Read Northwest Gbaya ƊUKA-TAAMƆ 8 Bible Online

ƊUKA-TAAMƆ 8 - Northwest Gbaya bible

ƊUKA-TAAMƆ 8

¹Ŋgai ko Ɗuka-taamɔ dama zu nu lɛŋ, ɓɛɛ a̧ ɔ wan zu mɔ lɛŋ, tɛ kɔ̧ɔ̧mɔ.

²Nɛ́ Ɗuka-taamɔ a baa see-am, ɓɛɛ mi ki nɛ́ a̧ mbɛt, dika tɛ daŋa-ŋgai kɔ‘m. Mi kia so mɛ ba a̧ nɛ kóò, ɓɛɛ mi ye tɛ dea mgbele dée kɔ̧-a̧.

³Gasi kɔ̧-a̧ usi fara n'a̧-a̧ tɛ nɛnɛ‘i, wen a̧ kpaa kpɔk duka-kpasa in Sɔ̧ in Wi nɛ ɔ wan zu ɔ mɔ lɛŋ kɔ̧ɔ̧ a̧.

⁴Hee mɔ nɛ Sɔ̧ usa ndaa iŋamɔ kɔ‘i ha̧ a̧ ga, nɛ́ Ɗuka-taamɔ‘i mbɛt a̧ e zu o mɔ nɛ Sɔ̧ tɛ de.

⁵Kà kpaa mbɔi a boó nɛ́ gasa demɔ nɛ‘i ki zaŋnu hɛ̧ɛ̧, nɛ́ ge mbɔi ge a gana Ɗuka-taamɔ nɛ demɔ lɛŋ'ɛ ge?

⁶Kà iŋamɔ ko bii nɛ dee ha̧ o tom kɔ̧-a̧ mɛ hɔ gba̧a̧, ɓɛɛ bó nɛ́ Ɗuka-taamɔ nɛ dee o mɔɔ zaŋnu lɛŋ‘i tɛ de kɔ‘i gan na nde?

⁷Ɛnɛ kɔ̧ɔ̧ mɛ dúk nɛ wara nde? O yuwar dee demɔ lɛŋ gbo nɛ tɛ-a̧, wen mɔ n'a̧-a̧ usi nɛ́ kasa-zu, hakilo, deemɔ nɛ yuwar-a a̧ in nɔɔŋgiɗi; ɓɛɛ o mɔ, nɛ tɛ gbak bii gan tɛ dukaa zaŋnu hɛ̧ɛ̧, nɛ́ mɔ'ɔ nɔ‘i.

⁸Ɛnɛ kɔ̧ɔ̧ mɛ iŋ mɔ nɛ dɔkaa si ti nde? Ɗuka-taamɔ iŋa o gba'a̧ mɔ nɛ yaka, in o wan nɛ nyɛma mɛ hɔ. A̧ iŋa mgbara o tua-wen in tɔ̧ɔ̧ gba̧a̧ o sumgba. A̧ iŋa o mɔɔ-usi-mɔ in o mɔɔ-kifi lɛŋ nɛti ha̧ wa mɛ hɔ. A̧ iŋa o de pɛ in o de ŋgimbi mbɛt.

⁹Hegɔ, mi hoka a̧ mɛ gbam in am tɛ dukaa kɔ‘m zaŋnu hɛ̧ɛ̧, wen mi iŋa nde a̧ tɛ tɔ̧ mbɔrɔ dee demɔ ha̧‘m, ɓɛɛ a̧ tɛ ha̧ nɔɔŋgiɗi ha̧‘m, ŋgimbi sakalamɔ in ɗaŋsee.

¹⁰Mi zɔka nde o giiwi tɛ zɔn am, wen zu a̧, ɓɛɛ kóó zu ŋgaiwi n'am ɓɔna sɛnɛ‘i, o dita-bii tɛ tu̧ tɛ‘m.

¹¹Ŋgimbi n'am tɛ gɔn kita, bii tɛ kpa'e mi gboo yi-wen lɛŋ, ɓɛɛ o gasawi tɛ yéŋ am.

¹²Kà‘m kpe nú‘m, wa tɛ zɛm mɔ; kà‘m hu̧i̧ nú‘m, wa tɛ ya selele; kà ɗoŋ wen kɔ‘m nyɛi̧, ɓɛɛ wa aa nɛ́ er nú-wa ɓeke-yeke.

¹³A tɛ de ha̧ tɛ-bíí tɛ mbaŋ ɗoŋ am kpoo nɛ kpoo, ɓɛɛ tɛ o bíí nɛ tɛ tɛ ɗoŋ am tɛ dùk tɛ‘m ɓɔnsɛnɛ.

¹⁴Mi tɛ ɔ wan zu o dukbii, ɓɛɛ o zuduk tɛ ɔ nu ha̧‘m.

¹⁵Tɛ o ŋgaŋa wannu tɛ nak wɛlɛ-wɛlɛ tɛ gee zia nin-am. Mi tɛ dùk nɛ dea poo o bii, ɓɛɛ mi duka nɛ hayatɛ yi biro.

¹⁶Ŋgimbi n'am tɛ si tɛ kɔ‘m, mi tɛ ɔm tɛ‘m ka tɛ Ɗuka-taamɔ, wen ɗaŋsee bó tɛ dukaa kpɔk in a̧ na, tu̧u̧see bó tɛ dee sɛm in a̧ na mbɛt, kana nɛ́ bɔtɛ in desee ɓɛɛ.

¹⁷Mi taa mɔ zu o mɔ nɔ‘i lɛŋ, ɓɛɛ see-am usi nde hɛra tɛ nɛ Ɗuka-taamɔ ha̧ nɛ duká-kpasá kpoo nɛ kpoo.

¹⁸Dee sɛm in a̧ ha̧ nɛ gasa bɔtɛ, ɓɛɛ o tom mɛ er-a de dee ha̧‘i mɛ kpa mbɔi nɛ nyɛm mɛ kaɗi na. Gbamaa in a̧ ɓɔnsɛnɛ hu̧i̧ nɛ́ iŋamɔ ko bii, ɓɛɛ tɔ̧ɔ̧ nyɛrɛ in a̧ ba nɛ́ nin-wi e ŋgɔn. Hegɔ, mi nɛɛ dam fara lɛŋ, kii nɛ yuwar nɛ tɛ de ha̧‘m mɛ ba a̧ nɛ kóò.

¹⁹Mi duka so nɛ́ ŋma yaa-de-sɔnti, sɔ̧tɛ‘m mbɛt ɔ so dee.

²⁰Wen nɛ tɔ̧ nde hee mɔ n'am duka nɛ de wi ga, mi tɛa nɛ́ tɛ kpootɛ, nɛ ndiŋ bo sɛnɛ na

²¹Hegɔ, mi kɔɓa nde kà Sɔ̧ ha̧ so Ɗuka-taamɔ ha̧‘m na, mi nyɛm so mɛ kpa a̧ na. Nɛ́ wi-kɛ̧ɛ̧-mgbara-mɔ kpɔk ɓɛɛ a nyɛma mɛ iŋ wi nɛ ha̧a̧mɔ‘i tɛ nɛnɛ. Nɛ́ hegɔ sa'm zik tɛ‘m sitɛ Gasa Wan, ɓɛɛ mi kɔfi nɛ A̧ nɛ see-am lɛŋ, tɔ̧ nɛnɛ‘e: