Read Northwest Gbaya SIRAK 29 Bible Online

SIRAK 29 - Northwest Gbaya bible

SIRAK 29

¹Nyamandoe Nɛ́ wi nɛ de ko a̧ há nyamandoe ha̧ ŋma wi, ɓɛɛ wi nɛ gbak a̧ kasi nɛ heembea.

²Mɛ ha̧ nyamandoe ha̧ ŋma-mɛ ŋgimbi n'aa a̧-a̧ tɛ haazi, ɓɛɛ mɛ gbo nyamandoe kɔ ŋma-mɛ mbɛt nyɛm nɛ ŋgimbi-a.

³Mɛ yor ɗoŋ wen kɔ-mɛ, ɓɛɛ mɛ demɔ nɛ yuwar-a in ŋma-mɛ; hegɔ mɛ tɛ kpa mɔ nɛ mɛ kɔ̧a̧ dam ɗoŋ ŋgimbi lɛŋ

⁴Bíí nɛ dɔkaa bá kɔ‘i nyamandoe hee ŋma kpaamɔ gee ga, pi̧ nɛ wi-gbak-wa'i tɛ bɔnɛ.

⁵Nɛti ha̧‘i mɛ kpa mɔ er-bii, wi mbɔŋgɔli nɛ a̧, wi nɛɛ de nɛ ko nɛ tɛ-wi, tɔ̧ nɛ nyɛrɛ mbɔi kɔ̧-a̧, ɓɛɛ ka hɔ ŋgimbi gbo aa wo, ɓɛɛ wi daka dak ndɔntɔlɔŋ; wi nyiŋiri nɛ zɔɔ-wi ŋgimbi ha̧si nɛ ɗoŋ tɔ̧ nɛnɛ‘e wi a̧-a̧ tɛ ŋgaia ŋgimbi.

⁶Ka bo ha̧‘i mɛ gbo nyamandoe'i wo, nɛ bɔnɛ bɔnɛ seka wan-sede'i kpaa be retaa, ɓɛɛ dúk nde a̧ nɛ wi-de-sɔnti. Ŋma má ɓɛɛ tɛɛ kifi kɔ‘i nɛ yuwar kaia mɔ er-a̧, ɓɛɛ wan-nyamandoe tɛɛ kifi nɛ wisɛn kɔ̧-a̧ sɔɔgee: a̧ tɛ kpa nɛ fom in dara oi-aa. Ha̧ wi’ɛi mɛ zɔn nɛ a̧ bó na, a̧ tɛ tɛɛ tɔ̧ nɛ ɓaɗi-wen ha̧ a̧ woyo.

⁷Bíí nɛ dɔkaa bɛ̧ ha̧a̧ nyamandoi, bó nɛ wen zu ɗaŋ na, ɓɛɛ nɛ wen ká mɔ kɔ-wa bá tɛ-wa sɔɔgee. Ha̧-a̧mɔ

⁸Kóó hegɔ‘i, mɛ duk nɛ munyal in wisan, ɓɛɛ ká mɛ de ha̧ a̧ mɛ zɛm mɔɔ-er-mɛ ɗoŋ-a nyɛi na.

⁹Mɛ gbak wisan wen zu heembea; nɛ mɔ a ba tɛ-a, ká mɛ e ha̧ a̧ si nɛ gee er-a na.

¹⁰Gana so mɛ ɗaŋ sede wen zu nya-mɛ, koo sɛm kɔ-mɛ, bá nɛ eaa ha̧ mɛ ɓuk sɛn ɗɔɔ nu sɔɔgee.

¹¹Mɛ kɛ̧ mbɔi kɔ-mɛ, nyɛm nɛ ɗoŋ ha̧a̧nu ko Wan-mɛ-ŋgɔn; hegɔ mbɔi'i tɛ gbak mɛ gan lɔr.

¹²Mɛ dun dam kɔ-mɛ nɛ o ha̧a̧mɔ wen wa tɛ pɛm mɛ tɛ o bonɛ lɛŋ.

