Read Northwest Gbaya SIRAK 12 Bible Online

SIRAK 12 - Northwest Gbaya bible

SIRAK 12

¹Kɛ̧ɛ̧ mgbara mɔ wen dee demɔ Ka mɛ nɛ dee demɔ, mɛ iŋ wi nɛ mɛ de demɔ‘i ha̧ a̧‘i, ɓɛɛ mɛ tɛ kpa de zɔnamɔ oi-aa.

²Mɛ de demɔ si tɛ widemɔ nɛ yuwar-a, ɓɛɛ mɛ tɛ kpa mɔɔ-oi-aa; koo mɛ kpa er-a̧ na, mɛ tɛ kpa er Wan-mɛ-ŋgɔn.

³Ŋma de-dukaa bó wen wi nɛ e see tɛ ɗaŋmɔ in nɛ bɛ̧ gbaka bii na.

⁴Mɛ ha̧ mɔ ha̧ widemɔ nɛ yuwar-a, ɓɛɛ ká mɛ́ gbak wi-de-ɗaŋmɔ na ndo-ndo-ndɔ.

⁵Mɛ de demɔ si tɛ geɗɛk bii, ɓɛɛ ká mɛ́ ha̧ ŋma mɔ tikiɗi ha̧ wi nɛ e Sɔ̧ tɛ geemɔ na; mɛ dɔ a̧ nɛ nyɔŋmɔ, ɓɛɛ ká mɛ ha̧ ŋma mɔ ha̧ a̧ na, wen ka a̧ tɛ̀ɛ̀ kpa ŋgai zu mɛ; a̧ tɛ de ɗaŋmɔ in mɛɛ war yiitoo oi demɔ kɔ-mɛ lɛŋ.

⁶Wen Wan-mɛ-ŋgɔn sɛn o wi-de-ɗaŋmɔ, ɓɛɛ A kifa er ha̧ o wi nɛ bɛ̧ɛ̧ A nyɛm nɛ ɗɔŋ mɔ nɛ wa dea.

⁷Mɛ ha̧ mɔ ha̧ dewi, ɓɛɛ ká mɛ gbak wi-de-ɗaŋmɔ na. O de sɛm in o ɗaŋ sɛm

⁸Bo nɛ ŋgimbi bɔtɛ a'i iŋ nɛ ti sɛm na; ŋgimbi bɔnɛ wisɛn husi tɛ na.

⁹Ka ŋma bii duk zaŋ desee, ɓɛɛ see o wisɛn kɔ̧-a̧ tú̧ tu̧u̧; ɓɛɛ ka bɔnɛ hɔ́ zu a, koo mgbak sɛm kɔ̧-a̧ wɛ́r tɛ wɛr nɛ a̧.

¹⁰Ká mɛ há̧ tɛ-mɛ ha̧ wisɛn kɔ-mɛ na, wen ɗáŋ kɔ̧-a̧ dúk hee ndɛrɛ nɛ gbɛɛduamɔ kpee zu-a ga.

¹¹Koo a̧ a gbɛ nɛ tɛ-a si ɗɔɔ, gu nɛ nu nɛ́ nɛ nɔ, mɛ kasi zu-mɛ ɓɛɛ mɛ hakali tɛ-mɛ nɛ a̧. Mɛ dúk kɔ-mɛ wen-aa hee wi-bɛŋ yi darŋgel ga, wen mɛ iŋ‘e a̧ beka ɓɔn nɛ oi gbɛɛduamɔ‘i ɓɔnsɛnɛ na.

¹²Ká mɛ e a̧ ka tɛ-mɛ na, wen ka a̧ tɛ̀ɛ̀ ir mɛ pi nu, mɛ ba fara kɔ-mɛ. Ká mɛ e ha̧ a̧ dúk nu nɛ war wii-er-mɛ na, wen ká a̧ tɛ̀ɛ̀ de sunu kiti ko-mɛ. Nɛ́ nɛ ɗoŋ a mɛ tɛ iŋ nde mi tɔ̧ɔ̧ so nɛ kpasawen, bɛɛ mɛ tɛ̀ɛ̀ ta mɔ wen nɛ mɛ zii so nú‘m na.

¹³Nɛ o a tɛ de kó ha̧ wi-ɔr-gɔk nɛ gɔk nyɔŋga, in o wi nɛ nɛ́ si ka̧ tɛ bokónam o?

¹⁴Nɛ hegɔ mbɛt a wi nɛ gbam in wi-de-ɗaŋmɔ, ɓɛɛ nɛ pi̧ tɛ tɛ́ o ɗaŋmɔ kɔ̧-a̧ dúk nɛnɛ.

¹⁵A̧ dúk karkoro tikiɗi in mɛ; mɔ kpɔk, ka mɛ si tara-ta-tara mɛ yo nù, nɛ hi̧i̧ a tɛ usi mgbak dukaa kɔ̧-a̧ ha̧ mɛ.

¹⁶Wisɛn a̧-a̧ nɛ nyɔɔ̧-wen sɛn ndaranú, ɓɛɛ nɛ kɔ see-a, a̧ kii mɛ ir nɛ mɛ́ pi kɔ́ kɔ̧. Miikɔ̧a̧ nyɛma mɛ hɔ ɗɔɔ yí-wisɛn; ká̧ a̧ nɛ kpa ŋma be yuwar, ɓɛɛ tɔk tɛ-mɛ nɛ oi-aa lɛŋ beka ba hiɗ‘a na.

¹⁷Ka ŋma ŋgayamɔ kpa mɛ́, nɛ a̧ a tɛ hɔ fara-a ti ha̧ mɛ; A̧ tɛ de hee a̧ gbak nɛ mɛ ga, ɓɛɛ a̧ tɛ̀ɛ̀ pi̧ naŋ sara ku-mɛ.

¹⁸A̧ tɛ mi̧i̧ zu a, a̧ tɛ mbɛr er-a, a̧ tɛ zɛkɛɗi mɛ, ɓɛɛ a̧ usa mgbak dukaa kɔ̧-a̧ ha̧ mɛ.