Read Northwest Gbaya SIRAK 14 Bible Online

SIRAK 14 - Northwest Gbaya bible

SIRAK 14

¹Desee ko widemɔ nɛ yuwar-a Wi nɛ ŋma ɗaŋ wen gbo nɛ nú-a, ka de ká see gɔna wen zu yɔɔkaya kɔ‘i na a dúk nɛ desee.

²Wi nɛ see ŋman zu ŋma mɔ na, ɓɛɛ nɛ mɔ n'a̧-a̧ e nɛ ta-a̧ lɛŋ hɔ nɛ gba̧a̧ a dúk nɛ desee. Aa-see-mɔ in wɔmɔ

³Mbɔi bá nɛ wan-ŋga-er na. Ŋma mɔɔ-oi kpaa dɔka mbɔi ko wan-ŋga-er, nɛ́ ge?

⁴Wi, nɛ mɔi̧ mbɔi, ɔ nɛ wɔ ka a̧, mɔi̧ mbɔi'i ha̧ ŋma bii nɛtɛ. O ŋma bii tɛ kpa kɔ‘i de dukaa wen zu mbɔi kɔ̧-a̧.

⁵Ka ŋma bii a dee ŋga er wen a̧ nɛ tɛ-a, ɓɛɛ a̧ tɛ mɔk er-a si tɛ o? A̧ beka iŋ gee iŋa bɔtɛ́ mbɔi kɔ̧-a̧ na.

⁶Ŋma mɔ nɛ ɗaŋa gan wi nɛ e tɛ tɛ́ bɔnɛ bona: mɔɔ oi ɗaŋ kɔ̧-a̧ a'i.

⁷Koo a̧ de nɛ ŋma demɔ, bó nɛ a̧ a kɔ̧ɔ̧ na, ɓɛɛ sɔŋkur-aa ɗaŋ kɔ̧-a̧ tɛ gbo.

⁸Wi-aa-see-mɔ nɛ wɛr si mgbaar e nɛ o bii tɛ geemɔ‘i nɛ ɗaŋ bii.

⁹Mɔ ko wi-aa-see-mɔ lɛŋ súr yi-a na, ɗaŋ wɔmɔ kor nɛ yisee-a.

¹⁰Wan-ŋga-ér kɛ̧ nyɔŋmɔ in bii na, ɓɛɛ a̧ kpa gee wan n'a̧-a̧ tɛ nyɔŋ na mbɛt. Kasa mbɔi nɛ yuwar-a

¹¹Bem kɔ‘m, mɛ hakali tɛ-mɛ nɛ dea, nyɛm nɛ ɗoŋ kpaamɔ kɔ-mɛ, ɓɛɛ mɛ ha̧ nɛ mɔ nɛ nyɛma yi Gasa Wan ha̧ A̧.

¹²Tɛ-mɛ a mbaŋ‘e ɗoŋ fio nyɛi na, ɓɛɛ wa tɛ tɔ̧ ŋgimbi-a ha̧ mɛ na.

¹³Nɛti ha̧ mɛ mɛ fe, mɛ de demɔ in sɛm kɔ-mɛ, ɓɛɛ mɛ ha̧ mɔ ha̧ a̧ nɛ dɔkaa, nyɛm nɛ ɗoŋ kpaamɔ kɔ-mɛ.

¹⁴Ká mɛ e ha̧ ŋma desee tikiɗi mɛ nyaŋ mɛ na; ká mɛ e ha̧ ŋma mɔ nɛ mɛ de wɔ-a nɛ yuwar-a mɛ tik nu sɔɔgee na.

¹⁵Mɛ beka e mɔɔ-oi-bɔnɛ kɔ-mɛ ha̧ o ŋma bii na nde? koo o ŋma bii beka bi mɔɔ-oi-mbɔyaa kɔ-mɛ nɛ mbaɗi na nde?

¹⁶Mɛ ha̧ mɔ ha̧ bii, mɛ kpɛk mɔ er bii, ɓɛɛ mɛ ba ɗaŋsee kɔ-mɛ pi taŋ, wen bo nɛ sɛn ye ko o fio a mɛ tɛ kpa desee sɛnɛ na.

¹⁷Mɔ nɛ yá kpasa lɛŋ ɓúk ɓuk hee laa ga; nɛ heembea nɛ dúk wen ɓɔnsɛnɛ: «Mɛ tɛ fe kana»

¹⁸Zɔ́k da̧-a̧ wa̧a̧te: o ŋma a ai'i, o ŋma ɓɔ́ kɔ‘i'i. Nɛ hegɔ mbɛt a kpar-bii dúk nɛnɛ: o ŋma a fe'i, ko-aa a ko ko'i'i.

¹⁹Mɔ nɛ mbɔ́r mbɔr lɛŋ yak yak, ɓɛɛ wi-dea yak yak in wa mbɛt. Desee ko wan-ɗuka-taamɔ

²⁰Wi nɛ hɛr tɛ nɛ ɗuka-taamɔ, ɓɛɛ nɛ ba nɛ́ iŋa-mgbara-mɔ kɔ‘i ta nɛ mɔ,

²¹in nɛ ta mɔ kɔ see-wi zu o yuwar ko ɗuka-taamɔ, kii nɛ ndaa hu̧sa̧mɔ kɔ̧-a̧, a dúk nɛ desee.

²²A̧ war yi ɗoŋ a̧, hee widegia ga, a̧ yor nɛ gia sɛn yi-doe kɔ̧-a̧.

²³A̧ zɔk nɛ mɔ nɛ toro-tua kɔ̧-a̧: a̧ yéŋ nɛ zer-a ka nutua kɔ̧-a̧.

²⁴A̧ ɔ mgbak ka tua kɔ̧-a̧; a̧ zu̧u̧ mbiŋ tua-laa kɔ̧-a̧ sɛn zaŋ ŋgeŋ-tua.

²⁵A̧ dee tua-laa kɔ̧-a̧ sɛn mgbak ka tɛ-a, ɓɛɛ a̧ ɔ́ sɛn de fara-bɔtɛ‘i.

²⁶A̧ á o bem kɔ̧-a̧ sɛn ti ɗɔɔ ɓaa-a̧, ɓɛɛ a̧ ɔɔ sɛn ɗɔɔ gbaa-er-a.

²⁷Nɛ ɗuka-taamɔ a kpe zu-a wen gbɛŋmɔ, ɓɛɛ a̧ baa a̧ e zaŋ gasamɔ kɔ̧-a̧.