Read Northwest Gbaya SIRAK 3 Bible Online

SIRAK 3 - Northwest Gbaya bible

SIRAK 3

¹Mɔ n’ɛɛ́ tɛ de sitɛ dáà in nàà k’ɛ́ɛ́ O bem, ɛnɛ zii mbɔrɔ kó dáà k’ɛ́nɛ́, ɓɛɛ ɛnɛ demɔ nyɛm ɗoŋ-a̧-a̧ ka de k’ɛnɛ kpasa.

²Wen Gasa Wan zɔn dáà wen zu o bem kɔ̧-a̧, ɓɛɛ A̧ dea ha̧ nàà mɛ kpa ŋgai zu o bem kɔ‘i.

³Wi nɛ tú̧ tɛ dáà kɔ‘i ɗafi nɛ wen ɗaŋmɔ kɔ‘i.

⁴Wi nɛ gasi naa kɔ‘i mɔi̧ nɛ zɔm kpaamɔ.

⁵Wi nɛ tú̧ tɛ dáà kɔ‘i tɛ kpa desee wen zu o mgbak bem kɔ‘i; wese n'a̧-a̧ tɛ kɔfi Sɔ̧, Sɔ̧ tɛ zii.

⁶Wi nɛ gasi dáà kɔ‘i tɛ duk zu nu ɗoŋ-aa nyɛi; wi nɛ mbo zu ha̧ Gasa Wan tɛ ha̧ desee ha̧ naa kɔ‘i.

⁷A̧ tɛ de tom ha̧ o dáà in naa kɔ̧-a̧, hee wa nɛ o wan kɔ̧-a̧ ga.

⁸Mɛ tú̧ tɛ dáà kɔ-mɛ tɛ deamɔ in tɛ tɔ̧ɔ̧wen kɔ-mɛ, ka de ká a̧ toka de yoŋgo zu mɛ.

⁹Wen de yoŋgo ko dáà de dee ha̧ naŋ-tua ko o bem kɔ̧-a̧ mɛ yor nɛ nɔ̧-a̧-a̧, ɓɛɛ ɗaŋ yoŋgo ko nɛ́ tɛ̀ɛ̀ gbin kɔ‘i nɛ naŋ-tua'i.

¹⁰Ká mɛ ŋmaŋ tɛ-mɛ, wen nɛ búù baa dáà kɔ-mɛ na; búù ko dáà kɔ-mɛ bó nɛ ŋma mɔ nɛ mɛ tɛ gasi zu-mɛ sɛnɛ́ na.

¹¹Tɛ bii tu̧ wen zu gasi ko dáà kɔ‘i; nàà nɛ‘i fɛŋ'ɛ pi nɛ foe tɛ o bem kɔ‘i.

¹²Bem kɔ‘m, mɛ hakali dáà kɔ-mɛ ŋgimbi sɔki kɔ̧-a̧, ɓɛɛ ká mɛ ɗaŋ see-a̧ ŋgimbi duká-kpasá kɔ̧-a̧ na.

¹³Koo taamɔ kɔ̧-a̧ a ziɓi, mɛ mu̧i ha̧ a̧; ká mɛ fɛŋ a̧ na, wen nɛ mɛ ɓɔna nɛ oi ŋgai tɛ-mɛ.

¹⁴Wen demɔ nɛ mɛ de si tɛ dáà ko-mɛ beka tik nu gee na. A̧ tɛ gɔn zu ɗaŋmɔ kɔ-mɛ.

¹⁵Wese bɔnɛ kɔ-mɛ, tɛ-Sɔ̧ tɛ mbaŋ ɗoŋ mɛ; ɗaŋmɔ kɔ-mɛ tɛ yeli hee ɓɔrɔ ɗɔɔ wese ga.

¹⁶Wi nɛ siŋ dáà kɔ‘i pi nu dúk hee wi nɛ toa̧ ɗaŋ wen ha̧ Sɔ̧ ga, Gasa Wan fóm nɛ́ wi nɛ ɗáŋ see nàà kɔ‘i. Dukaa si ɗɔɔ

¹⁷Bem kɔ‘m, mɛ demɔ lɛŋ nɛ mɔka see, ɓɛɛ wi nɛ ɔ́ dee tɛ-Sɔ̧ tɛ kɔ̧ mɛ.

¹⁸Mɛ́ nɛ́ gasa gan bii, nɛ mɛ mɔk tɛ-mɛ si ɗɔɔ gan mbɛt, ɓɛɛ Gasa Wan tɛ zɔk mɛ nɛ de yí.

²⁰Wen ŋgayamɔ ko Gasa Wan ɔ́ gasa, ɓɛɛ nɛ o wan-mɔkasee a gasi gasa A̧.

²¹Ká mɛ kii mɔ nɛ ɔ́ ŋgaya gan zu-mɛ na; ká mɛ kii ndaa-mɔ nɛ gana zu ŋgai kɔ-mɛ na.

²²Mɛ ta mɔ zu o heembea nɛ‘i ha̧ha̧ mɛ; mɛ bo nɛ haazi mɔ nɛ ɔ́ hu̧sa̧ na.

²³Ká mɛ há̧ ŋgai tɛ-mɛ tɛ dea mɔ nɛ gana zu-mɛ na, wen mɔ nɛ wa usa ha̧ mɛ gana zu mɔ nɛ bii nyɛma mɛ iŋ kaɗi.

²⁴Wen o zɛlɛgbɛk taamɔ dea ha̧ o ŋma bii nɛ dɔkaa mɛ yo. O ɗaŋ taamɔ kɔ-wa ɗaŋa mbozu-wa. Gɔɔtɛ

²⁶Wan-ŋgasee tɛ kaɗi kana zaŋ bɔnɛ. Wi nɛ kɔ̧ ŋgaŋga mɔ tɛ fe kana nɛ fio-a.

²⁷Bɔnɛ tɛ yuɓuri zu wan-ŋgasee. Wideɗaŋmɔ tɛ kusi kana nɛ ɗaŋmɔ zú ŋmaa.

²⁸Ŋma nyina-kpasi-zɛ́ɛ́ ko wigɔtɛ bo na, wen gun ɗaŋmɔ a̧-a̧ kɔ see-a.

²⁹Wi-iŋ mgbara-mɔ tá nɛ mɔ zu o tua-wen sɛn kɔ see-a̧. Wan-ɗuka-taamɔ kɔ̧ɔ̧ kɔ‘i nɛ zèr-zii-mɔ. Ha̧-a̧mɔ ha̧ o wisan

³⁰Nɛ hee mɔ nɛ yi bí nɛ nyɛka-wee’ɛ ga a̧ ha̧mɔ ha̧ wisan bí nɛ ɗaŋmɔ.

³¹Wi nɛ de demɔ in bii oi demɔ kɔ̧-a̧ ɗafi nɛ mɔ wen sa̧a̧mɔ, ka a̧ de mɛ tik, ɓɛɛ a̧ tɛ kpa wi-toi a̧ e ŋgɔn.