Read Northwest Gbaya SIRAK 26 Bible Online

SIRAK 26 - Northwest Gbaya bible

SIRAK 26

¹Desee ko wiwii nɛ baa de koo Wiwii nɛ baá de koo a̧-a̧ nɛ desee; zɛ duká-kpasá kɔ̧-a̧ tɛ dɔk siti war yiitoo woyo.

²Haya okóò ha̧ nɛ desee ha̧ wii kɔ‘i, ɓɛɛ wii'i tɛ kaɗi pɛ kɔ‘i zaŋ ga̧a̧mɔ.

³Baa de koo nɛ kpaa de sɔnti. Nɛ́ o wi nɛ yu kii Gasa Wan a kpaa a̧.

⁴Koo a̧ nɛ wisan, koo nɛ wanmbɔi, see-a a̧-a̧ tɛ nyɛŋɛ ɓɔnsɛnɛ, ɓɛɛ saŋayi-a gɔn nɛ mami ŋgimbi lɛŋ. Ɗaŋ okóò

⁵O ŋma mɔ a̧-a̧ sɛnɛ taar nɛ see-am gɔ́n gɔn sɛnɛ, ɓɛɛ naar-a pi̧ nɛ kii tɛ‘m: kaia ndaa-wi, gaiamɔ-ɗaŋsee, ɓira wen ndela: o mɔ'ɔ nɔ‘i lɛŋ ɗaŋa gan fio.

⁶Ɓɛɛ ŋma mɔ'ɔ gbɛŋ ɗɛɗɛ in mɔ'ɔ ha̧ ŋga bɔnɛ, hee okóò de gɔyá ŋma wi, in nɛ a̧ nɛ ɗaŋsee mbɛt ga, bo na.

⁷Okóò-de-ɗaŋ dúk hee kpaŋá gɛr ndai-wa-fɔ nɛ mi̧i̧ mi̧i̧ ga. Kiaa ha̧ a̧ mɛ mbo zu dúk hee baa tore kɔ̧ er ga.

⁸Okóò gbɛ-dɔ̧ɔ̧ dúk nɛ mɔɔ-búù; a̧ nyɛm mɛ diti yi-bii ɓɔ na.

⁹Wi iŋ ti okóò nɛ foe bo yí ná tɛ zɔkamɔ kɔ̧-a̧, in tɛ gɔma-yí kɔ̧-a̧.

¹⁰Mɛ yor nɛ nɔaa ti bokobem nɛ foe bo yí na: ka a̧ kpa ŋma be yuwar tikiɗi, a̧ tɛ demɔ lɛŋ n'a̧-a̧ kɔ̧a.

¹¹Mɛ hakali zɔka wál-wál mɔ kɔ̧-a̧. Ka mɛ ɔ́r tɛ-mɛ na, wen a̧ yɔk nɛ mɛ.

¹²Nɛ́ hee mɔ nɛ wi-nɛ-gɛnɛ nɛ wɔ-yi gbɛ̀ɛ̀ hu̧i̧ nɛ nú nɔ́ nɛ kuti yi n'a̧-a̧ kpa ga, a a̧ duk nɛ nu fara n'a̧-a̧ kpa lɛŋ, hu̧i̧ nɛ nu ɓaro kɔ̧-a̧ ha̧ o góò lɛŋ, Zɔnamɔ ko okóò demɔ nɛ war-a

¹³Nyɛma yi-bii ko okóò ha̧ nɛ desee ha̧ wii kɔ̧-a̧, ɓɛɛ iŋa yuwar deemɔ kɔ̧-a̧ há nɛ ŋgai in nɔɔŋgiɗi ha̧ a̧ siti.

¹⁴Okóò nɛ dɔ́k wen na dúk nɛ gba de ha̧a̧mɔ nɛ ta-tɛ ko Gasa Wan, ɓɛɛ ŋma mɔ nɛ gana wan nɛ iŋa de yuwar dukaa bo na.

¹⁵Okóò nɛ kasi zu dee yi-bii gán gan war yiitoo, ɓɛɛ ŋma mɔ nɛ baa see-bii gán wan nɛ tu̧-tɛ bo na.

¹⁶Dee ko okóò nɛ mɔá-kutua kɔ̧-a̧ yá nɛ wara hɔɔ ŋmaa in wese nɛ tok ŋgol ŋgol sɛn yiwese ŋgɔn mɛ.

¹⁷De saŋayi nɛ dúk tɛ de kpɛɗɛ-kpɛɗɛ tɛ hɔɔ ŋmaa in wee-lamba nɛ nyɛk zu dek-e-wee nɛ dúk kɔ̧ Tua ko Sɔ̧.

¹⁸De duk-bee zu nɔ̧ɔ̧ dukui-naŋ hɔɔ ŋmaa in mbiŋ lɔr, nɛ gun-aa nɛ bu-mbɔi. Mɔɔ tu̧ see-bii

²⁸O ŋma mɔ a̧-a̧ sɛnɛ yiitoo nɛ tu̧ nɛ see-am, ɓɛɛ ŋma taar-a nyim nɛ see-am: wanmbɔi nɛ san tika zu a̧, o wi-iŋ-mgbara-mɔ nɛ‘i e wɔkɔrɔɔ, wi nɛ e deemɔ nɛ yuwar-a dúk mɛ de nɛ ɗaŋmɔ: Gasa Wan tɛ de ha̧ a̧ mɛ fe yi gbapaa. Ɗaŋmɔ ko kia-mbɔi

²⁹Ɔ ŋgayá ha̧ wiɗɔrmɔ mɛ ŋyɔn bii na, ɓɛɛ wi-de-gɛnɛ mbɛt nyɛm mɛ duk ŋma ɗaŋmɔ bó zu a na na.