Read Northwest Gbaya SIRAK 16 Bible Online

SIRAK 16 - Northwest Gbaya bible

SIRAK 16

¹Foma wi-de-ɗaŋmɔ Ká mɛ de wo gii-bem nɛ dé gba̧a̧mɔ na ná; ká mɛ de nyɛŋɛ tɛ o bem nɛ iŋ Sɔ̧ na na.

²Koo nɛ oi dɔkaa kɔ-wa'i, ka wa nɛ yuu kii Gasa Wan na, ɓɛs ká mɛ de nyɛŋɛ tɛ wa na.

³Ká mɛ ta'e zɛ-wa tɛ dɔk zaŋnu na, ká mɛ e ta-mɛ nɛ zɔm gíí wa'i na; wen gana so bem kpɔk bá nɛ bem booro, ɓɛɛ gana so koo bem na fé nɛnɛ, bá nɛ koo o bem nɛ iŋ Sɔ̧ na.

⁴Wi-iŋ-mgbara-mɔ kpɔk nyɛma dea ha̧ ye mɛ gasi; mɔ kpɔk, kpar o wi nɛ iŋ Sɔ̧ na tɛ tir a nu.

⁵Mi zɔka o ŋma pɛrti mɔ'ɔ nɔ‘i nɛ dɔkaa, nɛ gba̧a̧yí‘m, ɓɛɛ mi zii nyɛrɛ o ŋma nɛ ɗaŋá ɗaŋ gan, nɛ zer-am.

⁶Wee tika zu o giiwi-de-ɗaŋmɔ, nyimsea ko Sɔ̧ kura zu dukbii-de-ŋgazu.

⁷A̧ e ɗaŋmɔ ha̧ o kuti ŋgaŋa wi nɛ dea so ŋgazu wen zú ŋgai kɔ-wa’ɛ na.

⁸A̧ e ye nɛ Lɔt ɔɔ so sɛnɛ na mbɛt, wen A̧ sɛna so gɔɔtɛ ko o wi-saaye'i.

⁹A̧ de ko ha̧ zudukbii nɛ duka so dɔ̧ɔ̧ in fio, ɓɛɛ nɛ kuma wen zu ɗaŋmɔ kɔ-wa'i, na mbɛt.

¹⁰Koo ha̧ o wibiro booro gɔmŋmaa-mɔɔrɔ-ɗoŋ-kpɔk nɛ mɔi̧a̧ so ŋmaa tɛ ŋgasee kɔ-wa’ɛ na mbɛt.

¹¹Ɓɛɛ ban nɛ bo so nɛ bii kpɔk a̧ dee so ŋgazu, ɓɛɛ nɛ mɔ'ɔ nɛ‘i usi bɔnɛ ha̧ a̧ na wo, tɛɛ yek nɛ bii, wen deako in nyimsea a̧-a̧ tɛ Gasa Wan. A̧ a̧-a̧ nɛ ŋgai wen ea ɗaŋmɔ, bɛɛ A̧ nyɛma mɛ usi nyimsea mbɛt.

¹²Nɛ́ hee mɔ nɛ deako kɔ̧-A̧ ɔ́ nɛnɛ gasá ga, a kita kɔ̧-A̧ ŋgai nɛnɛ mbɛt. A̧ gɔn kita zu o bii nyɛm nɛ ɗoŋ tom kɔ-wa.

¹³Ɗaŋwi beka yú mɔ yak nɛ oi mɔɔ-zu̧zu̧ kɔ‘i na, ɓɛɛ munyal ko widedemɔ beka tik nu gee na.

¹⁴Demɔ nɛ‘i de si tɛ bii lɛŋ, wi tɛ kpa mɔɔ-oi-aa, ɓɛɛ koo o nde tɛ kpa mɔ nyɛm nɛ ɗoŋ tom kɔ‘i. Nɛ mbetɛ, bii tɛ kpa mɔɔ-oi-tom kɔ‘i

¹⁷Ká mɛ tɔ̧‘e: «Mi tɛ hu̧si tɛ‘m nɛ Gasa Wan. Nɛ tɛ́ o a̧ tɛ mbaŋ ɗoŋ am sɛn ŋgɔn mɛ o? Ŋma bii nɛ tɛ iŋ kɔ‘i yí‘m sɛn mgbara giiwi bo na. Mi nɛ ŋma ge mɔ ge sɛn mgbara zɔm mɔ nɛ Sɔ̧ dea’ɛ ge?

¹⁸Wen, kóó nɛ yizan, in o mɔ nɛ a̧-a̧ zu a nɛ ŋgɔn mɛ lɛŋ, kóó o ɗuka ndaa gbatɔp, in nu lɛŋ, nak nak, ŋgimbi nɛ Gasa Wan tɛ-mɛ zɔk nɛ wa.

¹⁹O kaya in o gun-nu nak nàk, ŋgimbi nɛ Gasa Wan zɔ́k mɔ si tɛ wa.

²⁰Ɓɛɛ wi ta gee taamɔ zú mɔ'ɔ nɔ‘i na. Wi nɛ kii mɛ iŋ yuwar deemɔ ko Gasa Wan, nɛ o nde?

²¹Hee mɔ nɛ‘i iŋ ŋgimbi tɛaa ko gbabúk ga na, nɛ́ hegɔ mbɛt a̧ dɔka deemɔ kɔ̧-A̧ yá nɛnɛ nɛ hu̧sa̧a̧ yí bii.

²²Nɛ́ o'o a̧ tɔ̧ wen deemɔ kɔ̧-A̧ nɛ yuwar-a o? Nɛ́ o'o a̧ zɛm wa o? Ɗoŋ Nɔ̧ɔ̧-tɔk ɔ́ kɔ‘i nyɛia.

²³Nɛ́ hegɔ a̧ wi, nɛ zu bo na, tá nɛ mɔ. Mgbelewi in wi nɛ yɔɔkaya tá nɛ o mgbelemɔ ɓɛɛ. Yiitoo usamɔ Ɗuka-taamɔ ko Sɔ̧ zu o mɔ n'A̧a̧ dea

²⁴Bem kɔ‘m, mɛ zii nu'm, ɓɛɛ mɛ kpa iŋamɔ; mɛ é see-mɛ lɛŋ tɛ o wen n'am tɛ tɔ̧.

²⁵Mi tɛ usi ɗoŋ mɔ ha̧ mɛ mɔktɛ mɔktɛ, ɓɛɛ mi tɛ usi mɔ ha̧ mɛ nɛ sa̧-a̧.

²⁶Tɛ ku̧u̧naŋ-a, ŋgimbi nɛ Gasa Wan dea nɛ o mɔ kɔ‘i, tɛ dea wa'i a̧ kɛ̧ɛ̧ wa a nɛtɛ nɛtɛ.

²⁷A̧ aa o mɔ n'A̧a̧ dea nɛ yuwar-a wen yaa kpoo nɛ kpoo, dika tɛ ku̧u̧naŋ-a yak nɛnɛ sɔ̧ɔ̧i̧. Wa iŋ wɔ na, tɛ-wa mbɛt mbɔi na, wa siŋ tom kɔ-wa pi nu na.

²⁸Ŋma nɛ to ŋmaa in ɓii-aa bo na; wa bɛ̧ wen nú-A̧ na ndo ndo ndo.

²⁹Hɔɗoŋ-aa, Gasa Wan zɔka mɔ si tɛ nu, ɓɛɛ dún a̧ nɛ o demɔ kɔ‘i.

³⁰A̧ kpee zu nu nɛ o mɔ nɛ yá kpasa nɛtɛ nɛtɛ, bɛɛ nɛ́ tɛ nu'i a̧ wa tɛ́ si ɗoŋ sɛnɛ.