Read Northwest Gbaya SIRAK 27 Bible Online

SIRAK 27 - Northwest Gbaya bible

SIRAK 27

¹O bii nɛ dɔkaa dee ɗaŋmɔ wen wɔ kpaa mɔ nɛ dɔkaa, ɓɛɛ wi nɛ kii yuwar mɛ kpa mbɔi zɔ́k mɔ si tɛ bii ɓɔ na.

²Nɛ́ hee mɔ nɛ ɓɛ̧i̧a̧ nu-tɛ ye nɛnɛ mgbara gbaa ta’ɛ ga a̧ ɗaŋmɔ mbɛt ye nɛnɛ mgbara ɗɔramɔ in hi̧fa̧mɔ.

³Ka ŋma bii hɛr tɛ nɛ nɔaa tɛ yuu Gasa Wan na, tua kɔ̧-a̧ tɛ gbin a nu nɛ hayaa. Wi iŋ ti bii tɛ wen mɛ nu-a̧

⁴Ka'i zɛk mɔ nɛ kpala, ɓɛɛ zak-a ɓɔna yi-a, hegɔ mbɛt, nɛ tɛ wen mɛ nu-bii a'i iŋ nɛ be oi mɔ nɛ ɓɔna tɛ a̧.

⁵Nɛ wee a'i we nɛ ŋgaiá kpana ko wiɓukpana, hegɔ mbɛt, nɛ tɛ zia wen nɛ gbo nɛ nu-bii a'i iŋ nɛ dukaa kɔ̧-a̧.

⁶Wi iŋ ti te nɛ waya-a, hegɔ mbɛt nɛ wen mɛ nu-bii a usi ɗuka taamɔ nɛ a̧-a̧ kɔ̧ see-a.

⁷Ká mɛ zɔn bii nɛti ha̧ tɔ̧ɔ̧-wen kɔ̧-a̧ na, wen nɛ tɛ zia wen kɔ̧-a̧ a'i iŋ nɛ de dukaa kɔ̧-a̧. Dee mɔ nɛ yuwar-a

⁸Ka mɛ ndak ɗoŋ deemɔ nɛ yuwar-a mɛ tɛ kpa a̧, ɓɛɛ mɛ tɛ pi̧ a̧ tɛ-mɛ hee laa-gbooyi ga.

⁹O nɔi̧ nɛ hɔɔ ŋmaa de yáá kɔ‘i kpɔk fara. Nɛ́ hegɔ a kpasawen pii nɛ ɗoŋ tɛ bii nɛ ba a de nɛ tom.

¹⁰Dila gɛɗi nɛ nyɔŋmɔ kɔ‘i; kalea mbɛt, ɗaŋmɔ gɛɗi nɛ o wi-de-ɗaŋmɔ.

¹¹Wen ko bii ko Sɔ̧ dúk kana nɛ kpasa ɗuka taamɔ ɓɔnsɛnɛ, ɓɛɛ mgbelewi bó kpai kɔ‘i kpai hee nyaŋa-zɛ ga.

¹²Mɛ zɛm nɛ de ŋgimbi, sɛka mɛ nɛ̀ɛ̀ tɛ ko o mgbelewi. Zɛ-mɛ a dɔk mgbara o wi nɛ a̧-a̧ nɛ kpasa taamɔ.

¹³Nyɛrɛ ko wi-bɔkɔ nɛ́ mɔɔ gba zu-wi, ɓɛɛ nɛ́ ndiŋ wen a de ha̧ wa mɛ mam mami.

¹⁴Nú-wen ko wikanmɔ nɛ tum yai nɛ muizu wi kpɔk kpɔk, ɓɛɛ kpɛri kɔ̧-a̧ nɛ mɔɔ-kpe-zer sɛnɛ.

