Read Northwest Gbaya SIRAK 31 Bible Online

SIRAK 31 - Northwest Gbaya bible

SIRAK 31

¹Demɔ in ɗaŋmɔ ko kpaa-mbɔi Nyaŋá yá nɛ‘i nyaŋ wen zu mbɔi ɔ̧́k wi ɔ̧k; taamɔ wen aa ndak nɛ yá yi-wi.

²Taamɔ wen kpaa mɔɔ-nyɔŋ dór yá dor yi-wi, hee mɔ nɛ ŋga zɛ́ɛ́ dór nɛ yá yi-wi’ɛ ga.

³Tɛ́-wanmbɔi gbɛ́ŋ wen mɔi̧a̧ kpaamɔ, ɓɛɛ ka a̧ ɔm tɛ-a, mɛ nɛ wen ŋyɔŋa bɔtɛ-a.

⁴Tɛ-wisan gbɛ́ŋ mɛ kpa be mɔɔ-nyɔŋ, ɓɛɛ ka a̧ ɔm tɛ-a, ɓɛɛ san tika zu a.

⁵Wi nɛ de wɔ lɔr beka dúk gee, ɗaŋmɔ bo zu a na, na, ɓɛɛ wi nɛ kii mɛ de mbɔi tɛ yɔ kɔya-tɛ.

⁶Bíí nɛ dɔkaa dee geemɔ wen zu wɔ lɔr, ɓɛɛ tikaa kɔ̧-wa tɛ́ nɛ gbaayi.

⁷Mɔ‘i nɛ pɛ́r wen o wi nɛ gbɛ tɛ si sɛnɛ, ɓɛɛ o mgbelewi lɛŋ tik tik yi-a.

⁸Desee a̧-a̧ in wanmbɔi nɛ ŋma wen bó zu a na, in nɛ gbɛ tɛ ɗoŋ lɔr na.

⁹A̧, nɛ o'o h’ɛ́ɛ́ zɔn a̧ o? wen a̧ iŋa dukaa nɛ dea sɛn mgbara pɛrnam kɔ̧-a̧.

¹⁰Wi nɛ pɛrti weamɔ‘i tika zu a̧, ɓɛɛ nɛ gboo ɗɔɔ a nɛ de tɛ, nɛ́ o? A̧ nyɛma mɛ duk tɛ-a zu a. Ŋma bii nɛ nyɛma so mɛ gbin heembea, ɓɛɛ nɛ gbin na, nɛ́ o? Ŋma bii nɛ nyɛma so mɛ de ɗaŋmɔ, ɓɛɛ nɛ de na, nɛ́ o?

¹¹Hegɔ, kpaamɔ kɔ̧-a̧ tɛ duk ɗoŋ-aa nyɛi, ɓɛ bii lɛŋ tɛ tɔ̧ nyɛrɛ o dee demɔ kɔ̧-a̧. Nyɔŋmɔ-gbaŋá

¹²Ka mɛ nɛ duka ka̧ nyɔŋmɔ ko o gasawi, ká mɛ ɓɛ́ nu-mɛ ɓoŋgolo tɔ̧ nɛnɛ‘e: «oe, zɔm nyɔŋmɔ wa» na.

¹³Tɛ-mɛ a mbaŋ ɗoŋ-a nde zɔka mɔ lɛŋ nɛ wɔ-a nɛ́ ɗaŋmɔ. Mgbara mɔ nɛ Sɔ̧ dea lɛŋ, wan nɛ ɗaŋa gan gbaayi-de-wɔmɔ, nɛ ge? Mɔ nɛ de n'a̧-a̧ hi̧i̧ nɛ kɔ̧ɔ̧ mɔ lɛŋ n'a̧-a̧ zɔk'i, a̧‘i.

¹⁴Ká mɛ nyɛi er-mɛ si tɛ mɔ lɛŋ nɛ mɛ zɔk na. Ká mɛ pi er-mɛ zu nyɔŋmɔ nyɛm ŋmaa in yí-mɛ na, wen ka mɛ tɛɛ́ to ŋma-mɛ.

¹⁵Mɔ nɛ mɛ kɔ̧a̧, ŋma-mɛ kɔ̧ɔ̧ mbɛt. Mɛ ta mɔ kaɗi, sɛka mɛ dea.

¹⁶Mɛ nyɔŋ nɛ mɔ nɛ wa e ti mɛ, hee kpasa bii ga, wen ká bii tɛɛ́ sɛn mɛ wen hɔ̧k hɔ̧k nyɔŋa mɔ kɔ-mɛ.

