Read Northwest Gbaya SIRAK 25 Bible Online

SIRAK 25 - Northwest Gbaya bible

SIRAK 25

¹Mɔ nɛ‘i tɛ kɔ̧ in wan nɛ‘i tɛ sɛn O ŋma mɔ a̧-a̧ sɛnɛ taar, nɛ see-am baa nyɛmna, ɓɛɛ nɛ ɔ dee yi Gasa Wan in yi bii. O nya-wi nɛ zii nú ŋmaa nɛ dea, dee sɛm ko o wi nɛ ya kpɔk fara, koo in wii nɛ zii ŋmaa nɛ dea.

²O ŋma bii a̧-a̧ sɛnɛ taar, nɛ see-am sɛna, ɓɛɛ nɛ deemɔ kɔ-wa há nɛ tu̧u̧-see ha̧‘m nyɛmna: wisan maŋtɛ wanmbɔi-de-ndela sɔkawi-de-dala nɛ bó nɛ zu na.

³Ka mɛ nɛ mɔi̧a̧ ŋma mɔ tɛ ŋgimbi ŋgaiwi kɔ-mɛ na, nɛ́ ge a mɛ tɛ kpa ŋgimbi sɔki kɔ-mɛ ge?

⁴Oe, de gɔna kita nɛ baa nɛ o wi nɛ a̧-a̧ nɛ mbui zu, in tɔ̧ɔ̧ mbɔro nɛ baa nɛ dita-wi mbɛt wa!

⁵Ɗuka-taamɔ baa nɛ o sɔkawi, taamɔ in mbɔrɔ baa nɛ o tu̧u̧-tɛ-bii.

⁶Iŋa yuwar deemɔ ko o sɔkawi dúk hee mɛtɛwol nɛ‘i kár zu-wi ga, ɓɛɛ mɔ nɛ há̧ gasi ha̧ wa nɛ́ yuu kii Gasa Wan.

⁷O ŋma mɔ a̧-a̧ kɔ see-am mɔɔrɔ-ɗoŋ-naar nɛ ɔ dee tɛ‘m, ɓɛɛ mi tɛ e ɓu-a: wi nɛ kpa desee nɛ ɗoŋ o bem kɔ‘i, wi nɛ zɔk tikaa ko wisɛn kɔ‘i, ŋgimbi n'aa ɓɔna nɛ gbaayi.

⁸Desee a̧-a̧ in wi nɛ dúk in okóò nɛ a̧-a̧ nɛ zu. (Wi nɛ hɛr ndai kpɔ́k in tuifuu wa nɛ́ fɔ na.) Desee a̧-a̧ in wi nɛ ŋma ɗaŋ wen gbó nɛ kɔ̧ nu-a̧ na. Desee a̧-a̧ in wi nɛ tɛ de tom ha̧ ŋma wan-tom nɛ nyɛm yi-a na na.

⁹Wi nɛ a̧-a̧ nɛ de taamɔ, ɓɛɛ nɛ tɔ̧ wen ha̧ mgbak zer-zii-mɔ a dúk nɛ desee.

¹⁰Oe, gasi ko wi nɛ kpaa ɗuka-taamɔ wa! Mɔ kpɔk, wi nɛ gasa gan wi-yu-kii Gasa Wan bo na.

¹¹Yuu kii Gasa Wan gana zu mɔ lɛŋ, ŋma bii nɛ nyɛma ŋmaa in wi-yu-kii Gasa Wan bo na. Ɗaŋ okóò

¹³Gana so gee dɔka da̧i̧, bá nɛ da̧i̧ kɔ see; gana so gee ɗaŋ, bá nɛ ɗaŋ nɛ tɛ́ nɛ tɛ okóò.

¹⁴Gana so gee bɔnɛ, bá nɛ bɔnɛ wen sɛnmɔ; gana so gee kifa-er, bá nɛ kifa-er ko wisɛn.

¹⁵Ŋma ɗaŋ maada̧ nɛ gana maada̧ ko gɔ́k bo na; ŋma ɗaŋ nyimsea nɛ gana nyimsea ko okóò bó na.

¹⁶Gana so a'm ɔ́ kpɔk kɔ̧ tua in dila koo in ndiɓa, bá nɛ ɔaa kpɔk in ɗaŋ okóò.

¹⁷Ɗaŋ ko okóò kpai nɛ saŋayi-a, ɓɛɛ de ha̧ saŋayi-a mɛ tu̧, hee ko baŋgiiɗoŋ ga

¹⁸Kóó wii kɔ̧-a̧ yuu mɔ si tɛ kɔ ŋma wi mbɛt, a̧ a̧-a̧ tɛ pɛ̧ɛ̧-see.

¹⁹Oi ɗaŋ lɛŋ nɛ gee geɗɛk mɔ ti ɗaŋ ko okóò; mɔ lɛŋ nɛ tik zu wiɗeɗaŋmɔ a tik zu a mbɛt.

²⁰Ko-bur-wen dúk ti wiwii nɛ dɔ́k wen na, hee suia zarande sɛn ti ɗɔɔ naŋ gbɛ́rɛ́ ga.

²¹Ka mɛ de ha̧ mɛ́ mɛ kɔ̧ okóò wen de saŋayi-a na; ká mɛ de wɔ okóò na.

²²Wiwii nɛ koo kɔ̧ a̧ demɔ lɛŋ ha̧ a̧, a iŋ nde tu̧u̧see, dɔka-wen, in gasa foe pɛm nɛ a̧.

²³Mɔ ko ko-de-daŋ nɛ́ nyimsea, kaia sɔnti in da̧i̧ ko see. Mɔ ko wan nɛ ha̧ desee ha̧ wi kɔ‘i na nɛ́ mɔkaa-ɓaa in gbula-zugur.

²⁴Ɗaŋmɔ ku̧u̧ zu okóò ɓɛɛ kana nɛ dodom nɛ mɔ'ɔ n’ɛɛ́ kum nɛnɛ lɛŋ'ɛ.

²⁵Ká mɛ e ha̧ ŋma nu yi kɔ-miɛ mɛ a nu na. Ká mɛ e yuwar ha̧ okóò-de-ɗaŋ mɛ tɔ̧ wen tikiɗi na mbɛt.

²⁶Kà a̧ nɛ kɔ̧ɔ̧ zia nú-mɛ na láŋ, mɛ kɛ̧ tɛ-mɛ nɛ a̧ nɛ kaara, ɓɛɛ mɛ fo a̧ si nɛ ha̧ o bii kɔ̧-a̧.