Read Northwest Gbaya SIRAK 1 Bible Online

SIRAK 1 - Northwest Gbaya bible

SIRAK 1

¹Kuti Usamɔ Hu̧samɔ nɛ a̧-a̧ tɛ ɗuka-taamɔ Ɗuka-taamɔ lɛŋ tɛ́ nɛ tɛ Gasa Wan, ɓɛɛ a̧ dúk in A̧ kpoo nɛ kpoo.

²O nyɛmɛ ɗɔɔ gbatɔp, o naŋ-koro nɛ ai, o zɛ dika ɓeemɛ yak nɛnɛ́, o’ɔ nyɛma mɛ tɔr o?

³Nɛ o’ɔ nyɛma mɛ iŋ ndaa kusá yizan, pɛsá nu in ndaa gba ɗuka fara o?

⁴Ɗuka taamɔ dee nɛti ha̧ mɔ lɛŋ, ɓɛɛ iŋa-mgbara-mɔ nɛ wara tɛ́ kɔ‘i dika ɓeemɛ.

⁶Wa tɔ̧ɔ̧ tugun ɗuka-taamɔ ha̧ o? Nɛ́ o’ɔ iŋa ndaa o hu̧samɔ n'A̧a̧ dee o?

⁸Ɓaa wi nɛ a̧-a̧ nɛ ɗuka-taamɔ, nɛ bii lɛŋ yú, nɛ́ wi nɛ dúk nu gɔn kiti-wan kɔ‘i, a kpɔk ɓɛɛ.

⁹Nɛ Gasa Wan, nɛ zu, a dee ɗuka-taamɔ‘i; A̧ zɔka a̧, A̧ wee dita-a̧.

¹⁰A̧ zira a̧ a zú mɔ n'A̧a̧ dee lɛŋ, in o bii lɛŋ mbɛt nyɛm nɛ ɗoŋ dee demɔ kɔ̧-A̧. A̧ ha̧a̧ há̧ o wi nɛ kɔ̧ɔ̧ A̧. Yuu-kii Gasa Wan

¹¹Yuu-kii Gasa Wan nɛ mɔɔ-ha̧-gasi in mɔɔ-zɔn-tɛ, mɔɔ-ha̧-desee in mɔá-nyɛŋɛ.

¹²Yuu-kii Gasa Wan ɔ̧́ nɛ nyɔɔ̧ kɔ̧ see-wi; a̧ há̧ nɛ desee, tɔrtɛ in duka-kpasa ɗoŋ-aa nyɛi.

¹³Mɔ ko wiyukii Gasa Wan tɛ nɛ́ nɛ dea hɔ́ sɔŋkur-aa; a̧ tɛ kpa de toka yoŋgo wese fio kɔ̧-a̧.

¹⁴Ku̧u̧-naŋ ɗuka-taamɔ nɛ yuu kii Gasa Wan; war ko o wimbozu, wa dee a̧ kpɔk in wa dika kɔ̧ zaŋ naa kɔ-wa.

¹⁵A̧ dee fara-duk kɔ̧a̧-a̧ mgbara o bii, dika tɛ ku̧u̧naŋ fara mɛ́; a̧ tɛ duk in o bezaŋ-wa nɛ mboo-zu ɓɔnsɛnɛ.

¹⁶Sɔŋkur kpasa ɗuka-taamɔ nɛ yuu kii Gasa Wan; A̧ ha̧ o wayate kɔ̧-a̧ ha̧ o bii kɔ̧-a̧ nɛ dɔkaa yak zale.

¹⁷A̧ duná tua kɔ-wa lɛŋ nɛ mɔ nɛ wa kɔ̧a̧, ɓɛɛ dam kɔ-wa mbɛt tɛ dun nɛ mɔɔ-oi-tom kɔ̧-a̧.

¹⁸Mgbak yi mɔɔ-usi ɗuka-taamɔ nɛ́ yuu kii Gasa Wan, nɛ de ha̧‘i mɛ kpa de-dukaa in de hayatɛ.

¹⁹A̧ há̧ iŋamɔ in iŋa-mgbara-mɔ ha̧a̧, nɛ zɔm dɔkaa; a̧ de dee ha̧ nin o wi n'a̧a̧ dúk tɛ wa mɛ hu̧r siti.

²⁰Ku̧nin ɗuka-taamɔ nɛ́ yuu kii Gasa Wan, ɓɛɛ o gbaa-er-a̧ nɛ́ duka kpasa ɗoŋ-aa nyɛi. Dee munyal in kasá zu-wi

²²Dee nyimsea gba̧a̧ bo na nyɛm sɛnɛ na, wen deemɔ ko Wan-nyima-see ir nɛ a̧ ha̧ a̧ mɛ tik.

²³Wi-munyal tɛ́ nyɔŋ nín zɛm nɛ de ŋgimbi, ɓɛɛ sɔŋkur-aa, a̧ tɛ kpa gasa desee.

²⁴A̧ tɛ kasi taamɔ kɔ̧-a̧ kɔ̧ see-a zɛm nɛ de ŋgimbi; ndaranú-bii lɛŋ tɛ tɔ̧ nyɛrɛ iŋa-mgbara-mɔ kɔ̧a̧-a̧. Ɗuka-taamɔ in deemɔ nɛ yuwar-a

²⁵Mgbara o demɔ ko ɗuka-taamɔ lɛŋ, o tua-wen-ha̧-iŋamɔ a̧-a̧ sɛnɛ, ɓɛɛ tu̧u̧ tɛ Sɔ̧ nɛ́ ŋma mɔɔ-nyɛr tɛ ɗaŋwi.

²⁶Mɛ, nɛ mɛ́ kɔ̧a̧ ɗuka-taamɔ'ɛ, mɛ kasí o heembea, ɓɛɛ Gasa Wan tɛ ha̧ ɗuka-taamɔ‘i ha̧ mɛ́

²⁷Wen ɗuka-taamɔ in iŋa-mgbara-mɔ de ha̧‘i mɛ yu kii Gasa Wan; mɔ nɛ́ ɔ́ dee tɛ A̧, nɛ mboo-zu in mɔkasee.

²⁸Ká mɛ ŋgai see-mɛ tɛ yuu kii Gasa Wan na, ká mɛ́ nɛ́ tɛ A̧ nɛ see yiitoo na.

²⁹Ká mɛ́ dúk nɛ see yiitoo ti bii na, ɓɛɛ mɛ hakali ndaranú-mɛ́.

³⁰Ká mɛ gasi zu-mɛ na, wen ká mɛ tɛɛ yo nu, ɓɛɛ ká búù tɛɛ ba mɛ, wen Gasa Wan tɛ gba ndaa-mɛ, ɓɛɛ A̧ pii búù zu mɛ sɛn mgbara bii, wen nɛ mɛ yú kii A̧ na in wen nɛ see-mɛ duna nɛ ɔrmɔ.