Read Northwest Gbaya SIRAK 11 Bible Online

SIRAK 11 - Northwest Gbaya bible

SIRAK 11

¹Ka’ i zɔ́k nɛ bii nɛ zan gee na Ɗuka-taamɔ ko geɗɛk-wi bá zu-a baa e ŋgɔn, ɓɛɛ dea ha̧ a̧ mɛ duk mgbara o gasawi.

²Ká mɛ zɔn ŋma bii wen zu dee kɔ̧-a̧ na; ká mɛ sɛ́n bii tɛ gee zɔka a̧ nɛ yí na.

³Zi̧-gɔrɔ nɛ geɗɛk mɔ mgbara o mɔ nɛ bú̧i bu̧; mɔ kpɔk, mɔ n'a̧-a̧ de ɔɔ nyɔɔ̧ gan oi mɔ lɛŋ.

⁴Ká mɛ ŋmaŋ tɛ-mɛ wen zu gasa laa nɛ mɛ pi̧ na; wese kpa gasi kɔ-mɛ ká mɛ ŋmaŋ tɛ-mɛ na wen o mɔ nɛ Gasa Wan dea ɔ́ dee nyɛmna, bɛɛ A̧ hu̧si nɛ o bii.

⁵O ŋma ŋgaŋga wan ɔ dɔka tira a nu, ɓɛɛ nɛ wi nɛ‘i ta so mɔ si tɛ a̧ na a̧ hɛra mɛtɛwol-wan.

⁶O ŋgaŋga wi ɔ dɔka tika mbulɛ̀ɛ̀ sɔɔgee, ɓɛɛ o wi nɛ nin húr so nyɛmna tik er gɔni bii.

⁷Nɛti ha̧ mɛ́ mɛ́ dɔk wen a zu bii, mɛ ak mgbara mɔ sɛ́; mɛ ta mɔ nɛ dea nɛti sɛ́ká mɛ tɛ̀ɛ̀ tɔ̧ wen a zu bii.

⁸Ká mɛ kifi nú-wen nɛti nɛ mɛ tɛ zii gba̧a̧ hɔ̧ɔ̧ na na; ká mɛ́ gɔn nú-wen na.

⁹Ká mɛ kpɛr in bii wen zu gɔni wen na; ká mɛ ye biro ko o ɗaŋwi na. Ee ta nɛ Sɔ̧ kpɔk ɓɛɛ

¹⁰Bem kɔ‘m, ká mɛ á naŋ tom ɗulugbuk na, wen ka tom dɔ́k gan zu mɛ́, mɛ beka de hɔ ti na; koo mɛ wara nɛ yi, mɛ beka nɛ́ hɔ́ ti na; bɛɛ yuu mɔ mbɛt beka kpasi mɛ́ na.

¹¹Ŋma bii tɛ de zɔm tom mbɔi nɛ tɛ-wi, nak nɛ tɛ mbɛt, ɓɛɛ kpá ŋma mɔɔ-oi-aa na.

¹²Ŋma wi-ɓɔsa a̧-a̧ sɛnɛ nɛ wi-gbak-a bo na, ŋgai bo ɓɔna, gasa san mbɛt tika zu a̧, ɓɛɛ Gasa Wan zɔka a̧ nɛ de yí, gbó a̧ yinɛ ɗɔɔ san kɔ̧-a̧.

¹³A̧ baa a̧ e ŋgɔn, ɓɛɛ o bii nɛ dɔkaa yá hegɔ ɓeke-yeke gee.

¹⁴O demɔ in ɗaŋmɔ, duka-kpasa in fio, san in kpaamɔ, mɔɔ nɔ‘i lɛŋ tɛ́ nɛ tɛ Gasa Wan.

¹⁷Ha̧-a̧mɔ nɛ ta-tɛ ko Gasa Wan dúk wen o widemɔ nɛ yuwar-a; kɔ̧ɔ̧mɔ kɔ̧-A̧ tɛ mgbɔ wa nɛ de yuwar.

