Read Northwest Gbaya SIRAK 20 Bible Online

SIRAK 20 - Northwest Gbaya bible

SIRAK 20

¹Ŋgimbi tɔ̧ɔ̧ wen in ŋgimbi dukaa nɛ oi-nú Ŋma dɔka-wen a zu bii a̧-a̧ sɛnɛ nɛ de na, ɓɛɛ dukaa nɛ oi-nú usi ndé wi a̧-a̧ nɛ zu.

²Gana so tɔ̧ɔ̧ wen a zu bii, bá nɛ guu nú zu tu̧u̧see kɔ‘i.

³Ɓɛɛ wi nɛ kɔ̧ɔ̧ɗɔɔ ɗaŋmɔ kɔ‘i tɛ gbo ɗɔɔ bɔnɛ.

⁴Wi nɛ kɔ̧ɔ̧ mɛ de yuwar-mɔ nɛ ŋgai hɔɔ ŋmaa in wan-fee-bɔr nɛ gbɛŋ tɛ-mɛ ɗaŋ be-zɔŋa.

⁵Nɛ́ bii nɛ dúk nɛ oi-nú a'i bá nɛ́ wan-ɗuka-taamɔ; o bii kɔ̧ wi-dɔk-wen na.

⁶Ŋma bii dúk kɔ‘i nɛ oi-nú, wen n'aa bó nɛ ŋma mɔ mɛ tɔ̧ na; ŋma bii woyo kpe kɔ‘i nú, wen n'a̧-a̧ iŋa de ŋgimbi-tɔ̧-wen.

⁷Wan ɗuka-taamɔ dúk kana nɛ oi-nú hɔ tɛ de ŋgimbi, ɓɛɛ o wi-ŋmaŋ-tɛ in mgbelewi tɔ̧ kɔ‘i nɛ nú tum.

⁸Wi nɛ dɔ́k wen dak nɛ sɛnmɔ pi zu, ɓɛɛ wa kɔ̧ wi nɛ dúk tɛ tɛ́ wen na. O sakalamɔ

⁹Ŋma ŋgimbi, bɔnɛ gbak bii gbaki, ɓɛɛ ŋma ŋgimbi de sɔnti pi̧ bɔnɛ pi zu wi mbɛt.

¹⁰Ŋma ha̧a̧mɔ nɛ beka gbak mɛ na a̧-a̧ sɛnɛ; mbɛt ɓɔ, ŋma ha̧a̧mɔ nɛ nyɛma mɛ gbak mɛ war yiitoo gan kuti-a a̧-a̧ sɛnɛ.

¹¹Zɔna mɛ nɛ wa zɔn nyɛma mɛ de ha̧ mɛ mɛ dúk si ɗɔɔ, ɓɛɛ dúka si dɔ̧ɔ kɔ-mɛ nyɛma mɛ ba mɛ e ŋgɔn

¹²Ŋma bii hi̧fi̧ zɔm mɔ nɛ be sede tikiɗi; zua'i ɓɛɛ a̧ tɛɛ yoɓi sede'i war mɔɔrɔ-ɗoŋ-yiitoo woyo gán gan.

¹³Nɛ́ gee tɔ̧ɔ̧-wen tikiɗi ko wan-ɗuka-taamɔ a de ha̧ o bii mɛ kɔ̧ a̧, ɓɛɛ tɔ̧ɔ̧ mɔka de wen ko mgbelewi nɛ tom takaɗi.

¹⁴Ha̧-a̧mɔ ko mgbelewi beka gbak mɛ na, koo tikiɗi, wen gba̧a̧yi-a zɛm nɛ wan nɛ mɛ tɛ ha̧ ha̧ a̧ gan kɔ̧-a̧‘i.