¹⁷Mɛ dúk nɛ kuti wi mɛ dak er-mɛ tɛ nyɔŋmɔ, ka mɛ a̧ boo nɛ wi iŋ mɔ, ɓɛɛ ká mɛ usi'e wi nɛ yaa-gbagurmɔ na, wen ká see o ŋma bii tɛ̀ɛ̀ ɗaŋ.

¹⁸K’ɛnɛ nɛ yaa nu ka̧ nyɔŋmɔ nɛ dɔkaa, ká mɛ pi̧ er-mɛ tɛ nyɔŋmɔ ti na.

¹⁹Be mɔ tikiɗi ɓɛɛ nyɛma kɔ‘i wi nɛ iŋa de dukaa, hegɔ mbɛt hiɗi-a gɔ́n ŋgimbi ɔ nu na.

²⁰Wi nɛ nyɔŋ mɔ nyɛm nɛ ɗoŋ wɔ kɔ‘i ɔ́ yá nɛ dea; a̧ kur zu yá nɛ hayaa, ɓɛɛ kpoo tɛ-a lɛŋ dúk nɛ dea. Ŋyaŋa-yá, ɔ̧i̧ in ɓaɓa-zaŋ nɛ́ o mɔ nɛ zɛm wi-ɗaɗa

²¹Ka mɛ nɛ nyɔŋa mɔ nɛ dɔkaa zu doole, mɛ kúr, mɛ nɛ̀ɛ̀ ɔ̧i̧ nyɔŋmɔ‘i a nu, ɓɛɛ mɛ ɔma fɛmɛ̀ɛ̀.

²²Bem kɔ‘m, mɛ zíí nu'm, ká mɛ e'm tɛ geemɔ na, ɓɛɛ nɛ́ nɛ ɗɔŋ a mɛ tɛ zii nɛ o mgbara wen kɔ‘m. Mɛ demɔ lɛŋ nɛ yuwar-a; hegɔ ŋma zɛ̀ɛ̀ beka kpa mɛ na.

²³Wi nɛ kpɛk bii nɛ dea sɛn tɛ ha̧nyɔŋmɔ nɛ dɔkaa, zɔnamɔ kɔ̧-a̧ a̧-a̧ ndaranu-bii lɛŋ: nɛ́ mgbak mɔɔ-sedaako dee demɔ kɔ̧-a̧.

²⁴Bíí saaye lɛŋ ku̧i̧ nɛ mɔ zu wan-ŋga-er. Nyɛrɛ ŋgoko kɔ̧-a̧ dama fara lɛŋ. Dɔ̧ɔ̧́

²⁵Ká mɛ ŋgai gba̧a̧tɛ-mɛ in dɔ̧ɔ̧ na, wen dɔɔ ɗaŋa bii nɛ dɔkaa.

²⁶Nɛ́ hee mɔ nɛ wee we nɛ boi’ɛ ga a dɔ̧ɔ̧ we nɛ see o wi-ŋmaŋ-tɛ, ir nɛ wa mɛ kpɛr in o ŋmaa.

²⁷Kó o bii, dɔ̧ɔ̧ duk hee duka-kpasa ga, ka'i nɛ nɔɔ a̧ nɛ hɔ̧n. Nɛ ge de-dukaa ge a'i kpa ka'i kpa dɔ̧ɔ̧ mɛ nɔ na ge? Wa dee dɔ̧ɔ̧ wen ha̧desee ha̧ bii.

²⁸Dɔ̧ɔ̧ nɛ mɔɔ ha̧ tortɛ in desee ha̧ bii ka'i nɛ nɔɔ a̧ tɛ ŋgimbi-a, nyɛm nɛ tam nu-wi.

²⁹Nɔɔ dɔ̧ɔ̧ nɛ dɔkaa, hɛra tɛ nɛ dɔ̧ɔ̧ in dúka tɛ tɛ́ dɔ̧ɔ̧, nɛ́ o mɔɔ ɗaŋ bii.

³⁰Gbɛ́ɛ́ dɔ̧ɔ̧ ŋgai nɛ ɗaŋsee ko mgbelewi siti dak nɛ wen pi̧ zu a. A̧ kaɗi nɛ ŋgai kɔ̧-a̧ dak nɛ biro pi zu a.

³¹Tɛ gbaŋá nɛ dɔ̧ɔ̧ ya sɛnɛ lata lata, ká mɛ kii nu sɛm kɔ-mɛ na. Ká mɛ e a̧ tɛ geemɔ ŋgimbi desee kɔ̧-a̧ na; ká mɛ tɔ̧ ɗaŋ wen ha̧ a̧ na, bɛɛ ká mɛ ɓili a̧ nɛ kpɛra nyamandoe na mbɛt.