Read Northwest Gbaya SIRAK 13 Bible Online

SIRAK 13 - Northwest Gbaya bible

SIRAK 13

¹O pɛ́r ko wanmbɔi-ŋmaŋtɛ Wi nɛ fo sɔ̧ɔ̧-te, a̧ nɛ ŋdiŋ tɛ; wi nɛ ndaɗi in wigɔtɛ tɛ́ kifi hee a̧ ga.

²Ká mɛ bá tui nɛ dita gan zu-mɛ na, ɓɛɛ ká mɛ gbam in wi nɛ gana mɛ́ nɛ ŋgai koo nɛ mbɔi na. Nɛ hee ge a kpana-gii in kpana-boe tɛ nɛ́ nɛ nɔ kpɔk in ŋmaa ge? ka wa tó tɛ-wa nɛ ŋmaa, ɓɛɛ ɓiaa gbaa.

³Wanmbɔi de gɔɔmɔ kaɗi, ɓɛɛ tɛ̀ɛ̀ kpá tu̧u̧see woyo. Ka'i de wen wén zu gɔɔmɔ in wisan, ɓɛɛ nɛ a̧ a tɛ̀ɛ̀ gɔm gɔma er-a woyo.

⁴Ka mɛ nɛ boo nɛ wi-de-gba̧a̧-mɔ a̧ tɛ kii yuwar wen zɔɓa mɛ, ka san ba mɛ, ɓɛɛ a̧ siŋa mɛ pi nu.

⁵Ka mɛ bo nɛ kpaamɔ, a̧ tɛ ndaɗi mɛ, a̧ tɛ nyɔŋ mɛ gu nu, ŋma wen kɔ̧-a̧ bona.

⁶Ka a̧ nɛ boo nɛ haazi kɔ-mɛ, a̧ tɛ ɔr mɛ́, a̧ tɛ mam be mami in mɛ́ɛ̀, ɓɛɛ a̧ tɔ̧ɔ̧ ŋma nyɔɔ̧ wen-e-ta ha̧ mɛ; a̧ tɛ tɔ̧ de wen ha̧ mɛ, ɓɛɛ a̧ aka mɛ‘e: «Mɛ kɔ̧ɔ̧ am gbak mɛ nɛ ge?»

⁷A̧ tɛ pi foe tɛ-mɛ tɛ saa mɛ dɔ̧ɔ̧dɔ̧ɔ̧ mɛ de dina in a̧, ɗaŋ nɛ mɔ er-mɛ gán gan war yiitoo koo war taar, ɓɛɛ sɔŋkur-aa a̧ tɛ̀ɛ̀ zɛkɛɗi nɛ mɛ. Hɔɗoŋ-aa, ka a zɔk mɛ, ɓɛɛ a̧ ee mɛ tɛ geemɔ mi̧i̧ nɛ zu-a tɛ wen kɔ-mɛ.

⁸Mɛ hakali zu-mɛ ka̧ bii tɛ̀ɛ̀ ɔr mɛ, ɓɛɛ ká mɔɔ-mgbele kɔ-mɛ tɛ̀ɛ̀ pi foe tɛ-mɛ. Kasa zu nɛ o gasawi

⁹Ka ŋma gasawi sa mɛ, mɛ mgbe zer-mɛ; a̧ tɛ a sara ha̧ mɛ woyo.

¹⁰Ká mɛ nak tɛ-mɛ si ti na, wen ká wa tɛ̀ɛ̀ ndak mɛ, ɓɛɛ ká mɛ yor nɛ ɗoŋ batɛ na, wen ká tɛ-wa bi ɗon mɛ.

¹¹Ká mɛ de ha̧ mɛ mɛ tɔ̧ wen nyɛm ŋmaa in a̧ na, ɓɛɛ ká mɛ e tɛ-mɛ tɛ zɔm doka wen kɔ̧-a̧ na, wen nɛ wee mɛ a a̧ we tɛ tɔ̧ɔ̧ zɔm dɔka wen'i. A̧ a mam mami si tɛ-mɛ‘i, tam nɛ zaŋ-mɛ.

