Read Northwest Gbaya SIRAK 17 Bible Online

SIRAK 17 - Northwest Gbaya bible

SIRAK 17

¹Gasa Wan dee bii nɛ nu, ɓɛɛ fo a̧ si nɛ ɗoŋ tɛ nu'i woyo.

²A̧ gɔna zɛ in ŋgimbi dukaa zaŋnu ha̧ o bii. A̧ dea ha̧ wa mɛ ɔ wan zu o mɔɔ-zaŋnu.

³A̧ ha̧ŋgai ha̧ wa, hee kɔ̧-A̧ nɛ tɛ-A̧ ga; A̧ dee wa hɔ́ ŋmaa in A̧.

⁴A̧ dea ha̧ o mɔ nɛ yá kpasa lɛŋ mɛ yu wa, wen ha̧ wa mɛ ɔ wan zu o saɗi zaŋbɛ̀ɛ̀ in o nɔi̧.

⁶A̧ ha̧kɛ̧ɛ̧-mgbara-mɔ, leɓe-tɔ̧-wen, o gba̧a̧yí-zɔk-mɔ, o zer-zii-mɔ, in see wen taa mɔ ha̧ wa mbɛt.

⁷A̧ duna wa nɛ iŋamɔ in iŋa-mgbara-mɔ. A̧ usa mɔ nɛ ɔ dee in wan nɛ de na ha̧ wa.

⁸A̧ ea sa̧a̧mɔ kɔ̧-A̧ sɛn kɔ see-wa, wen usa gasi ko o mɔ n'A̧a̧ dea lɛŋ ha̧ wa,

¹⁰wa tɛ zɔn sa̧-a̧ nin-A̧ wen ɓáá nyɛrɛ gasi ko o mɔ n'A̧a̧ dea. Nɔɔtɔk in Heembea

¹¹A̧ ha̧iŋamɔ ha̧ wa mbɛt, ɓɛɛ A̧ ha̧heembea duka-kpasa ha̧ wa sɔɔgee.

¹²A̧ dee nɔɔtɔk kpoo nɛ kpoo in wa, A̧ usa o gɛŋa kɔ̧-A̧ ha̧ wa.

¹³Gba̧a̧yi-wa zɔka zɔm gasamɔ kɔ̧-A̧, zer-wa zia ŋga tiger-A̧.

¹⁴A̧ tɔ̧a̧ ha̧ wa'e: «Ɛnɛ kási zu-‘nɛ́ nɛ o gɔɔmɔ lɛŋ», bɛɛ A̧ ha̧heembea ha̧ wa kpɔk kpɔk wen zu yaa kɔ-wa in o ŋmaa. Ŋma mɔ yak yi Gasa Wan na

¹⁵O yuwar deemɔ kɔ-wa yá kɔ‘i ti A̧ ŋgimbi lɛŋ, wa beka yak yi-A̧ na.

¹⁷A̧ hoka wan wen zuduk kpɔk kpɔk, ɓɛɛ Israɛl dúk nɛ́ war ko Gasa Wan.

¹⁹Mɔ nɛ wa de lɛŋ yá ti A̧, hee wese ga; yi-A̧ dúk tɛ naŋanɔ kɔ-wa ŋgimbi lɛŋ.

²⁰O gɔɔmɔ kɔ-wa husi yi-A̧ na; o ɗaŋmɔ kɔ-wa lɛŋ a̧-a̧ ti Gasa Wan.

²²Dee demɔ si tɛ bii dúk yi Gasa Wan, hee tumbal nɛ‘i e zu kalata’ɛ ga; A̧ zɔ́k demɔ ko bii, hee tu̧-gba̧a̧yi-A̧ ga.

²³Sɔŋkur-a A̧ tɛ kur, ɓɛɛ A̧ ha mɔɔ-oi-tom kɔ-wa ha̧ wa, A̧ tɛ e mɔɔ-oi-tom kɔ-wa sɛn zu wa kpɔk kpɔk.

²⁴A̧ hui yuwar piaɗoŋ tɛ A̧ hui ha̧ o wi nɛ kɔ̧ɔ̧ mɛ kpai sɛ, A̧ ha̧ nɔɔŋgiɗi ha̧ o wi nɛ bó nɛnɛ na. Saa sara wen kifa see

²⁵Mɛ pii ɗoŋ tɛ Gasa Wan, ɓɛɛ mɛ e ɗaŋmɔ dúk, mɛ ai nú ha̧ A̧ ɓɛɛ hegɔ mɛ kaŋ nú ɗaŋmɔ kɔ-mɛ.

²⁶Mɛ pii ɗoŋ tɛ Wan mɛ ŋgɔn, ɓɛɛ mɛ zik ɗoŋ-mɛ ha̧ gɔɔmɔ, mɛ sɛ́n ɗaŋmɔ pi-er-mɛ tɛ wee.

²⁷Nɛ́ o'o a̧ tɛ gasi Wan-mɛ-ŋgɔn sɛn ye ko o fio, oi nu o wi nɛ ya kpasa zɔn nɛ A̧, o?

²⁸Ŋgimbi nɛ bii fe, ɓɛɛ n'a̧-a̧ bo zaŋnu ɓɔna, ɓɛɛ zɔna Sɔ̧ bó ɓɔna mbɛt; nɛ́ ŋgimbi n'a̧-a̧ dúk nɛ kpasa in nɛ hayatɛ, a̧ a nyɛma mɛ zɔn nɛ Gasa Wan.

²⁹Oe gee gasa deako ko Gasa Wan in ea-ɗaŋmɔ kɔ̧-A̧ ha̧ bii nɛ zik tɛ si tɛ A̧, wa!

³⁰Bíí bo nɛ ŋgai mɛ demɔ lɛŋ na, wen bezaŋ-bii dúk kpasa ɓɔnsɛnɛ na.

³¹Ŋma mɔ nɛ tɔ́ka gan wese nɛ́ gé? Zua'i bó, a̧ bi bii ŋma ŋgimbi. Ka bo bɔ nɛ bii nɛ wa dee nɛ mur in tɔk ndé, a a̧-a̧ nɛ wɔ ɗaŋmɔ.

³²Sɔ̧ pɛ́m o gii-mɔɔ-yizan pɛm, ɓɛɛ o bii bó nɛ́ gee fuunu in bùk sɔɔgee.