¹⁸Ŋma bii kifi wanmbɔi tɛ kasa zu in tɛ mɔi̧a̧ naŋ-mɔ kɔ‘i, ɓɛɛ mɔɔ-oi-tom kɔ̧-a̧ nɛ mɔ'ɔ:

¹⁹Ŋgimbi n'a̧-a̧ tɔ̧‘e: «Mi kpaa ɔmatɛ kaɗi, kinii mi tɛ nyɔŋ nɛ́ war mgbak mɔ kɔ‘m!» a̧ iŋ oi ŋgimbi dukaa kɔ̧-a̧ na, ɓɛɛ a̧ fea e o mɔɔ nɔ‘i lɛŋ ha̧ o ŋmaa bíí. Deemɔ ko fio

²⁰Mɛ kasi tom kɔ-mɛ nɛ nɔ̧a̧, mɛ há tɛ-mɛ lɛŋ sɛnɛ, mɛ sɔ́k yi-tom kɔ-mɛ.

²¹Ká kii bá mɛ tɛ tom ko wi-de-ɗaŋmɔ na; mɛ e ta-mɛ nɛ Gasa Wan, ɓɛɛ mɛ ha̧ ŋgai tɛ-mɛ lɛŋ tɛ tom kɔ-mɛ siti, wen, há̧ Gasa Wan mɛ ha̧ kɔ‘i mɔ ha̧ wisan nɛ gbaayi'i, dúk nɛ gee yɛkɓɛlɛk mɔ.

²²Mɔɔ-oi-tom ko widemɔ nɛ yuwar-a nɛ toka de yoŋgo ko Gasa Wan, ɓɛɛ mɔɔ-oi toka de yoŋgo'i hɔ́ hee gee gɔma-yí ga.

²³Ká mɛ tɔ̧‘e: «ŋma mɔ n'am kɔ̧ɔ̧, nɛ ge ɓɔ ge? ŋma demɔ nɛ ɓan'am woyo nɛ ge?» na.

²⁴Ká mɛ tɔ̧‘e: «mi a̧-a̧ nɛ mɔ n'am kɔ̧ɔ̧ lɛŋ, ŋma ŋgayamɔ nɛ nyɛma mɛ tik zu'm nɛ ge?» na

²⁵Wese bɔtɛ, ɓɛɛ tɛ-wi bii ɗoŋ bɔnɛ, ɓɛɛ wese bɔnɛ ɓɛɛ tɛ-wi bii ɗoŋ bɔtɛ.

²⁶Wen dúk yɛkɓɛlɛk ha̧ Gasa Wan mɛ kifi er ha̧ koo o nde, wese fio kɔ̧-a̧, nyɛm nɛ ɗoŋ tom kɔ̧-a̧.

²⁷Ɗaŋ ŋgimbi de dee ha̧ tɛ-wi mɛ bi ɗoŋ de-dukaa; ɓɛɛ wi iŋ ndaa bii wese fio kɔ̧-a̧.

²⁸Nɛti ha̧ fio ko bii, ká mɛ́ tɔ̧‘e a̧ nɛ́ wan-desee na, wen nɛ wese fio ko bii a'i iŋ nɛ ti a̧. Kasa zu nɛ wi-ɗaŋ

²⁹Ká mɛ kpɛk ha̧ bii nɛ tum mɛ ye tua kɔ-mɛ na, wen o pɛ́r ko wan-gona-kɔ̧-zaŋ ɔ dɔka.

³⁰See wigɔtɛ dúk hee kɛná nɛ‘i kun wen ɔrá o dokaa’ɛ ga; a̧ zik nɛ mɛ hee wi-pɛm tikaa kɔ-mɛ ga.

³¹A̧ tui pɛ́r kɔ̧-a̧ tɛ kpaia demɔ nɛ ɗaŋmɔ; ŋma dee kpɔk bo yi-a̧ na.

³²Nɛ be mbul-wee a ye gasa wee, ɓɛɛ o pɛ́r ko ɗaŋwi dee ha̧ tɔk mɛ fok a nu.

³³Mɛ hakali tɛ-mɛ nɛ wiɗaŋ wen a̧ bá nɛ keta ɗaŋmɔ, ɓɛɛ a̧ nyɛma mɛ ɗaŋ nin-mɛ ɓɔnsɛnɛ.

³⁴Ka mɛ zir gɛnɛ tɛ ko-mɛ, a̧ tɛ pi̧ wen nu-mɛ, a̧ tɛ ɗaŋ mgbara mɛ in o bii kɔ̧ kira kɔ-mɛ.