Read Northwest Gbaya SIRAK 2 Bible Online

SIRAK 2 - Northwest Gbaya bible

SIRAK 2

¹Yuu kii Sɔ̧ zaŋ weamɔ Bem kɔ‘m, ka mɛ nɛ kɔ̧a̧ mɛ de tom ha̧ Gasa Wan, nɛ mɛ ɗafi tɛ-mɛ pɛm nɛ weamɔ.

²Mɛ ɗafi see-mɛ nɛ tanaa, ɓɛɛ mɛ nɔ̧́ ŋgiɗi. Ká mɛ sakali zu-mɛ́ ŋgimbi ditasee na.

³Mɛ ndaɗi in A̧; ká mɛ ár tɛ-mɛ nɛ A̧ na, hegɔ mɛ tɛ kpa gasi tɛ sɔŋkur ŋgimbi.

⁴Mɛ kpɛk mɔ lɛŋ nɛ tɛ hɔ zu-mɛ. Mɛ dúk nɛ munyal tɛ ŋga mɔ nɛ tɛ tik zu mɛ.

⁵Wen nɛ yí wee a'i we nɛ lɔr sɛnɛ, ɓɛɛ wi wee o wi nɛ Sɔ̧ hoka sɛn yí wee-bɔnɛ.

⁶Mɛ e kɔ̧ɗɔa ha̧ Sɔ̧, ɓɛɛ A̧ tɛ gbak mɛ; mɛ bá nɛ tana war, ɓɛɛ mɛ e ta-mɛ nɛ A̧.

⁷Ɛ́nɛ́ o wi nɛ yu kii Gasa Wan’ɛ, ɛnɛ pɛm deako kɔ̧-A̧; k’ɛ́nɛ́ ar na, wen k’ɛ́nɛ́ tɛɛ tik.

⁸Ɛ́nɛ́ o wi nɛ yu kii Gasa Wan’ɛ, Ɛnɛ e ta'nɛ́ nɛ A̧, ɓɛɛ mɔɔ-oi-tom'i beka ɓan'nɛ́ na.

⁹Ɛ́nɛ́ o wi nɛ yu kii Gasa Wan’ɛ, ɛnɛ zɛm o zɔm demɔ, in desee nɛ beka kaɗi na ɓɔnsɛnɛ in deako kɔ̧-A̧.

¹⁰Ɛnɛ zɔk mɔ si sɛn tɛ o kuti bii ɓeemɛ: ŋma wi nɛ ee ta nɛ Gasa Wan, ɓɛɛ ka̧ búù bá nɛ o? Wi nɛ hɛra tɛ nɛ yu kii Gasa Wan, ɓɛɛ ka̧ Gasa Wan siŋ a̧ pi nu, nɛ́ o? Wi nɛ kɔfa A̧, ɓɛɛ ká A̧ e a̧ tɛ geemɔ, nɛ o?

¹¹Wen Gasa Wan nɛ wi-kɛ̧-bɔnɛ in bii, in wi-de-ko. A̧ e ɗaŋmɔ ee, ɓɛɛ A̧ kpasa bii ŋgimbi ditasee mbɛt.

¹²Bonɛ a̧-a̧ zu o wi nɛ see nɔ̧ na, o wi nɛ gba̧a̧ er bona, bonɛ a̧-a̧ zu o ɗaŋwi nɛ a̧-a̧ nɛ see yiitoo.

¹³Bɔnɛ a̧-a̧ zu wi nɛ bó nɛ nɔɔŋgiɗi na, nɛ ee-ta mbɛt bo na. A̧ beka kpa wi-ye-ɗoŋ‘a̧ na.

¹⁴Bɔnɛ a̧-a̧ zu'nɛ́, n’Ɛ́nɛ́ bo nɛ nyɔŋa-nin ɓɔna’ɛ. Ɛnɛ tɛ de hee ge, ŋgimbi nɛ Gasa Wan tɛ tɛɛ zɔk nɛ ɛ́nɛ́ ge?

¹⁵O wi nɛ yú kii Gasa Wan bɛ̧ wen nu-A̧ na ndo-ndo-ndo; o wi nɛ kɔ̧ɔ̧ A̧, ndak nɛ pata yuwar kɔ̧-A̧.

¹⁶O wi nɛ yu kii Gasa Wan kii mɛ de nɛ́ mɔ nɛ ɔ́ dee tɛ-A̧. Nyɔŋmɔ ko o wi nɛ kɔ̧ɔ̧ A̧, nɛ heembea kɔ̧-A̧

¹⁷See o wi nɛ yú kii Gasa Wan dúk nɛ ɓadaa ɓɔnsɛnɛ. Wa dúk si ɗɔɔ ti A̧, ɓɛɛ wa tɔ̧a̧:

¹⁸«Gana so tika kɔ̧ er Gasa Wan, ɓa nɛ kɔ̧ er gee bii; deako kɔ̧-A̧ nyɛma ŋma in gasi kɔ̧-A̧.