̧mɔ nɛ dúk kpoo nɛ kpoo'i, kpasa darngɛl-zɔk-tom ko Sɔ̧ nɛ sa̧-a̧, a̧ nɛ́ giɔ̧ dee demɔ kɔ̧-A̧ mbɛt.

²⁷Kóó n'aa dúk ɛnɛ-a ɓɛɛ‘i, a̧ nyɛma deemɔ lɛŋ. A̧ ɓɔn nɛ oi tɛ-a, kpai nɛ mɔɔ-zaŋnu nɛ mbea, ye nɛ tɛ o sa̧a̧-bii dam ɗoŋ pɛ lɛŋ, kifi nɛ wa nɛ o sɛm ko Sɔ̧, in o witɔ̧wen oi nú Sɔ̧.

²⁸Wen Sɔ̧ kɔ̧ɔ̧ nɛ́ o wi nɛ ndaɗi in Ɗuka-taamɔ ɓɛɛ.

²⁹A̧ toka gan wese, a̧ gana mɔ nɛ nyɛk yi-zan lɛŋ; ká‘i we a̧ nɛ sa̧a̧mɔ, ɓɛɛ nɛ́ á̧ a gan ganaa:

³⁰wen, sa̧a̧mɔ e fara ee ha̧ tum, ɓɛɛ nɛ ko Ɗuka-taamɔ, ŋma ɗaŋmɔ nyɛm mɛ gan a̧ na.