Read Northwest Gbaya SIRAK 18 Bible Online

SIRAK 18 - Northwest Gbaya bible

SIRAK 18

¹Gasi ko Sɔ̧ Nɛ́ wi nɛ dúk kpasa kpoo nɛ kpoo a̧ dea mɔ lɛŋ war kpɔk

²Ɓaa wi nɛ‘i nyɛma mɛ tɔ̧‘e nɛ́ widemɔ nɛ yuwar-a, nɛ́ Gasa Wan kpɔk ɓɛɛ.

⁴A̧ ee war ha̧ ŋma bii kpɔk mɛ tɔ̧ mɔ n'A̧a̧ dea na. Nɛ́ o a̧ tɛ iŋ nda gasamɔ kɔ̧-A̧, o?

⁵Nɛ́ o a̧ tɛ we zɔm ŋgai-wan kɔ̧-A̧, o? Wi nɛ tɛ tɔ̧ nyɛrɛ gasa deako kɔ̧-A̧, nɛ́ o?

⁶Wi nyɛm mɛ fo ŋma mɔ sɛnɛ yinɛ, kóó ee ŋma mɔ zu-a na. Wi nyɛm mɛ kpa ndaa gasamɔ ko Gasa Wan na.

⁷Nɛ́ ŋgimbi nɛ bii tɔ̧‘e wi iŋa kaɗi wó, nɛ́ hi̧i̧ á̧‘a̧ a̧ kú̧ nɛ naŋ-a; ɓɛɛ ka a̧ yɔr, a̧ dúk ndeeŋ gee. Gee tum-mɔ ko bii

⁸Bíí nɛ́ ge? Tom kɔ̧-a̧ nɛ́ ge? Demɔ, kóó ɗaŋmɔ n'a̧-a̧ de'i usi hee gé?

⁹Ka a̧ kpa pɛ gɔmŋma zaŋnu, ɓɛɛ dɔka nyɛmna.

¹⁰O be pɛ nɔ‘i dúk kɔ‘i hee gee be huia kɛɗɛŋ-yi-gbatɔp in gba̧a̧ zarande sɛn ti mɔ nɛ duk ɓɔnsɛnɛ ga.

¹¹Nɛ́ mɔ‘i a̧ de ha̧ Gasa Wan mɛ duk nɛ munyal in o bii, dé nɛ kó ha̧ wa'i.

¹²A̧ zɔka ɓɛɛ A̧ iŋ mbɛt hee mɔ nɛ bɔnɛ tɛ ba nɛ tɛ-wa sɔŋkur ŋgimbi ga; nɛ́ mɔ‘i a̧ de ha̧ ea-ɗaŋmɔ kɔ̧-A̧ mɛ dɔk nɛnɛ siti'i.

¹³Bíí a̧-a̧ nɛ kó wen ŋma wi, ɓɛɛ Gasa Wan a̧-a̧ nɛ kó wen o mɔ n'A̧a̧ dea lɛŋ. A̧ zɔk mgbara mɔ nɛ ɔ dee in wan nɛ de na, ɓɛɛ A̧ usa yuwar dea ha̧ wa, A̧ usa mɔ ha̧ wa, A̧ mɔi̧ wa a kpɔk fara, hee mɔ nɛ wi-dai-mɔ de nɛnɛ in mɔdai kɔ‘i nɛ pɛsa’ɛ ga.

¹⁴A̧ de kó ha̧ o wi nɛ zii wen nu-A̧, in nɛ demɔ nyɛm ɗoŋ ha̧a̧nu kɔ̧-A̧ nɛ haya. Yuwar ha̧mɔ

¹⁵Bem kɔ‘m, ŋgimbi nɛ mɛ ha̧ mɔ, ká mɛ ku̧i̧ mɔ nɗoŋ a na, kóó tɔ̧ɔ̧ wen-ziimɔ zu a̧ na.

¹⁶Bo nɛ mbɛŋ ga̧ gbɛŋmɔ ga̧-a̧ na ndé? Hegɔ mbɛt, tɔ̧ɔ̧ de wen nyɛma mɛ gan ha̧mɔ ha̧ bii.

