Read Northwest Gbaya SIRAK 24 Bible Online

SIRAK 24 - Northwest Gbaya bible

SIRAK 24

¹Taar Usamɔ Zɔna ɗuka-taamɔ Ɗuka-taamɔ zɔn nɛ tɛ-wi nɛ tɛ-wi. A̧ gasi nɛ zu-a sɛn mgbara dukbii kɔ̧-a̧.

²A̧ hu̧i̧ nɛ nu-a̧ sɛn mgbara giiwi ko Wan-mɛ-ŋgɔn, ɓɛɛ a̧ gasi nɛ zu-a̧ sɛn ti ŋgayamɔ kɔ̧-A̧.

³«Mi gboo nɛ kɔ̧ nú Wan-mɛ-ŋgɔn, ɓɛɛ mi kpe zú nu hee kútú ga.

⁴«Fara-duk kɔ‘m a̧-a̧ so yiwese ŋgɔn mɛ, ɓɛɛ kiti-wan kɔ‘m dúk so sɛn zu tura-zan.

⁵«Mi zika yizan kpá nú ŋmaa ɛn'am, ɓɛɛ mi yar sɛn ɗɔɔ ɗuka ndaa gbatɔp.

⁶«Mi ɔɔ wan zu o pɛŋa-yì gbatɔp in zu nu nɛ oi-aa, zu o bii in o zuduk lɛŋ.

⁷«Mi kia fara ɔmtɛ mgbara wa nɔ‘i lɛŋ. Nɛ́ ge nu ge a'm té de yé sɛnɛ ge?

⁸«Hegɔ, Wi nɛ dea mɔ lɛŋ ha̧nú ha̧‘m. Wi nɛ dee am'i usa mgbak fara-duk kɔ‘m ha̧‘m «A̧ tɔ̧ɔ̧ ha̧‘m: ‘Mɛ de fara-duk kɔ-mɛ sɛn nu ko Jakɔb. Israɛl a dúk nɛ nu oi o dáà kɔ-mɛ.’

⁹«A̧ dee am nɛti ɓeemɛ, dika tɛ ku̧u̧naŋmɔ mɛ, ɓɛɛ mi tɛ duk kpoo nɛ kpoo.

¹⁰«Mi wora so A̧ kɔ sa̧-a̧ Tua-laa nɛ gbaayi-A̧, ɓɛɛ nɛ́ hegɔ a'm dee nɛ fara-duk kɔ‘m sɛn Siɔn.

¹¹«A̧ dea ha̧‘m mɛ ɔm tɛ‘m sɛn saaye n'A̧a kɔ̧ɔ̧ nyɛmna, ɓɛɛ mi de fara-ɔ-wan kɔ‘m sɛn Jerusalɛm.

¹²«Mi za̧-a̧ kunin-am sɛn mgbara dukbii nɛ nin-a̧ ɔ hura. Mi duk tɛ kɔ‘m sɛn mgbak fara ko Gasa Wan.

¹³«Mi gasa sɛnɛ hee gbatui Liban ga, ɓɛɛ mi kusi hee zawaya ka naŋ-kaya Hɛrmɔn ga

¹⁴«Mi gasa hee te-ndɛŋɛ sɛn Ɛin-Gɛdi ga, hee ŋma be-te[1] Jeriko nɛ do-a ɔ dee ga, hee ŋma de te-nɔ́ sɛn kɔ̧ hira-nu, hee ndia[2] ga.

¹⁵Pɛ́r tɛ‘m daŋa si fara-duk kɔ-mɛ hee pɛr be-te nɛ‘i sa'e kanɛl in o ŋma be-te nɛ pɛr-aa kúr kur ɓisisi ga, hee pɛr de sɔ̧ɔ̧-tɛ nɛtɛ nɛtɛ ga, hee zi-wer fuu-nyama nɛ‘i dɔ́ sɛn kɔ̧-tua ko Sɔ̧ ga.

¹⁶Mi gbaa er-am hee ŋma gɔla[3] ga, ɓɛɛ o gbaa-er-am lɛŋ ɔ dee yi-bii.

