Read Northwest Gbaya SIRAK 15 Bible Online

SIRAK 15 - Northwest Gbaya bible

SIRAK 15

¹Mɔɔ-oi-tom ko widemɔ nɛ yuwar-a Wi nɛ yu kii Gasa Wan de nɛ mɔ nɛ wara. Wi nɛ ha̧ tɛ ha̧ heembea tɛ kpa ɗuka-taamɔ.

²Ɗukataamɔ tɛ we ti a hee naawanbem ga; a̧ tɛ kpɛk a̧, hee be-zɔŋa nɛ tɛ iŋ tɛ hɔ na ga n'aa ba nɛ koo

³a̧ tɛ ha̧ iŋa-mgbara-mɔ ha̧ a̧ mɛ nyɔŋ, in yì ɗuka-taamɔ ha̧ a̧ mɛ nɔ.

⁴A̧ tɛ ɛk tɛ-a nɛ ɗuka-taamɔ‘i; a̧ beka pi liki-liki na; a̧ tɛ hɛr tɛ-a̧ nɛ a̧, ɓɛɛ foe beka de a̧ na.

⁵A̧ tɛ de ha̧ a̧ mɛ gasi gan o wi nɛ a̧-a̧ in a̧; a̧ tɛ hu̧i̧ nú-a mɛ tɔ̧ wen sɛn mgbara gii bii.

⁶Desee in nyɛŋɛ tɛ kpe zu-a hee mɛtɛwol-wan ga; nin-a tɛ hur kpoo nɛ kpoo.

⁷Ɓɛɛ o mgbelewi beka kpa a̧ na; o ɗaŋwi beka zɔk a̧ na ndo-ndo-ndo.

⁸A̧ yór nyɛi nɛ o wi-ŋman-tɛ; tɛ o windela beka mbaŋ ɗoŋ a̧ na.

⁹Gasa Sɔ̧ bá nɛ nú-wi-de-ɗaŋmɔ na, wen gasa Sɔ̧‘i tɛ nɛ tɛ Gasa Wan na.

¹⁰Nɛ ɗuka-taamɔ a de ha̧‘i mɛ gasi Sɔ̧, ɓɛɛ nɛ Gasa Wan a ha̧ ha̧taamɔ gasá Sɔ̧‘i ha̧‘i. Koo o nde tɛ we ɗoŋ tom kɔ‘i

¹¹Ká mɛ tɔ̧‘e «Nɛ Gasa Wan a dea ha̧‘m mɛ de ɗaŋmɔ» na, wen mɔ n'A̧a̧ sɛna A̧ de na mbɛt

¹²Ká mɛ tɔ̧‘e «Nɛ a̧, nɛ zu-A̧, a dee ha̧‘m mɛ yɔ kaya» na, wen ŋma mɔ kɔ-A̧ nɛ wi-de-ɗaŋmɔ bo na.

¹³Gasa Wan sɛna kɔ‘i o ɗaŋmɔ lɛŋ, ɓɛɛ o wi nɛ yu kii A̧ sɛna ɗaŋmɔ mbɛt.

¹⁴Nɛ A̧, nɛ zu-A̧, a dee bii dika tɛ ku̧u̧naŋ fara mɛ; ɓɛɛ A̧ e ha̧ bii mɛ demɔ nɛ see hoka.

¹⁵Ka mɛ nɛ kɔ̧a, mɛ nyɛma mɛ kasi o heembea: mboo zu ha̧ a̧, nɛ mɔ nɛ zɔ́k mɛ.

¹⁶A̧ baa wee in yi e ti mɛ: mɛ nyɛma mɛ nyɛi er-mɛ zú wan nɛ mɛ hoka.

¹⁷Gasa Wan ee duka-kpasa in fio ti o bii: koo o nde tɛ kpa nɛ mɔ n'a̧-a̧ hoka.

¹⁸Wen ɗuka-taamɔ ko Gasa Wan ɔ́ gasá; A̧ a̧-a̧ nɛ ŋgai, A̧ kpaa ŋgayamɔ lɛŋ, ɓɛɛ A̧ zɔk mɔ lɛŋ.

¹⁹Zɔkamɔ kɔ-A̧ nɛ́ si tɛ o wi nɛ yú kii A̧; A̧, nɛ zu-A̧, iŋa dee-mɔ ko o bii lɛŋ.

²⁰A̧ há̧ nú ha̧ ŋma bii mɛ duk ɗaŋwi na; A̧ há̧ yuwar ha̧ ŋma bii mɛ de ɗaŋmɔ na.