¹²Wi nɛ kasi wen kɔ-mɛ kɔ zaŋ na, bo nɛ kó na; a̧ nyɛm mɛ fo ŋma ŋgaŋga mɔ, koo zɔɓɔ yinɛ zu mɛ na.

¹³Mɛ kaŋ tɛ-mɛ, ɓɛɛ mɛ kasi zu-mɛ, wen mɛ gbam kpɔk in mɔ nɛ tɛ yo mɛ nɛ nu. Wanmbɔi in wisan

¹⁵Mɔ nɛ ɔm ɔm lɛŋ kɔ̧ɔ̧ ŋmaa in wan nɛ hɔɔ ŋmaa in a, ɓɛɛ bii kɔ̧ɔ̧ nɛ ŋma wi

¹⁶Mɔ nɛ ɔm ɔm lɛŋ ndaɗi ŋmaa nɛ zuduka-a, ɓɛɛ bii ndaɗi ŋmaa in wi nɛ hɔɔ ŋmaa in a̧.

¹⁷Nɛ hee ge a gbɔ́ò in be-sami tɛ zii nɛ ŋmaa ge? Nɛ hegɔ a wi-de-ɗaŋmɔ in widemɔ nɛ yuwar-a ya nɛnɛ.

¹⁸Nɛ ge ga̧a̧mɔ ge a nyɛma mɛ duk mgbara ɓoŋgo in toyo ge? Ɓɛɛ nɛ ge ga̧a̧mɔ ge a nyɛma mɛ duk mgbara wanmbɔi in wisan ge?

¹⁹O tuifu-zaŋbɛɛ nɛ ya ŋga gbara nɛ kpoo ko o dila; hegɔ mbɛt o wisan nɛ nyɔŋmɔ ko o wanmbɔi.

²⁰Wi-ŋmaŋ-tɛ sɛna dukaa si ɗɔɔ; hegɔ mbɛt wanmbɔi sɛna wisan.

²¹Ka ŋma wanmbɔi de mɛ yo nu, nɛ o sɛm kɔ̧-a̧ a tɔn a̧ e ŋgɔn; ɓɛɛ ka wisan yo nu, ɓɛɛ o sɛm kɔ̧-a̧ bɛ̧ɛ̧ a̧.

²²Ka ŋma wanmbɔi yɔkaya, ɓɛɛ o bii gár gar tɛnɛ nɛ dɔkaa mɛ gbak a̧. Ka a̧ tɔ̧ ŋma ɓɔɗɔ́k-wen, ɓɛɛ wa kɔ̧ɔ̧ ɗɔɔ nú-a. Ka wisan yɔ kaya, bii lɛŋ dɔ́k nɛ wen a zu a; ka a̧ tɔ̧ ŋma wen nɛ a̧-a̧ nɛ yuwar-a, ŋma bii pi nú sɛnɛ na.

²³Ka ŋma wanmbɔi tɔ̧ wen, ɓɛɛ bii lɛŋ yaa nɛ oi-nú zɔn nɛ wen kɔ̧-a̧ ɓɛɛ. Ka ŋma wisan tɔ̧ wen, ɓɛɛ wa aka mɔ‘e: «ɛ̧ɛ̧ nɛ ɔ?» Ɓɛɛ ka a to naŋ-a nɛ mɔ, ɓɛɛ wa tɛ̀ɛ̀ sɔmgbi nɛ a̧ mɛ yo nu

²⁴Mbɔi ɔ dee ka ŋma ɗaŋmɔ a boo zu a na; ɓɛɛ tɛ tɔ̧ɔ̧ wen ko wi nɛ iŋ Sɔ̧ na, san nɛ ɗaŋmɔ.

²⁵Nɛ mɔ nɛ a̧-a̧ kɔ see-bii a kpai saŋayi-a̧, koo nɛ dea, koo nɛ ɗaŋa.

²⁶Nu-wi nɛ gɔn mami’ɛ usi'e see-wi ɔ dee, ɓɛɛ kpaa o tua-wen ak nɛ zɔm gasa taamɔ.