Read Northwest Gbaya SIRAK 21 Bible Online

SIRAK 21 - Northwest Gbaya bible

SIRAK 21

¹Yúú Ɗaŋmɔ Bem kɔ‘m, mɛ dea ɗaŋmɔ? Ká mɛ de mbea na, ɓɛɛ mɛ kɔfi Sɔ̧ ha̧ e ɗaŋmɔ kɔ-mɛ ha̧ mɛ.

²Mɛ yu mɔ ti ɗaŋmɔ, hee mɔ nɛ mɛ yú nɛ mɔ ti gɔk’ɛ ga, wen ka mɛ ndaɗi pii ka tɛ-a, a̧ tɛ nyɔŋ mɛ; gba̧a̧nin-a dúk hee gba̧a̧nin-dila nɛ gbá bii’ɛ ga.

³Gbina heembea dúk hee tɔ̧́ɔ̧́-nú gbapaa nɛ nu-a yiitoo ga; da̧i̧ n'aa e tɛ wi bó nɛ nyina-a na.

⁴Dee ŋgayamɔ in gɔɔtɛ nɛ o mɔɔ-yai-kpaamɔ: nɛ hegɔ mbɛt a tua ko wigɔtɛ tɛ́ yai nɛ́nɛ.

⁵Kɔ́famɔ ko wisan ye yee zer Sɔ̧, ɓɛɛ ahai A̧ deemɔ n'a̧-a̧ kɔ̧a̧ ha̧ a̧.

⁶Wi nɛ sɛ́n dɔka wen a zu-wi ndak nɛ pata wi-de-ɗaŋmɔ, ɓɛɛ wi nɛ yu kii Gasa Wan kpai nɛ dukaa kɔ̧‘i sɛn kɔ see.

⁷Bíí iŋa wi-tɔ̧ yɔka-wen dam fara lɛŋ, ɓɛɛ wan-de-taamɔ iŋa yɔɔkaya kɔ̧-a̧.

⁸Wi nɛ de tua nɛ gɔni sede dúk hee a̧ kai nɛ ta mbo nɛ pɛsi-fio kɔ̧-a̧ ga.

⁹Mɔ̧i̧a̧ ko o wi nɛ iŋ Sɔ̧ na dúk hee hɛra yuɗu ga; sɔŋkur mɔ ko-wa nɛ bia wee ɓɛɛ.

¹⁰Yuwar ko o ɗaŋwi mboɗa kpɔk, ta bó sɛnɛ na, nduti-a nɛ ɗuká kɔ̧fio. Wan-ɗuka-taamɔ in mgbelewi

¹¹Wi nɛ ndak pata heembea ɔ́ nɛ wan zu wɔmɔ kɔ‘i, ɓɛɛ sɔŋkur yuu kii Gasa Wan nɛ ɗuka-taamɔ.

¹²Wi nɛ iŋ yuwar deemɔ na beka yambi mɔ na, ɓɛɛ ŋma iŋa yuwar deemɔ a̧-a̧ sɛnɛ mbɛt nɛ kaɗi nɛ ɗaŋa.

¹³Iŋamɔ ko wan-ɗuka-taamɔ ndɔr ndɔr hee ha̧a̧yi ga, ɓɛɛ tɔ̧ɔ̧-mbɔrɔ kɔ̧-a̧ dúk hee kpuput yi duká-kpasa ga.

¹⁴See-mgbelewi dúk hee gbaa kpana ga, a̧ nyɛm mɛ kasi mɔ n'a̧-a̧ yambi na.

¹⁵Ka wi-iŋmɔ zii ŋma wen ɗuka-taamɔ, a̧ kpɛ́k kpɛk nɛ dea, ɓɛɛ a̧ kia mɛ tɔ̧ tɔ̧ɔ̧ gan zú i̧i̧ woyo; ka wi-de-ɗaŋmɔ zii wen'i, de tɛ-a na, ɓɛɛ a̧ siŋa pi̧ nɛ kɔ́r-zu-a.

¹⁶Nyɛrɛ ko wi-bɔkɔ dúk hee dita tui-nɛ́-gɛnɛ ga; ɓɛɛ nɛ ko wi-iŋmɔ, ndara-nú-a̧ lɛŋ nɛ gee nyɔɔ̧-wen.

¹⁷Sɛn mgbara gii bii, wi kii mɛ zii nɛ wen ko hayawi, ɓɛɛ wi taa mɔ zu wen'i sɛn kɔ̧ see-wi.

¹⁸Ɗuka-taamɔ dúk yi mgbelewi hee gee gboŋkoloŋ tua ga, ɓɛɛ iŋamɔ ko wi-ɓɔkɔ nɛ gee wɔkɔlɔ́-wɔkɔlɔ́ wen.

¹⁹Heembea dúk kɔ‘i yi mgbelewi hee poka-naŋ in aŋko-er ga.

²⁰Wi-bɔkɔ mam kɔ‘i mami nɛ hee gɛr bɛɛ hayawi ku̧í kɔ‘i ku̧i̧ nɛ hu̧sa̧a̧.

²¹Heembea dúk yi hayawi hee ŋma wele-lɔr in kaná pi ɓaa-mɛ-wiiko ga.

²²Mgbelewi ye kɔ‘i tua ndurr, bɛɛ widemɔ nɛ yuwar-a yee kɔ‘i nɛ hɔn.

²³Mgbelewi dúk nɛ nutua guɗi nɛ mɔ si kɔ tua, ɓɛɛ kóó wi-iŋ-mgbara-mɔ, a̧ yor kɔ̧-a̧ nɛ zan.

²⁴Dukaa sɛn ka nutua yéŋ nɛ zer nɛ́ tom ko wi nɛ iŋ mgbara mɔ na, ɓɛɛ mɔ‘i pi nɛ foe tɛ wi-iŋ-mgbar-mɔ.

²⁵Ndara-nú o wi-dɔk-wen dali nɛ kpɔk mɔ nɛ o ŋma bii tɔ̧ɔ̧ kaɗi, ɓɛɛ wi-iŋ-mɔ wɛ́k kɔ‘i wen kɔ‘i wɛk sɛ́.

²⁶Taamɔ ko o wi-bɔkɔ dúk kɔ‘i kɔ̧ nu-wa, ɓɛɛ nú o wan-ɗuka-taamɔ dúk kɔ‘i kɔ̧ see-wa.

²⁷Ka wi nɛ iŋ Sɔ̧ na fóm wisɛn kɔ‘i, a̧ fóm nɛ zu-a nɛ zu-a woyo.

²⁸Wi-tɔ̧ ɗaŋ wen tɛ bii, a̧ nɛ ndiŋ tɛ, ɓɛɛ o wi nɛ yá ka tɛ a lɛŋ sɛ́n nɛ a̧.