Read Northwest Gbaya SIRAK 23 Bible Online

SIRAK 23 - Northwest Gbaya bible

SIRAK 23

¹Kɔfa Sɔ̧ Gasa Wan, Dáà, in Wi nɛ ɔ wan zu duká-kpasá kɔ‘m, k’Ɛnɛ kpɛk ha̧‘m mɛ de nɛ o mɔ lɛŋ nɛ o ndara-nú‘m kɔ̧a̧ na, ɓɛɛ k’Ɛnɛ kpɛk mbɛt ha̧ wa mɛ de ha̧‘m mɛ tik na.

²Wi nɛ tɛ de ha̧ o taamɔ kɔ‘m mɛ tan, nɛ́ o? Wi nɛ tɛ de ha̧ see-am mɛ ndak nɛ ɗoŋ yuwar ko ɗuka-taamɔ mbaŋ nɛ tɛ‘m zu yɔɔkaya kɔ‘m in ɗaŋmɔ kɔ‘m mbɛt, nɛ́ o?

³Wen ká o yɔɔkaya kɔ‘m tɛɛ dɔk ɓɛɛ ká ɗaŋmɔ kɔ‘m tɛɛ daŋ zu ŋmaa; wen ká‘m tɛɛ yɔ nu ti o wisɛn, ɓɛɛ ka wisɛn tɛɛ zɛkɛɗa'm.

⁴Ho, Gasa Wan, Dáà in Sɔ̧ ko duká-kpasá kɔ‘m, k’Ɛ́nɛ́ ha̧ yi-ŋmaŋtɛ ha̧‘m na.

⁵Ɓɛɛ Ɛnɛ ir am nyɛi nɛ dee wɔ́mɔ.

⁶Ká wɔ́mɔ in ŋgɛɗɛ́ o wan zu'm na, k’Ɛ́nɛ́ e há̧ ndiŋ wɔ́mɔ mɛ gbɛ‘m gan na. O Kanamɔ

⁷O bem kɔ‘m, ɛnɛ zii hee mɔ'ɔ nɛ‘i kasi nɛ nu-wi ga. Wi nɛ tɛ ndak pata usamɔ'ɛ beka kpa wen na.

⁸Nɛ́ nu wi-de-ɗaŋmɔ a pi̧ wen zu a̧; wi-kai-ndaa-bii in wi-ŋmaŋ-tɛ tɛ́ tik yi pɛ́r ko wen mɛ́ nu-wa.

⁹Ká mɛ de mɛ kan mɔ dɔ̧ɔ̧dɔ̧ɔ̧ na, ɓɛɛ ká mɛ kan mɔ nɛ nin Sa̧-a̧ Wi ŋgimbi lɛŋ na.

¹⁰Hee mɔ'ɔ nɛ widetom nɛ‘i dúk ɗoŋ-aa ŋgimbi lɛŋ ba nɛ nyasi ga, hegɔ mbɛt wi nɛ kan mɔ in nɛ sá nin Gasa Wan zu geemɔ dɔ̧ɔ̧dɔ̧ɔ̧ beka dúk ɗaŋmɔ bó zu a na na.

¹¹Wi nɛ kan mɔ nyɛmna gbin nɛ heembea nyɛmna mbɛt, ɓɛɛ ɗoŋ bɔnɛ beka nyɛi nɛ ka̧ tua kɔ̧-a̧ na. Ka a̧ nɛ kaná mɔ nɛ nú tum, ɗaŋmɔ kɔ̧-a̧ tɛ si ɗoŋ zu a, ɓɛɛ ka a̧ nɛ kanamɔ nɛ woi, a̧ de nɛ ɗaŋmɔ zu ŋmaa woyo. Ka a̧ nɛ kaná mɔ zu ndelá, ɓaawen tɛ tik zu a̧, ɓɛɛ o ŋgayamɔ tɛ tik zú tua kɔ̧-a̧. O Nyɛrɛ nɛ nyɛm sɛnɛ na

¹²Ŋma wen a̧-a̧ sɛnɛ nɛ nyɛma ŋmaa in fio: ka'i kpa wa mgbara o bezaŋ Jakɔb na, wen kpasa bii ko Sɔ̧ yor kɔ‘i nɛ nyɛia ka̧ pɛrti o mɔ'ɔ nɔ‘i, ɓɛɛ wa kiŋgili tɛ-wa nɛ o ɗaŋmɔ na.

¹³Ká mɛ e ha̧ ndiŋ wen mɛ gbo nɛ nu-mɛ dɔ̧ɔ̧dɔ̧ɔ̧ na, wen o wén nɔ‘i fo nɛ wi pi tɛ ɗaŋmɔ.

