Read Northwest Gbaya SIRAK 28 Bible Online

SIRAK 28 - Northwest Gbaya bible

SIRAK 28

¹Wi nɛ kifi er ɗaŋmɔ, Gasa Wan tɛ kifi er ha̧ a̧. A̧ tɛ gɔn ŋgaia kita zu a̧ wen zu ɗaŋmɔ kɔ̧-a̧ lɛŋ

²Mɛ é ɗaŋmɔ nɛ ŋma-mɛ dea in mɛ̀ɛ̀ ha̧ a̧; hegɔ ŋgimbi nɛ mɛ be tɛ kɔfi Sɔ̧, A̧ tɛ e ɗaŋmɔ kɔ-mɛ ha̧ mɛ mbɛt.

³Ka ŋma bii dúk nɛ tu̧u̧see in ŋma wi, nɛ́ hee ge a a tɛ ak nɛnɛ‘e Gasa Wan a e ɗaŋmɔ ha̧‘i ge?

⁴A̧ bo nɛ ŋma be deako tikiɗi wen bii nɛ hɔɔ ŋmaa in a̧ na; nɛ́ hee ge a a̧ tɛ kɔfi nɛ Sɔ̧ wen zu war ɗaŋmɔ kɔ̧-a̧ ge?

⁵Ɓɛɛ a̧ n'aa dúk nɛ gee tum bii, nɛ mɔ'ɔ n'a̧-a̧ kasi kiri kɔ see-a’ɛ, a̧ tɛ kpa ea ɗaŋmɔ kɔ̧-a̧ er o?

⁶Mɛ ta mɔ zu sɔŋkur ŋgimbi kɔ-mɛ, ɓɛɛ mɛ e sɛnmɔ dúk; mɛ ta mɔ zu fio in mbɔraa kɔ-mɛ ɓɛɛ kasi heembea.

⁷Tɛ-mɛ a mbaŋ ɗɔŋ heembea, ɓɛɛ ká mɛ kasi kiri in ŋma-mɛ na. Tɛ-mɛ a mbaŋ dɔŋ nɔɔtɔk ko Wan-mɛ-ŋgɔn, ɓɛɛ mɛ e ɗaŋmɔ nɛ wa dee in mɛ̀ɛ̀ tɛ gee mɔ. Kpɛri

⁸Ɗɔŋ-mɛ a nyɛi nɛ kpɛri, ɓɛɛ mɛ beka de ɗaŋmɔ dɔ́k na, wen wi nɛ see ɔ́ kura dak kpɛri dak pi nu.

⁹Wideɗaŋmɔ yai nɛ sɛm pi̧ nɛ sɛnmɔ fara nɛ zia nu-ŋmaa a̧-a̧ so sɛnɛ.

¹⁰Wee kúr nyɛm nɛ ɗoŋ gua nɛ‘i a yi-a; kpɛri mbɛt dar nyɛ́àm nɛ ɗoŋ kura-see: see-bii kúr nyɛm nɛ ɗoŋ ŋgai kɔ̧-a̧, ɓɛɛ tu̧u̧see kɔ̧-a̧ mbɛt tɛ̀ɛ̀ kur nyɛm nɛ ɗoŋ kpaamɔ kɔ̧-a̧.

¹¹Ŋma zaŋa wen nɛ‘i iŋ zu-a na dár nɛ wee, ɓɛɛ ŋma gbaŋanyaŋa kpɛri de dee ha̧ tɔk mɛ a nu.

¹²Ka mɛ ufi fu̧u̧-wee, ɓɛɛ a̧ baa; ka mɛ a sap sɛnɛ, ɓɛɛ a̧ bia, ɓɛɛ o mɔ nɔ‘i yiitoo'i lɛŋ gbo nɛ kɔ̧ nu-mɛ. Ɗaŋ nú

¹³Fom a tik zu wi-dali-wen in wi-tɔ̧ nu-wen yiitoo; wa yaia o bii nɛ yaa so kpɔk zii nɛ ŋmaa.

¹⁴Wen ko wi nɛ a̧-a̧ nú yiitoo dee ha̧ o bíí mɛ tik nɛ dɔkaa, hɔ tɛ pɛsa wa si gɔni nu nɛtɛ nɛtɛ; a̧ yaia o ŋgaŋa ye, ɓɛɛ de ha̧ nutua ko o gasawi mɛ tik kpuul.

¹⁵Wen ko wi nɛ a̧-a̧ nɛ nú yiitoo dee ha̧ o wiwii mɛ ndak o kpasa okóò, dór nɛ mɔɔ-oi-tom kɔ-wa er-wa.

¹⁶Wi nɛ ee zer tɛ zia wen-ndela beka kpa ɔmaté na, a̧ beka dúk zaŋ ga̧a̧mɔ na mbɛt.

¹⁷Nyasi e nɛ ndɔla tɛ-wi, ɓɛɛ ɗáŋ wen gbin kɔ‘i nɛ gba̧a̧-tɛ-wi.

¹⁸Gbapaa gbɛɛ bii nɛ dɔkaa, ɓɛɛ nɛ ɗáŋ-nu a gbɛɛ bii gan.

¹⁹Desee a̧-a̧ in wi nɛ ɗáŋ-nú tik zu a na, nɛ iŋ tu̧u̧see kɔ̧-a̧ na, nɛ tui kpaŋá kɔ̧-a̧ na, ɓɛɛ nɛ nyak kɔ̧-a̧ hɛr a̧ na.

²⁰Wen kpaŋá kɔ̧-a̧ nɛ kpaŋá-boi, ɓɛɛ nyak kɔ̧-a̧ nɛ nyak-ndɛrɛ.

²¹Fio n'aa e zu wi nɛ́ ɗaŋ fio, ɓɛɛ ye-ko-fio dee gan a̧.

²²A beka kpa ŋgai zu o bii ko Sɔ̧ na, ɓɛɛ leɓe-wee kɔ̧-a̧ beka dɔ́ a̧ na mbɛt.

²³O wi nɛ siŋ Gasa Wan pi nu tɛ tik kɔ̧ yi-wee kɔ̧-A̧; wee'i tɛ nyɛk tɛ-wa, ɓɛɛ beka bi na kpoo nɛ kpoo; a̧-a̧ tɛ gɔm zu mgbara wa hee dila ga, ɓɛɛ a̧ tɛ a̧k wa sɛkɛ́ɗɛ́ sɛkɛ́ɗɛ́ hee gɔ̧ ga.

²⁴Mɛ zɔk, mɛ́ ɓór fɔ kɔ-mɛ nɛ tɛn-tɛ;

²⁵mɛ̀ dé kpar-nu-mɛ in mɔɔ-gɔm-aa mbɛt. Mɛ́ kásí sede in lɔr kɔ-mɛ keŋ keŋ; mɛ̀ wé dita wen kɔ-mɛ mbɛt.

²⁶Mɛ kasi zu-mɛ, wen ká leɓɛ-mɛ tɛɛ ir mɛ to naŋ-mɛ, ɓɛɛ ká mɛ tɛɛ tik er wi nɛ gɛɗi mɛ.