¹⁵Kpɛri ko wi-ŋmaŋ-tɛ kaɗi nɛ foka ko tɔk, ɓɛɛ dara kɔ̧-a̧ bó nɛ mɔɔ-zii na. O hu̧samɔ

¹⁶Wi nɛ tɔ̧ ndaa hu̧samɔ ɗaŋ nɛ yuwar de-dukaa, ɓɛɛ a̧ beka kpá kpasa sɛm bɔ na.

¹⁷Mɛ kɔ̧́ sɛm kɔ-mɛ, ká mɛ siŋ a̧ pi̧ nù na; ɓɛɛ ka mɛ́ nɛ́ gbaa ndaa-a̧ ká mɛ nɛ́ ɗoŋ a̧ ɓɔna.

¹⁸Sɛm kɔ-mɛ in a̧ kaɗa, hee mɔ nɛ ŋma bii fe nɛnɛ er o bii kɔ‘i’ɛ ga.

¹⁹Nɛ́ hee mɔ nɛ mɛ e nɛ ŋma nɔi̧ bu̧ er-mɛ yak’ɛ ga a mɛ ee nɛ sɛm kɔ-mɛ yak, mɛ beka kpa a̧ ɓɔna.

²⁰Ká mɛ ndak ɗoŋ a̧ na, wen ɗoŋ-a̧-a̧ nyɛia kaɗi; hee mɔ'ɔ nɛ zamɓɛrɛ́ ŋman tɛ pɛr ga.

²¹Wi nyɛma mɛ lati da̧i̧; ɗoŋ dáá dara, wi nyɛma mɛ kpa ea-ɗaŋmɔ; mɔ kpɔk, ŋma mɔɔ-e-nɛ-ta ko wi gba ndaa hu̧sa̧mɔ bo na. Dukaa nɛ see yiitoo

²²Wi nɛ nyɔŋ yí ha̧ ŋma wi kii nɛ yuwar mɛ de ɗaŋmɔ in a̧; ɓɛɛ wi nɛ iŋa a̧ wɛ́r nɛ tɛ nɛ a̧.

²³Wen kɔ̧-a̧ lɛŋ ɔ́ nɛ nyɔɔ̧ sɛn yi-mɛ hee gɔrɔ ga, ɓɛ tortɛ bá nɛ a̧ tɛ zia wen kɔ-mɛ; ka gbaayi-mɛ bo na, a̧ kpaia nu-a̧, ɓɛɛ war wen kɔ-mɛ kifa nɛ ɗaŋa lɛŋ.

²⁴O ŋma mɔ a̧-a̧ sɛnɛ nɛ dɔkaa n'am sɛn, ɓɛɛ gbamgbaka gan nɛ pɛrti wi’ɛi. Gasa Wan, nɛ zu, tɛ sɛn a̧ mbɛt.

²⁵Wi nɛ pi̧ ta si ŋgɔn yó nɛ zu nɛ zu, ɓɛɛ wi nɛ e ɗɔra tɛ ŋma wi e nɛ ɗɔra tɛ nɛ tɛ.

²⁶Wi nɛ za̧ lim tɛ tik kɔ̧-a̧ woyo. Wi nɛ tui pɛr tɛ tik yi pɛr kɔ‘i woyo.

²⁷Ɗaŋmɔ nɛ bii de si nɛ ɗoŋ zu a woyo, a̧ iŋ fara nɛ tɛ nɛnɛ na mbɛt.

²⁸Zɛkɛɗɛ in dara nɛ tom ko wi-ŋmaŋ-tɛ; ɓɛɛ ɗaŋ kifa-er zɛm nɛ a̧, hee dila a yor gia ga.

²⁹O wi nɛ de nyɛŋɛ tikaa ko o bii ko Sɔ̧ lɛŋ tɛ tik yi pɛr; nɛti ha̧ wa mɛ fe, wa tɛ ɓuk zaŋ bɔnɛ. Ea ɗaŋmɔ

³⁰Kiri in tu̧u̧see nɛ o mɔ nɛ bii kɔ̧ na, ɓɛɛ nɛ wi-de-ɗaŋmɔ ɔɔ kɔ‘i wan zu a.