¹³Wa tɛ de biro zu mɛ ti wisɛn kɔ-mɛ gán gan ndota ŋgee in dita sɛ́ɛ̀. Ziŋina

¹⁴De wi nyɛma mɛ yor ɗoŋ ŋma-wi wen baa nyamandoe, ɓɛɛ nɛ ko wi nɛ foe bo yi na a̧ nyɛma mɛ siŋ a̧ pi nu.

¹⁵Ká tɛ-mɛ bi ɗoŋ demɔ ko wi yor ɗoŋ mɛ na, a̧ ha̧tɛ-a nɛ oi-aa lɛŋ wen zu mɛ.

¹⁶Wideɗaŋmɔ pɔkɔsi kɔ‘i nɛ mbɔi ko wi-yor-ɗoŋ-wi.

¹⁷Ɓɛɛ nɛ́ wi nɛ zɔn bii na a siŋ kɔ‘i wi nɛ gbak a̧ siŋ pi nu.

¹⁸Yoraa ɗoŋ bii dea ha̧ o wikpamɔ nɛ dɔkaa mɛ tik, ɓɛɛ pi̧ wa siɓi-siɓiɛ, hee gasa pɛŋa-yì gbatɔp ga; a̧ dea ha̧ o ŋgaŋa wi mɛ pɛsi si ŋma nu nɛ doole, de ha̧ wa mɛ yambali nɛ tɛ o gɔni nu nɛ́nɛ́.

¹⁹Wideɗaŋmɔ nak tɛ-mɛ yor ɗoŋ ŋma wi, wen n'a̧-a̧ ta kɔ̧-a̧ nde wi tɛ kpa mɔɔ-oi-aa, ɓɛɛ bó, nɛ o wen a a̧ dak pi̧ zu a woyo.

²⁰Mɛ gbak ŋma-mɛ nyɛm nɛ ɗoŋ ŋgai kɔ-mɛ, ɓɛɛ mɛ kasi zu-mɛ ká mɛ tɛ̀ɛ̀ tik yi pɛr. Ka'i ndɛn tua na

²¹O mgbak mɔ nɛ gbak wi tɛ duka-kpasá, nɛ́ yi, nyɔŋmɔ, laa in tua mɛ kpe siri kɔ‘i.

²²Gana so dukaa hee wisan ga sɛn kɔ̧ be gbaksak kɔ‘i, bá nɛ nyɔŋa gba de nyɔŋmɔ nɛ kɔ̧ gɔni tua.

²³Koo mɛ kpa be mɔ tikiɗi, koo nɛ dɔkaa, mɛ kpa desee, ɓɛɛ mɛ beka zii dara ɗaɗa tɛ-mɛ ko wan-tua na.

²⁴Ndɛna tua nɛ mɔɔ-búù: mɛ kpa nu tɔ̧ wen na, wen nɛ mɛ nɛ gɔni bii.

²⁵Koo nɛ nyɔŋmɔ, koo nɛ yi-nɔɔ, a mɛ há̧ ha̧ bii, ŋma demɔɔ-oi-aa bo na; mɛ tɛɛ zii nɛ o ɓaɗi-wen nɔ'ɔ e zu a woyo:

²⁶«mɛ tɛ pii hɛ̧ɛ̧, gɔni bii, mɛ ɗafi zu taŋge-nyɔŋmɔ; mɛ nɛ boo nɛ ŋma-mɔ, mɛ há̧ ha̧‘m nyɔŋ!

²⁷«mɛ yak siɓi, gɔni bii, mɛ e fara ha̧ kpasa bii. Nya kɔ‘m tɛ́ gɛnɛ tɛ‘m, mí kɔ̧ɔ̧ tua kɔ‘m»

²⁸Ŋma mɔɔ-gbin-gba̧a̧tɛ kpasa bii, hee ziaa'e wi nɛ gɔni bíí in wi-ba-nyamandoe ga bo na.