¹⁷Mi ɓɔɔ kpɛlɛ-kpɛlɛ hee te-nyak-dɔ̧ɔ̧ ga, ɓɛɛ o do'm wai nɛ o de wayate nɛ dɔkaa.

¹⁹Ɛnɛ tɛ pii tɛ‘m, ɛnɛ o wi nɛ kɔ̧ɔ̧ am’ɛ, ɓɛɛ zaŋ-‘nɛ́ a súr nɛ o waya'm.

²⁰Taa mɔ wen am ɔ̧ɔ̧ nyɔɔ gan gɔrɔ, ɓɛɛ kpaa'm dee gan yaa-bú-sap gɔrɔ.

²¹O wi nɛ nyɔŋ am, wɔ nyɔŋa'm'i tɛ gbɛ wa woyo, ɓɛɛ o wi nɛ nɔ‘m, wɔ nɔɔ‘m'i tɛ gbɛ wa woyo.

²²Wi nɛ zii nú‘m beka tik gee na, ɓɛɛ o wi nɛ de tom in am beka yɔ kaya na. Ɗuka-taamɔ in Heembea

²³O mɔ'ɔ nɔ‘i, n’ɛɛ́ tɔra'i lɛŋ, nɛ́ o mɔ nɛ yɔra zaŋ kalata nɔɔtɔk kɔ Sɔ̧ Wan-mɛ-ŋgɔn, nɛ́ Heembea nɛ Mɔizɛ yɔra h’ɛ́ɛ́, ɓɛɛ nɛ dúk nɛ mɔɔ-oi wen o mɔi̧aa ko o bezaŋ Jakɔb.

²⁵Heembea duna nɛ ɗuka-taamɔ hee mɔ nɛ nanayi Pisɔn in Tigrɛ há̧ nɛnɛ mɛ ɗuka ɓar’ɛ ga.

²⁶Nɛ́ a̧ a de ha̧ iŋa-mgbara-mɔ mɛ fok yɛyɛyɛ, hee nanayi Efrat in hee Jurdɛn, ŋgimbi mɔi̧ nyɔnɔ ga.

²⁷Nɛ́ a̧ a fo usamɔ gbónɛ́ nɛ dɔkaa, hee ha̧a̧yi Nil in Gihɔn ŋgimbi bia waya nyak-dɔ̧ɔ̧ ga.

²⁸Wi nɛ ku̧u̧ naŋ tɔra kalata Heembea tɛ iŋ lɛŋ hɔ̧ɔ̧ na, hee mɔ'ɔ nɛ sɔŋkur bii beka hɔ́ nɛnɛ tɛ ndaa-a̧ na mbɛt’ɛ ga.

²⁹Wen taamɔ nɛ gbó nɛ tɛ heembea pɛsa gan gbatɔp, ɓɛɛ o mɔ n'a̧-a̧ kɔ̧ɔ̧ mɛ de ɗuka gan gba dir-yi.

³⁰Nɛ́ kɔ‘m, mi duka so hee be-for-yi nɛ tɛ nɛ ɗɔɔ nanayi ga, in hee ŋma mbaŋga war-yi nɛ fók si see fo ga.

³¹Hegɔ, mi tɔ̧ɔ̧: «Mi tɛ a yi tɛ kpɛɛfɔ kɔ‘m, mi tɛ a yi zu o taŋa kɔ‘m. » Zɔ́k, kinii, be-for-yi kɔ‘m kifa gasa nanayi, ɓɛɛ nanayi kɔ‘m kifa gbatɔp.

³²Mi tɛ de ha̧ usamɔ mɛ tok hee gɔna ndaazan ga, ha̧ sa̧a̧mɔ kɔ̧-a̧ mɛ nyɛk ɗoŋ-aa nyɛi.

³³Mi tɛ pɛsi usamɔ dam fara lɛŋ, hee ŋma wen oi-nu Sɔ̧ ga, ɓɛɛ mi ee a̧ ha̧ o wi mɛ ɗoŋ.

³⁴Ɛnɛ zɔ́k, bó nɛ wen zu'm ɛn'am a'm zɔká nɛ bɔnɛ na, ɓɛɛ mɛ nɛ wen zu o bíí lɛŋ nɛ kii ɗuka-taamɔ.