¹⁷Bo nɛ de wen gana gasa ha̧a̧mɔ nɛ ta-tɛ na nde? Kpasa widedemɔ gbár wa gbar nu ŋmaa.

¹⁸Mgbelewi dɔ́k kɔ‘i nɛ wen sɔɔgee; ha̧a̧mɔ ko wan-ŋga-er de ha̧ mi̧i̧kɔ̧a̧ mɛ ai yí-wi. Dee taamɔ zu mɔ nɛ tɛ hɔ

¹⁹Mɛ ak ndaa mɔ, sɛka mɛ tɔ̧ɔ̧ wen; ɓɛɛ mɛ kii nyina tɛ-mɛ, nɛti ha̧ mɛ́ mɛ́ ɔ zɛ́ɛ́

²⁰Mɛ gɔn kita zu mɛ nɛ tɛ-mɛ, nɛti ha̧ Sɔ̧ mɛ gɔn kita zu mɛ, ka de ká mɛ kpaa ea-ɗaŋmɔ ŋgimbi n'A̧a̧ tɛ́ tɛ.

²¹Mɛ iŋ yɔɔkaya kɔ-mɛ, nɛti ha̧ zɛ́ɛ́ mɛ ba mɛ; ŋgimbi nɛ mɛ de ɗaŋmɔ, mɛ usi'e mɛ kii nɛ yuwar kpaia dukaa kɔ-mɛ.

²²Mɔ nɛ mɛ kanamɔ zu-a, mɛ dé mɔ‘i ŋgimbi-a ŋgaɓo; ká mɛ zɛm wese fio, sɛka mɛ deemɔ‘i na.

²³Nɛti ha̧ mɛ mɛ ha̧ nu-mɛ ha̧ Sɔ̧, mɛ ta mɔ nɛ dea sɛ́; ká mɛ dúk hee bii nɛ we Gasa Wan ga na.

²⁴Tɛ-mɛ a mbaŋ ɗoŋ nyimsea nɛ tɛ tik nu sɔŋkur ŋgimbi, in bɔnɛ nɛ tɛ hɔ ŋgimbi nɛ Gasa Wan tɛ zik nɛ ɗoŋ ha̧ mɛ́.

²⁵Ŋgimbi nɛ nyɔŋmɔ yá lata-lata, tɛ-mɛ a mbaŋ ɗoŋ ŋgimbi kaɓá; ŋgimbi kpaamɔ, tɛ-mɛ a mbaŋ ɗoŋ kɔsá in ɓanamɔ.

²⁶Dika gɔna-ndaazan hɔ nɛnɛ ga̧a̧mɔ, mɔ kpai kpai: mɔ yak yak nɛ haya ti Gasa Wan.

²⁷Wan-ɗuka-taamɔ dúk zu-naŋ tɛ mɔ lɛŋ; ŋgimbi nɛ ɗaŋmɔ bá nu, a̧ de yɔkɔrɔ mɔ na.

²⁸Bíí nɛ a̧-a̧ nɛ zu iŋa ti ɗuka-taamɔ, ɓɛɛ a̧ zɔn wi nɛ kpaa ɗuka-taamɔ‘i zɔn.

²⁹Wen ko wi-iŋ-mgbara-mɔ usi nɛ ɗuka-taamɔ kɔ-wa; wa tɔ̧ o de ɗuka tua-wen kɔ-wa, hee aia ko koro ga. Kasa zu

³⁰Ká mɛ e tɛ-mɛ mɛ demɔ lɛŋ nɛ see-mɛ kɔ̧a na, mɛ dór tɛ-mɛ tɛ wɔmɔ kɔ-mɛ.

³¹Ka mɛ demɔ lɛŋ nɛ see-mɛ de wɔ-a, o wisɛn kɔ-mɛ tɛ zɛkɛɗi mɛ.

³²Ká mɛ e desee kɔ-mɛ wen dea yaka-yi-mɔ na, ká bɔnɛ tɛɛ tik zu mɛ oi-aa.

³³Ká mɛ pi̧ san zu mɛ tɛ dea gbaŋá nɛ gɔni sede na; zu-a'i, mɛ iŋa'e kóó dala bo kɔ ziɓa kɔ-mɛ na.