Read Northwest Gbaya SIRAK 10 Bible Online

SIRAK 10 - Northwest Gbaya bible

SIRAK 10

¹Ɔɔwan Wan nɛ a̧-a̧ nɛ ɗuka-taamɔ usi nɛ yuwar de dukaa há̧ dukbii kɔ‘i. Wan ko wi-iŋ-mgbara-mɔ nɛ́ nɔ̧ nɛ dea.

²O be-wan hɔ́ nɛ́ wan kɔ‘i. O be-saaye hɔ́ kana nɛ wanye kɔ‘i.

³Wannu nɛ iŋ mgbara mɔ na dúk nɛ nik-fio ko dukbii kɔ‘i; ye ɓɔ́ wen zu iŋa-mgbara-mɔ ko o wi nɛ ɔ́ wan zu a.

⁴Wan zú nu a̧-a̧ kɔ̧ er Gasa Wan; A̧ tɛ hok wi nɛ nyɛma yi wan’ i tɛ ŋgimbi-a.

⁵Kpaamɔ ko bii a̧-a̧ er Gasa Wan; A̧ tɛ e ga̧samɔ kɔ̧-a̧ zu o wi-yɔr-heembea. Tɔ̧ɔ̧ wen zu gɔɔtɛ

⁶Koo ŋma-mɛ dee nɛ ge gɔɔmɔ gee, ká mɛ e kiri in a̧ na; ká mɛ demɔ zaŋ nyimsea na.

⁷Gɔɔtɛ de yí Gasa Wan na, de yí bii na mbɛt; gɔɔmɔ nɛ ŋma yɔɔkaya-mɔ yí o wi nɔ‘i yiitoo'i lɛŋ.

⁸Wan yú er ŋma zuduk si tɛ ŋma nɛtɛ, wen zu o gɔɔmɔ, o ŋgaŋgamɔ in wɔmɔ.

⁹Wi nɛ dúk nɛ gee fuunu in bùk bɛɛ nɛ‘i iŋa'e, tɛ duka kpasa kɔ̧-a̧ nyak-zaŋ-a lɛŋ nɛ gee mbɔrá mɔ, gɔ́ bòò kɔ‘i tɛ wen ge?

¹⁰Ŋma nyɛia̧ ɗoŋ zɛ́ɛ́ gán wan-nyina gan, wi nɛ ɔ wan sɔsɔá tɛ fe fee mɛ sa̧a̧mɔ.

¹¹Ŋgimbi nɛ bii fe kaɗi, mɔɔ-oi-aa nɛ o kokoɗomɔ, o saɗi in o dɔk.

¹²Ku̧u̧naŋ gɔɔtɛ ko bii nɛ ará tɛ nɛ Gasa Wan in dee ŋgazu in Wi nɛ dee a̧.

¹³Ku̧u̧naŋ gɔɔtɛ nɛ dee ɗaŋmɔ, ɓɛɛ wi nɛ hɛ́r tɛ nɛnɛ́ keŋ-keŋ yak nɛ dɔka mɔɔ-nyɛr a zu. Kalea a̧‘i sa Gasa Wan fó gasa bɔnɛ pi zu wa, ɓɛɛ sɔŋkur-aa A̧ tɛ kum wa lɛŋ a nu gbuɗuk.

¹⁴Gasa Wan zuɗa kiti ko o be-wan gusi nɛ nu, ɓɛɛ A̧ kai nɛ o ga̧-a̧ wi a oi wa.

¹⁵Gasa Wan zuɗa ku̧nin o wigɔtɛ a táŋ, ɓɛɛ A̧ gun nɛ o geewi oi wa.

¹⁶Gasa Wan ɗaŋá nu ko o gɔni duk lɛŋ kpaŋgala-kpaŋgala hɔ nduti-a mɛ́.

¹⁷A̧ foo wa yinɛ mgbara o bii, ɓɛɛ A̧ kum wa gbuɗuk. A̧ bii nin-wa zu nu yinɛ.

¹⁸Gɔɔtɛ bo nɛ mɔ ko bii na, nyimsea mbɛt bó nɛ mɔ ko bezaŋ okóò na.

¹⁹Nɛ ge duk ge a'i nyɛma mɛ gasi ge? Nɛ duk ko o bii. Nɛ ge duk ge a'i nyɛma mɛ gasi ge? Nɛ o wi nɛ yú kii Gasa Wan. Nɛ ge duk ge a'i nyɛma mɛ e tɛ geemɔ ge? Nɛ zuduk ko o bii. Nɛ ge duk ge a'i nyɛma mɛ e tɛ geemɔ ge? Nɛ o wi-gbin o heembea.

²⁰Wi nɛ́ ɔ wan nɛ́ tu̧u̧-tɛ bii sɛn mgbara o nya-a, ɓɛɛ a̧ tu̧ tɛ o wi yu kii Gasa Wan tu̧u̧ mbɛt.

²²Mɔ nɛ pi̧ nyɛŋɛ tɛ wi-ndak-ɗoŋ-Sɔ̧ nɛ mbea, in gɛnɛ in wisan nɛ yuu kii Gasa Wan.

²³Ɛa wisan nɛ ndak pata heembea tɛ geemɔ, in zɔna wi-de-ɗaŋmɔ, nyɛm sɛnɛ na.

²⁴O wi nɛ‘i zɔn nɛ o gasawi, in wigɔnkita, in be-wan. Mɔ kpɔk, ŋma mgbara wa nɛ gasa gan wi nɛ yú kii Gasa Wan bona.

²⁵Bara nɛ a̧-a̧ nɛ ɗuka-taamɔ tɛ kpa o gee bii nɛ bo nɛ bara na mɛ de tom ha̧ a̧, ɓɛɛ ŋma mɔ nɛ wan-de-taamɔ tɛ ta zu mɔ‘i bona. Dukaa si ɗɔɔ in tɔ̧ɔ̧ kpasawen

²⁶Ká mɛ sú tɛ-mɛ ŋgimbi nɛ mɛ́ dea nɛ tom kɔ-mɛ ɓɛɛ na. Ká mɛ gasi zu-mɛ́ ŋgimbi nɛ ŋma mɔ ɓili mɛ na.

²⁷Gana so wi nɛ de tom, ɓɛɛ nɛ kpaa mɔ nɛ nyɛma a̧, bá nɛ wi-kɔn-ŋguɗi nɛ bo mɔɔ-nyoŋ na.

²⁸Bem kɔ‘m, ká mɛ zɔn tɛ-mɛ yak zale na, mɛ zɔn tɛ-mɛ nyɛm nɛ ɗoŋ tom kɔ-mɛ.

²⁹Nɛ o tɛ ye ɗoŋ wi nɛ de ɗaŋmɔ in tɛ-wi nɛ tɛ-wi o? Nɛ́ o tɛ zɔn wi nɛ fɛŋ zu o?

³⁰Wi nyɛma mɛ gasi wisan wen zu iŋamɔ kɔ̧-a̧, ɓɛɛ wi gasa wanmbɔi wen mbɔi kɔ̧-a̧.

³¹Ɓɛɛ ka'i nɛ gasa ŋma bii zaŋ san, nɛ hee ge a'i tɛ de nɛnɛ́ in a̧ zaŋ kpaamɔ ge? Á̧ ɓɛɛ ka'i nɛ ee a̧ tɛ geemɔ, ŋgimbi n'a̧-a̧ a̧-a̧ nɛ mbɔi, nɛ hee ge a'i tɛ zɔk nɛ a̧ ŋgimbi san ge?