Read Northwest Gbaya ƊUKA-TAAMƆ 9 Bible Online

ƊUKA-TAAMƆ 9 - Northwest Gbaya bible

ƊUKA-TAAMƆ 9

¹“Sɔ̧ ko o zɔmdáà, Gasa Wan Yaa-de-ko, n’Ɛnɛ deemɔ lɛŋ nɛ wen mɛ nú‘Nɛ́ Ɛnɛ dee nɛ́ mɔ lɛŋ.

²Nɛ́ tɛ ɗuka taamɔ k’Ɛ́nɛ́, Ɛnɛ dee nɛ́ bii, wen ha̧ a̧ mɛ duk zu o mɔ lɛŋ n’Ɛnɛ dea.

³Ha̧ a̧ mɛ ɔ wan zu nu nɛ kɔ̧ɔ̧mɔ in tanamɔ, in ha̧ a̧ mɛ gɔn kita nɛ wara.

⁴Ɛnɛ há̧ Ɗuka-taamɔ nɛ dúk kpɔk in'Nɛ́ɛ́ zu kiti-wan k’ɛ́nɛ́‘i ha̧‘m, ɓɛɛ k’Ɛ́nɛ́ ndak am yinɛ mgbara o bem k’Ɛ́nɛ́ na.

⁵Wen mi nɛ́ widetom k’Ɛ́nɛ́ in bem ko kodetom k’Ɛ́nɛ́, ŋma gee wi-ɓɔsa nɛ ɗoŋ dukaa kɔ̧-a̧ nyɛi na, ɓɛɛ nɛ zii kɔ‘i mgbara deemɔ nɛ yuwar-a in o heembea na.

⁶Wen, kóó ŋma bii mgbara o bem ko bíí a dúk so nɛ widemɔ nyɛm sɛnɛ, kà Ɗuka-taamɔ nɛ tɛ nɛ tɛ-‘Nɛ́ bó tɛ a̧ na, a̧ nɛ́ geemɔ sɔɔgee.

⁷Nɛ́ Ɛ́nɛ́ a hoka'm nɛ wannu ko dukbii k’Ɛ́nɛ́, in wigɔnkita zu o be-wiwii in o bokobem k’Ɛ́nɛ́.

⁸Ɛnɛ ha̧nú ha̧‘m mɛ mbo Tua zu sa̧-a̧ kaya k’Ɛ́nɛ́, in mɛ mbo fara-ɗafi ‘Nɛ́ saaye n’Ɛnɛ dee so fara-duk k’Ɛ́nɛ́ sɛnɛ, hee Tua-laa k’Ɛ́nɛ́ n’Ɛnɛ ɗafa so dika tɛ ku̧u̧naŋmɔ ɓeemɛ'ɛ ga.

⁹Ɗuka-taamɔ nɛ iŋa o deemɔ k’Ɛ́nɛ́ lɛŋ, ɓɛɛ nɛ duka oi dea o mɔɔ-zaŋnu n’Ɛnɛ dea’ɛ a̧-a̧ in'Nɛ́ɛ́. A̧ iŋa mɔ nɛ ɔ dee tɛ‘Nɛ́, in mɔ nɛ dúk nɛ wara, nyɛm nɛ ɗoŋ o heembea k’Ɛ́nɛ́.

¹⁰Ɛnɛ zír a̧ tɛnɛ nɛ́ sa̧a̧ fara k’Ɛ́nɛ́ yiwese mɛ, Ɛnɛ tóm a̧ nɛ́ tɛ sa̧a̧ fara-duk mɛ gasamɔ k’Ɛ́nɛ́ mɛ tɛnɛ, ha̧ a̧ mɛ duk ka tɛ‘m gbak nɛ‘m tɛ bɔnɛ, in ha̧‘m mɛ iŋ mɔ nɛ ɔ dee tɛ-‘Nɛ́.

¹¹Wen a̧ iŋa mɔ lɛŋ, a̧ zii mgbara mɔ lɛŋ mbɛt, a̧ tɛ duk ti ha̧‘m nɛ yuwar-a tɛ o tom kɔ‘m lɛŋ, ɓɛɛ a̧ baa'm e ɗɔɔ giɔ̧ gasamɔ kɔ̧-a.

¹²Ɓɛɛ hegɔ, Ɛnɛ tɛ kpɛk o tom kɔ‘m lɛŋ, mi tɛ gɔn kita zu dukbii k’Ɛ́nɛ́ nɛ yuwar-a, ɓɛɛ mi tɛ nyɛm dukaa zu kiti-wan ko dáà kɔ‘m.

¹³Nɛ́ ge bii ge a nyɛma mɛ iŋ mɔ nɛ Sɔ̧ kɔ̧a̧ mɛ de ge? Nɛ́ o'o nyɛma mɛ iŋ be-mɔ nɛ Gasa Wan kɔ̧a̧ o?

¹⁴O taamɔ ko o bii ya siti-siɗoŋ, ta-zu-bii dúk tɛ mɔ ɗoŋ-aa nyɛi na.

¹⁵Kiitɛ-wi nɛ tɛ mbɔr mbɔr diti nɛ́ sɔ̧tɛ-wi, ɓoo-gii'i nɛ gasa tui wen ɔmi ko bii, nɛ o taamɔ nɛtɛ nɛtɛ nukuri.

¹⁶Ɛ́ɛ́ iŋ o mɔɔ-zaŋnu hɛ̧ɛ̧ yɛkɓɛlɛk na; kóó o wan nɛ ya dɔ̧́ɔ̧́ katɛ yɛ mbɛt, nɛ́ bɔnɛ bɔnɛ ɛɛ zii nɛ mgbara-wa. Ɓɛɛ nɛ́ o'o zia mgbara o mɔ mɛ yiwese kaɗi, o?

¹⁷K’Ɛnɛ ha̧ so Ɗuka-taamɔ tɛnɛ na, in k’Ɛnɛ tom so Sa̧-a̧ Ɔmi k’Ɛ́nɛ́ tɛnɛ nɛ ŋgɔn mɛ na, nɛ́ ɔ'ɔ tɛ̀ɛ́ iŋ so mɔ n’Ɛnɛ kɔ̧a̧ mɛ de o?

¹⁸Nɛ́ hegɔ a'i kaia nɛ o wi-zaŋnu pii-nɛ-ɗoŋ zu tana war. Nɛ́ hegɔ mbɛt a o bii iŋa nɛ mgbara mɔ nɛ ɔ dee tɛ-‘Nɛ́, ɓɛɛ ká Ɗuka-taamɔ kpasi nɛ wa.