Read Northwest Gbaya SIRAK 22 Bible Online

SIRAK 22 - Northwest Gbaya bible

SIRAK 22

¹Wi-tɛɛri Wi-tɛɛri hɔɔ ŋmaa in ta nɛ ɗɔr kpee ɗoŋ-aa; kóó o nde a nɛ sáp wen nɛ́ mɔɔ-nyɛr.

²Wi-tɛɛri hɔ̧ɔ̧ ŋmaa in kina-ɗɔr: wi nɛ tam lɛŋ ŋmasi nɛ er.

³Duká dáà o ɗaŋ bem, nɛ mɔɔ-foe, ɓɛɛ koa be-okóò mbɛt nɛ́ mɔɔ-wen.

⁴Bokobem nɛ a̧-a̧ nɛ iŋa-mgbara-mɔ tɛ kpa wii; nɛ ko wan nɛ de nɛ́ mɔɔ-búù‘i há̧ nɛ ditasee ha̧ wi nɛ koo a̧.

⁵Bokobem nɛ foe bo yi na pi̧ nɛ búù zu dáà in wii kɔ̧‘i; hegɔ wa nɔ‘i yiitoo'i lɛŋ tɛ e a̧ tɛ geemɔ.

⁶Dɔka wen nɛ nyɛm sɛnɛ na dúk hee ŋma gima-nyɛŋɛ ŋgimbi fio ga; ɓɛɛ nyasi in mbɛri mbɛt gbak gbak ŋgimbi lɛŋ. Kpaia dukaa ko wi-bɔkɔ ɔ́ ŋgayá

⁹Usa mɔ ha̧ wi-bɔkɔ dúk hee latá gbaa dak nú-ŋmaa ga, dúk hee tuna wi o mgbelɛ-yá ga mbɛt.

¹⁰Tɔ̧ɔ̧ wen si tɛ wi-bɔkɔ nyɛma ŋmaa in tɔ̧ɔ̧ wen in wi-zur-ya: tɛ sɔŋkur mɔ, a̧ tɛ tɔ̧‘e: «Nɛ́ ge boo ge?»

¹¹Mɛ hi̧i̧ kɔ̧a̧ wi nɛ fea wen n'a̧-a̧ ee sa̧a̧mɔ dúk. Mɛ hi̧i̧ kɔ̧a̧ wi-bɔkɔ mbɛt wen zu a bó ɓɔna. Ká mɛ hi̧i̧ kɔ̧a̧ wi nɛ fea gan na, wen a̧ kpaa nɛ ɔmatɛ, ɓɛɛ duká-kpasá ko wi-bɔkɔ ɗaŋa gan fio.

¹²Zɛ hi̧a̧ fio nɛ mɔɔrɔ-ɗoŋ-yiitoo; nɛ hi̧a̧ wi-bɔkɔ in wi nɛ yú Gasa Wan na, kana nɛ wese lɛŋ nɛ wa ɓɔna nɛ kpasa kaŋ.

¹³Ká mɛ tɔ̧ wen nɛ dɔkaa in mgbelewi na, ká mɛ gbam in wi nɛ iŋ mgbara mɔ na na; ká mɛ hɛr tɛ-mɛ nɛ a̧ na, wen ká sakalamɔ tɛɛ tik zu mɛ, ɓɛɛ ká ndiŋ a tɛ-mɛ, ŋgimbi n'a̧-a̧ ŋmasi tɛ-a̧. Ka mɛ nɛ kɔ̧a̧ mɛ duk kedéŋ, nɛ mɛ gbo wen kɔ̧-a̧, wen ká mɔɔ-mgbele kɔ̧-a̧‘i tɛɛ sakali mɛ.

¹⁴Ŋma mɔ nɛ dita gan sɔ̧ɔ̧-bɔi nɛ́ ge? Ŋma nin nɛ‘i tɛ sa nɛ a̧ yak zu wi-bɔkɔ‘i nɛ́ ge?

¹⁵Nyɛmɛ, tɔ̧́ŋ in mboɗa boi ya kɛ́ŋfɛ́yɛ́ŋ gan tuia wi nɛ bo nɛ zu na.

¹⁶Nakanu nyɛm mɛ yai te-ba-gɛr-tua nɛ‘i saŋa nɛ dea na; hegɔ mbɛt, wi nɛ taa mɔ nɛ dea, ɓɛɛ nɛ ee see mɛ de ŋma mɔ kɔ‘i beka siŋ mɔ‘i pi nu ŋgimbi ŋgayamɔ na.

¹⁷Ŋma hɛra-nú nɛ dúk zu de taamɔ dúk nɛ dea hee ŋma ŋgeraa dikira ŋgeŋ-tua ga.

¹⁸O be ta nɛ‘i aa zu kusa garo nyɛm mɛ yor ti búk na; hegɔ mbɛt, see wi-kii nɛ tá nɛ mɔɔ-bɔkɔ beka yor ti ŋma mɔɔ-kii na. Kasa sɛm

¹⁹Ka'i mbɛr gbaayi-wi, ɓɛɛ miikɔ̧a̧ hɔɔ sɛnɛ; ɓɛɛ ka'i mbɛr yi-see-wi, ɓɛɛ wi foo o taamɔ a ŋgɔn.

²⁰Wi nɛ pi̧ ta si tɛ o nɔi̧ pɛsi nɛ wa; wi nɛ dɔk wen a zu sɛm kɔ‘i ɗáŋ nɛ yuwar sɛm'i.

²¹Ka mɛ nɛ daka gbapaa si tɛ sɛm kɔ-mɛ, ká mɛ ta mɔ gan na; ɛ́nɛ́ nyɛma mɛ ɗafi mgbara ŋmaa woyo.

²²Ka mɛ nɛ ɗaŋa ŋmaa in sɛm kɔ-mɛ, ká mɛ yu ŋma mɔ na; yuwar ɗafa ŋmaa k’ɛ́nɛ́ a̧-a̧ sɛnɛ; mɔ kpɔk, daa dara, ee wen kɔ̧ zaŋ na, aa bii tɛ geemɔ, ará naŋ ŋma wi, nɛ́ o mɔɔ-pɛsi-sɛm ka tɛ wi.

²³Mɛ de há̧ see-sɛm kɔ-mɛ mɛ́ bá mɛ ŋgimbi n'a̧-a̧ a̧-a̧ zaŋ san, ka de ká mɛ nyɔŋa bɔtɛ in a̧, ŋgimbi n'a̧-a̧ tɛ kpa nɛ mbɔi. Mɛ ndak in a̧, ŋgimbi bɔnɛ, ka de ká mɛ kɛ̧ɛ̧ mɔɔ-oi kɔ̧-a̧ kpɔk in a̧.

²⁴Nɛ́ hee mɔ'ɔ nɛ gbɛŋmɔ in ziwee yak nɛnɛ ti ha̧ wee ga, a o dara yak nɛnɛ ti ha̧ tɔk.

²⁵Foe beka de'm tɛ gɔna zu sɛm kɔ‘m na, ɓɛɛ mi beka husi tɛ‘m yi-a̧ na mbɛt,

²⁶ɓɛɛ ka ŋma ɗaŋmɔ kpa'm wen zu a̧, o wi nɛ tɛ zii wen-a̧-a̧ lɛŋ tɛ yu a̧.

²⁷Wi nɛ tɛ dor nu'm, nɛ tɛ pi̧ kaná ndara-nú‘m, wen ka'm tɛɛ tik wen zu wa, in ka leɓ‘am tɛɛ de ha̧‘m mɛ yɔ, nɛ o?