¹⁵A̧ ha̧ mɔ tikiɗi, ɓɛɛ a̧ tɛɛ tɔ̧ wen gan zu a, a̧ ɓá nu-a̧ ɓoŋgoloo hee nú wi-he-mbea ga; a̧ ha̧ mɔ sɔsɔɔ, ɓɛɛ a̧ tɛɛ ak mɛ sa̧a̧mɔ; bii kɔ̧ pɛrti wi nɔ‘i na.

¹⁶Mgbelewi tɔ̧‘e ndé; «Mi bó nɛ sɛm na, ɓɛɛ ŋma wi-iŋ demɔ kɔ‘m mbɛt bo na», o wi nɛ nyɔŋ mɔ kɔ̧-a̧ nɛ́ o wan-ɗaŋ-nú.

¹⁷Bíí nɛ dɔkaa zɛkɛɗi nɛ a̧ dɔ̧ɔ̧dɔ̧ɔ̧. Tɔ̧ɔ̧ wen nɛ yuwar-a

¹⁸Gana so tóò naŋ nɛ ta, bá nɛ yɔɔ kaya wen; tikaa ko wi-ɗaŋ hó yekseɗe mbɛt.

¹⁹Bíí nɛ iŋ mgbara mɔ na dúk hee ŋma nyɛrɛ nɛ‘i íŋ ndaa na, ɓɛɛ nɛ gbó nɛ nú o mgbelewi ɓɔnsɛnɛ ga.

²⁰Wi kpɛk tua-wen nɛ gbó nɛ kɔ̧ nu-mgbelewi na, wen n'aa tɔ̧ a̧ nyɛm nɛ ŋgimbi-a na.

²¹San dor o ŋma bii dór tɛ dee ɗaŋmɔ, ɓɛɛ ka ŋgimbi ɔmtɛ kɔ-wa hɔ́, ŋma mɔ kpɔk nɛ wa tá bó na

²²O ŋma bii a̧-a̧ sɛnɛ nɛ yɔ́ wen zu foe nɛ de wa yí mgbelewi.

²³O ŋma bii a̧-a̧ sɛnɛ nɛ há nú ha̧ sɛm kɔ‘i wen zu foe dak nɛ sɛ́n pi zu sɔɔgee. Ndela

²⁴Ndela nɛ gasa mɔɔ-ndiŋ tɛ bii. Ndela'i gbó nɛ kɔ̧ nú o wi nɛ iŋ mɔ na ɓɔnsɛnɛ.

²⁵Gana so wi-zu̧zu̧ bá nɛ gasa wi-ndela; mɔ kpɔk, wa yiitoo'i lɛŋ tɛ tik.

²⁶Naŋanɔ ko wi-ndela pi nɛ búù zu a, ɓɛɛ foi-aa dúk zu a ɓɔnsɛnɛ. Demɔ ko ɗuka-taamɔ

²⁷Nɛ́ be mɔ tikiɗi a ir wan-ɗuka-taamɔ siti, ɓɛɛ wi nɛ a̧-a̧ nɛ zu ɔ dee yi o gasawi.

²⁸Wi nɛ wá fɔ kusi nɛ tua alkamaari kɔ‘i siti, ɓɛɛ wi nɛ ɔ dee yi o gasawi tɛ kpa ea-ɗaŋmɔ wen zu gɔɔmɔ kɔ̧-a̧.

²⁹Ha̧-a̧mɔ nɛ ti-fu̧i in ha̧a̧mɔ nɛ ta-tɛ bom nɛ yi wan-ɗuka-taamɔ, ɓɛɛ mɔ‘i dór nɛ wi tɛ tɔ̧ɔ̧ ɗaŋ wen hee kana nɛ‘i pi ndara-nu'i ga

³⁰Ɗuka-taamɔ nɛ dúk nɛ hu̧sa̧a̧ in mbɔi nɛ‘i guna ɗɔɔ nu de nɛ ge?

³¹Gana so wi nɛ hu̧si̧ mɔɔ-boko kɔ‘i bá nɛ wi nɛ hu̧si̧ ɗuka-taamɔ kɔ‘i.