¹⁴Tɛ-mɛ a mbaŋ ɗoŋ dáà kɔ-mɛ in naa kɔ-mɛ, ŋgimbi nɛ mɛ dúk mgbara o gasawi, wen ká tá-zu-mɛ bi nde mɛ a̧-a̧ in wa, ɓɛɛ ká mɛ tɛɛ demɔ hee wi-bɔkɔ ga. Mɛ nyɛma so mɛ tɔ̧‘e ka bo hegɔ ɓɛɛ gana so ka wa ko wi na, ɓɛɛ ma tɛ̀ɛ̀ fom wese nɛ wa koo nɛ mɛ‘i.

¹⁵Wi nɛ tɔ̧ɔ̧ laɓak wen yee tɛ-a kaɗi beka kpai dukaa kɔ‘i na ndo-ndo-ndo hɔ́ nɛnɛ sɔŋkur wese kɔ̧-a̧. Ndiŋmɔ

¹⁶Ŋma zuduk bii a̧-a̧ sɛnɛ yiitoo nɛ mɔi̧ ɗaŋmɔ mɔi̧ a zu ŋmaa, ɓɛɛ taar-a dak kɔ‘i nɛ nyimsea (ko Gasa Wan) pi zu: wɔ́mɔ nɛ dár dar hee wee ga nyɛm mɛ kaɗi n'a̧-a̧ tɛ bá nɛ hiɗi-wi na'i na. Wi nɛ de ndiŋmɔ a tɛ beka siŋ ndiŋmɔ‘i pi nu, nɛti ha̧ wee-a mɛ dɔ a̧, na.

¹⁷Nyɔŋmɔ lɛŋ nɛ ɔ̧ɔ̧ nyɔɔ mɔ nú wi-ŋgɛɗɛ; tɛ-a beka mbɔi sɛnɛ na hɔ́ nɛnɛ tɛ fio.

¹⁸Ŋma wiwii a̧-a̧ sɛnɛ mbɛt nɛ dúk in kpɔk koo kɔ‘i ɓɛɛ na; a̧ tɔ̧ nɛ tɛ-a'e: «ŋma wi nɛ nyɛma mɛ zɔk am, nɛ́ o? Tum baa nu ka tɛ‘m kaɗi, o ŋgeŋ kpee yi'm, ŋma bii nɛ tɛ zɔk am bona. Mi ɓili kɔ‘m zu'm wen ge? Wan-mɛ-ŋgɔn beka tɔr o ɗaŋmɔ kɔ‘m na.»

¹⁹Mɔ nɛ wi’ɛi yu nɛ gbaayi-bii, ɓɛɛ tɛ-a bii kɔ‘i nde gbaayi Gasa Wan toka war gɔmŋmaa- gɔmŋmaa gan wese. A̧ zɔk naŋanɔ ko bii lɛŋ zɔ̀k, A̧ zɔk mɔ hɔ sakara-a lɛŋ

²⁰Nɛti ha̧ A̧ mɛ de o mɔ, A̧ iŋa so wa lɛŋ kaɗi; nɛ kale kpɔk mɔ mbɛt ɗoŋ n'A̧a̧ dee nɛ wa kaɗi.

²¹Wi’ɛi tɛ zɔk bɔnɛ oi tom kɔ‘i sɛn beegara saaye, ɓɛɛ nɛ́ sɛn fara n'a̧-a̧ tá so na a wa tɛ ba a̧ sɛnɛ. Koo-de-dala

²²Nɛ kale kpɔk mɔ mbɛt in okóò nɛ siŋa wii kɔ‘i pi nu, ɓɛɛ nɛɛ kó be-dala in ŋma wiwii nɛtɛ

²³Nɛti, a̧ gbina heembea ko Wan-mɛ-ŋgɔn; hɔ-ɗoŋ-aa, a̧ dee nɛ yɔɔkaya mɔ in wii kɔ̧-a̧, taar-a, a̧ kifa koo-de-dala kó nɛ o be-dala á nu in ŋma wiwii nɛtɛ.

²⁴Wa tɛ ba a̧ e ti o giiwi, ɓɛɛ wa tɛ ɓa ndaa o bem kɔ̧-a̧.

²⁵Naŋ o bem kɔ̧-a̧ beka nɔ̧́ nu na, ɓɛɛ o gbaa-ér-a̧ beka wai na.

²⁶Fom tɛ duk zu a̧ ɓɔnsɛnɛ, ɓɛɛ búù kɔ̧-a̧ beka bi na kpoo nɛ kpoo.

²⁷Hegɔ, o wi mɛ ɗoŋ tɛ iŋ nde ŋma mɔ nɛ gana yuu kii Gasa Wan bo na, in ŋma mɔ nɛ ɔ̧ɔ̧ nyɔɔ hee ndaka ɗoŋ o heembea kɔ̧-A̧ ga bo na mbɛt.