Read Northwest Gbaya SIRAK 30 Bible Online

SIRAK 30 - Northwest Gbaya bible

SIRAK 30

¹Usa ɗoŋ mɔ ha̧ o bem Wi nɛ kɔ̧ɔ̧ bem kɔ‘i gas'a gusi, wen ha̧a̧ mɛ kpa desee nɛ ɗoŋ tɛ bem'i.

²Wi nɛ usi mɔ ha̧ bem kɔ‘i nɛ dea tɛ kpa demɔɔ-oi-aa: a̧ tɛ duk nɛ gasa desee mgbara o wi-iŋ-aa.

³Wi nɛ usi ɗoŋ mɔ ha̧ bem kɔ‘i nɛ dea pi̧ nɛ gɔyá tɛ wisɛn kɔ‘i, ɓɛɛ tortɛ tɛ pi̧ a̧ wen zu bem'i sɛn mgbara o sɛm kɔ̧-a̧.

⁴Koo dàá fea so, dúk hee a̧ fe na ga, wen a ee ŋma bii nɛ hɔɔ ŋmaa in a̧ sɛn oi-aa.

⁵Ŋgimbi n'a̧-a̧ duka nɛ kpasa, a̧ dee so nyɛŋɛ tɛ zɔka a̧; ɓɛɛ tɛ ŋgimbi fio, ŋma taamɔ ɗaŋsee kpɔk bo zu-a na.

⁶A̧ ee ŋma bii nɛ tɛ ye biro zu a ti o wisɛn kɔ̧-a̧, ɓɛɛ nɛ tɛ duk nɛ wi de demɔ in o sɛm kɔ‘i oi demɔ nɛ wa dee in dáà kɔ̧-a̧.

⁷Wi nɛ dɛli bem kɔ‘i tɛ hɛr da̧i̧ kɔ̧-a̧, ɓɛɛ nyakzaŋ-a̧ tɛ gɔn yi tɛ be hiɗimɔ kɔ̧-a̧ tikiɗi.

⁸Nyaŋa nɛ‘i usi ɗoŋ mɔ ha̧ a̧ nɛ dea na tɛ de ŋgazu; mbɛt obem nɛ demɔ ha̧ zu nɛ zu tɛ gan mbɔrɔ.

⁹Ka mɛ dɛli bem, a̧ tɛ de ŋma yaka-yi-mɔ in mɛɛ; ka mɛ de saa in a̧, a̧ tɛ tu̧ see-mɛ.

¹⁰Ká mɛ mam mami in a̧ na, wen ká mɛ tɛ zɔk bɔnɛ wen zu a̧; wen sɔŋkur-aa mɛ tɛ ngɛr nɛ gokonin-mɛ.

¹¹Ká mɛ e ha̧ a̧ mɛ demɔ lɛŋ n'a̧-a̧ kɔ̧a̧ ŋgimbi n'aa ɓɔna nɛ daŋa-ŋgai na.

¹²Mɛ ɗɛ́k a̧ nɔ̧́ kpɔk tɛ guntir, ŋgimbi n'a̧-a̧ ɓɔna nɛ bem, wen ka zu-a̧ ŋgai kaɗi a̧ beka mbo zu ha̧ mɛ ɓɔ na.

¹³Mɛ usi mɔ ha̧ bem kɔ-mɛ, mɛ ha̧ tɛ-mɛ lɛŋ wen usa ɗoŋ mɔ ha̧ a̧, wen ká ŋgazu kɔ̧-a̧ pii zu-mɛ woyo. Hayatɛ

¹⁴Gana so wisan nɛ a̧-a̧ nɛ hayatɛ in nɛ dúk nɛ dea, bá nɛ wanmbɔi nɛ ɔ́ nɛ zɛɛ.

¹⁵Kpasa hayatɛ gana lɔr zaŋnu’ɛ lɛŋ; de kpɔɔ-tɛ-bii gana dɔka mbɔi.

¹⁶Ŋma mbɔi nɛ‘i nyɛma mɛ we nɛ hayatɛ bo na, ɓɛɛ ŋma de-dukaa nɛ gana desee sɛn kɔ̧ see-wi bo na mbɛt.

¹⁷Gana so fio bá nɛ kɔsa; gana so ɔmatɛ kpoo nɛ kpoo bá nɛ zɛɛ nɛ kaɗi na.

¹⁸Ee nyɔŋmɔ zu pɛsi-fio nɛ́ ha̧de nyɔŋmɔ ha̧ wi nɛ nú kpee kaɗi.

¹⁹Kalea mbɛt, ha̧mɔ nɛ‘i há̧ ha̧ geesɔ̧ gbak na, wen a nyɔŋ na in a zii pɛr-aa na mbɛt Nɛ́ kpɔk mɔ mbɛt wen bii nɛ Gasa Wan pi zɛɛ zu a.

²⁰A̧ zɔk mɔ nɛ‘i ha̧ ha̧ a̧, ɓɛɛ a̧ pɛɛ see-a, hee mɔ nɛ kpaná hɛr nɛ be-zɔŋa pɛ́ nɛ see’ɛ ga. Desee

²¹Ká mɛ e ha̧ see-mɛ mɛ ɗaŋ na, ɓɛɛ ká mɛ ɓili zu-mɛ sɔɔgee na.

²²Kpaa desee kɔ̧ see nɛ́ mɔ nɛ de ha̧ bii mɛ duk kpasa siti, ɓɛɛ nɛ́ desee mbɛt a de ha̧ zɛ dukaa kɔ̧-a̧ zaŋnu mɛ dɔk.

²³Mɛ de nyɛŋɛ, mɛ kpa desee, ɓɛɛ mɛ ir ɗaŋsee nyɛi nɛ mɛ, wen ɗaŋsee dea ha̧ o bii nɛ dɔkaa mɛ yɔ, ɓɛɛ ŋma mɔɔ-oi-aa bo na mbɛt.

²⁴Aa-see-mɔ in tu̧u̧see nɛ́ o mɔ nɛ de ha̧ zɛ duka-kpasa kɔ‘i mɛ de dɔ̧ɔ̧, ɓɛɛ taamɔ-ɗaŋsee de ha̧ bii mɛ sɔk nɛ hayaa

²⁵Desee nɛ́ mɔɔ de ha̧ nyɔnmɔ mɛ ɔ nyɔɔ nu-wi; mɔ n'aa nyɔŋ ŋmáŋ nɛ a̧.