Read Northwest Gbaya SIRAK 19 Bible Online

SIRAK 19 - Northwest Gbaya bible

SIRAK 19

¹Widetom-gbɛ-dɔ̧ɔ̧ beka kpa mbɔi na; wi nɛ bá o geɗɛk mɔ e tɛ geemɔ tɛ tik mbulɛɛ sɔɔgee.

²Dɔ̧ɔ̧ in okóò nɛ mɔ nɛ de ha̧ o wi nɛ a̧-a̧ nɛ zu mɛ yɔ. Wi nɛ ndaɗi in okóò-de-mɔ nɛ mbɔɗɔnu kifi nɛ gee-tum bii.

³Mɔɔ-oi tum-tom kɔ̧-a̧‘i nɛ́ mbɔra in dɔk; foi kɔ̧-a̧ tɛ de ha̧ a̧ mɛ yɔ. Mɔɔ-oi burá-wen

⁴Wi nɛ kpɛk mɔ nɛ wa tɔ̧ ha̧ a̧ beebee bó nɛ kpasa taamɔ na. Wi nɛ de ɗaŋmɔ bá nɛ bɔnɛ pi zu nɛ ta-tɛ.

⁵Wi nɛ ha̧ tɛ tɛ́ dea ɗaŋmɔ, kita tɛ tik a̧.

⁶Wi nɛ sɛ́n bura-wen gbo nɛ zu tɛ ɗaŋmɔ.

⁷Ká mɛ dali ŋma wen nɛ mɛ zia na; hegɔ, wen beka tik zu mɛ na.

⁸Kóó nɛ sɛm kɔ-mɛ, kóó nɛ wisɛn kɔ-mɛ mbɛt, ká mɛ tɔ̧ kɔ-mɛ ŋma wen kɔ̧-a̧ na, ka mɛ nɛ iŋa'e dukaa kɔ-mɛ nɛ oi-nú beka de ŋma mɔ na,

⁹Wen a̧ tɛ zii wen nɛ gbo nɛ nu-mɛ, ɓɛɛ a̧ beka kpɛk nɛ dea na, sɔŋkur-aa a̧ sɛna mɛ.

¹⁰Mɛ nɛ zia ŋma wen, nɛ mɛ fe nɛ oi-aa. Ká mɛ de kii na, ŋma mɔ de mɛ bo na.

¹¹Ŋma be wen tikiɗi, ɓɛɛ pi̧i̧ nyimmɔ tɛ mgbelewi, hee okóò nɛ zaŋ nyim wen koa bem’ɛ ga.

¹²Wen dúk kɔ̧ zaŋ mgbelewi hee góò a zu̧u̧ tɛ mur ku-a ga. Wi ak ndaa mɔ sɛka'i kɛ̧ɛ̧ mgbara-a

¹³Mɛ ak sɛm kɔ-mɛ sɛ́, ŋmafara a̧ de ŋma mɔ na. Ka a̧ nɛ dea, a̧ beka de ɓɔna.

¹⁴Mɛ ak ŋma-mɛ sɛ́, ŋmafara a̧ tɔ̧ wen'i na; ka a̧ nɛ tɔ̧a̧, a̧ beka tɔ̧ ɓɔna.

¹⁵Mɛ ak sɛm kɔ-mɛ sɛ́, wen ndela nɛ́ gba̧‘a̧ mɔ; ká mɛ ndak pata wen lɛŋ nɛ bii tɔ̧ na.

¹⁶Bó nɛ bii a kɔ̧ mɛ tir yɔɔmɔ na; ŋma bii nɛ tɛ yɔ kɔ‘i kaya nú na, nɛ́ o?

¹⁷Mɛ ak sɛm kɔ-mɛ, sɛka mɛ ɓila a̧, ɓɛɛ é ha̧ heembea ko Wan-mɛ-ŋgɔn de tom kɔ‘i. Kpasa ɗuka-taamɔ in fio-a

²⁰Kpasa ɗuka-taamɔ nɛ́ yuu kii Gasa Wan; ɗuka-taamɔ nɛ́ kpɔk in kasa heembea.

²²Ɓɛɛ iŋa yuwar dee ɗaŋmɔ bó nɛ ŋma ɗuka taamɔ na.; Hakala zu-wi mbɛt bó nɛ zia mbɔrɔ ko o wi-de-ɗaŋmɔ na.

²³Ŋma yuwar iŋa-dee-mɔ a̧-a̧ sɛnɛ nɛ dúk nɛ mɔɔ-nyɛr. Wi nɛ bó nɛ ɗuka-taamɔ na bó nɛ zu na.

²⁴Gana so wi nɛ bó nɛ iŋamɔ dɔk na, ɓɛɛ nɛ yú kii Gasa Wan, bá nɛ wi nɛ iŋa deemɔ lɛŋ, ɓɛɛ nɛ gbin heembea.

²⁵Ŋma mgbak iŋa deemɔ a̧-a̧ sɛnɛ nɛ nyɛma mɛ ir bii si tɛ gɔɔmɔ; ɓɛɛ o ŋma bii de kɔ‘i gɔɔmɔ wen usa'e kpasawen nɛ kɔ‘i.

²⁶Ŋma bii nɛ́ nɔ zum nɛ zu, kai nɛ sɔnti wen zu ɗaŋmɔ kɔ‘i, ɓɛɛ nɛ kɔ̧ zaŋ-a̧ a ɔ kɔ‘i gɔna.

²⁷A̧ hu̧si saŋayi-a ɓɛɛ a̧ kifa wan-mgbee-zer; ka'i e yi-wi si tɛ a̧ ɓɔna, ɓɛɛ a̧ kpaa ŋgai zu mɛ.

²⁸Ŋma bii de kɔ‘i ɗaŋmɔ na, wen nɛ ŋgai-a bo na; ka a̧ kpa be yuwar-a, ɓɛɛ a̧ de a.

²⁹Wi tɛ iŋ ti bii tɛ zɔka a̧; nɛ́ tɛ saŋayi a'i iŋ nɛ ti wi nɛ a̧-a̧ nɛ zu.

³⁰Nɛ́ tɛ pii laa, in mami, in naŋanɔ kɔ̧-a̧ a'i iŋ nɛ dukaa kɔ̧-a̧.