Read Northwest Gbaya SIRAK 32 Bible Online

SIRAK 32 - Northwest Gbaya bible

SIRAK 32

¹Yuwar-dukaa fara gbaŋá Ka wa nɛ kɔka mɛ mɛ́ duk zu nyɔŋmɔ, ká mɛ ŋmaŋ nɛ zɔm tɛ-mɛ na, mɛ duk hee o ŋma-mɛ ga. Mɛ demɔ lɛŋ ha̧ wa kaɗi, ɓɛɛ mɛ nɛ̀ɛ̀ duk nu geɗɛk,

²Ka mɛ nɛ dea war tom kɔ-mɛ lɛŋ kaɗi, ɓɛɛ mɛ nɛ̀ɛ̀ ba fara kɔ-mɛ, wen ha̧ mɛ mɛ kpa desee in wa, in ha̧ wa mɛ zɔn mɛ wen zu deemɔ kɔ-mɛ nɛ yuwar-a.

³Sɔkawi, mɛ tɔ̧ wen, wen i̧i̧ nɛ yuwar kɔ-mɛ: mɛ tɔ̧ nɛ mgbak yi-wen; mɔ kpɔk, ká mɛ gɔn biɔ̧-yɔyɛ na.

⁴Ŋgimbi nɛ bii yéŋ zer mɛ zii tiger biɔ̧ in gima, ká mɛ dɔk wen na; ká mɛ usi iŋa-mgbara-mɔ kɔ-mɛ nɛ nú tum na.

⁵Yɔyɛ-gbaŋá nɛ dɔ̧ɔ̧ ya sɛnɛ lata-lata hɔ̧ɔ̧ ŋmaa in de sɛka diama̧ nɛ dúk zu wele lɔr.

⁶Tiger gima in biɔ̧ zu dɔ̧ɔ̧, nɛ́ ɔ́ paŋá duk hee de kina-ta nɛ dúk sɛn kɔ̧ ɓɔá-lɔr ga

⁷Mɛ tɔ̧ wen, be-ŋgaiwi, ka nɛ tɛɛ́ gbak, ɓɛɛ ka wa nɛ aka mɛ, ká mɛ kifi nu gan war yiitoo na.

⁸Mɛ tɔ̧ wen nɛ dɔɔ; mɛ tɔ̧ wen nɛ dɔ̧ gboŋga, mɛ tɔ̧ wen kpɔk gɔn nɔ̧ zú oi-aa. Mɛ usi'e wi zia wen nɛ yak, ɓɛɛ mɛ usi mbɛt'e wi dɔ́k ko'i wen na.

⁹Ka mɛ nɛ duka mgbara o gasawi, ká mɛ bá zu-mɛ we nɛ wa na, ɓɛɛ ka ŋma bii á tɔ̧ɔ̧ wen, ká mɛ dɔ́k wen na.

¹⁰Nɛ́ hee mɔ nɛ pi̧i̧-koro yak nɛnɛ ti ha̧ mbaŋa-koro’ɛ ga, a̧ zɔnamɔ yak nɛnɛ ti ha̧ wi nɛ dɔk wen na.

¹¹Ŋgimbi nɛ hɔa, mɛ kur zalaŋ, ká mɛ ɓɔn ɗoŋ na. Mɛ war yi si kɔ̧ tua; ká mɛ gbur nan-mɛ nɛ yuwar na.

¹²Sɛn hi̧i̧, mɛ nyɛma mɛ kpai taamɔ de nɛ mɔ nɛ mɛ kɔ̧a; mɔ kpɔk, ká mɛ de ɗaŋmɔ tɛ tɔ̧ɔ̧ hɔrɔp-hɔrɔp wen na,

¹³Ɓɛɛ wen zu mɔ‘i, mɛ de osoko zɔn nɛ Wi nɛ dea mɛ, in nɛ ha̧a̧ o demɔ kɔ‘i yak zale. Naar Usamɔ Yuu kii Gasa Wan

¹⁴Wi nɛ yu kii Gasa Wan kpɛk nɛ usamɔ kɔ̧-A̧, ɓɛɛ o wi nɛ kii A̧ dika mɛ gɔna ndaazan, A̧ tɛ kpɛk wa nɛ dea.

¹⁵Wi nɛ ɓá ɗoŋ heembea tɛ kpa a̧ gan kere, ɓɛɛ wi nɛ ɔr tɛ in heembea tɛ tik.

¹⁶O wi nɛ yu kii Gasa Wan tɛ iŋ mɔ nɛ dúk nɛ yuwar-a, ɓɛɛ o dee-demɔ kɔ-wa tɛ tok hee sa̧a̧mɔ ga.

¹⁷Wideɗaŋmɔ kɔ̧ kɔ‘i dɔka wen a zu wi na, ɓɛɛ taamɔ kɔ̧-a̧ usi ndemɔ lɛŋ nɛ‘i de dúk nɛ yuwar-a.

¹⁸Tɛ́ wan-gɔna-kɔ̧-tɛ bi ɗoŋ taamɔ na: ŋma mɔɔ pi̧ kii zaŋ wi-ŋmaŋ-tɛ in wi nɛ iŋ Sɔ̧ na bo na.

¹⁹Mɛ ta mɔ, seka mɛ deemɔ: hegɔ ŋma mɔ nɛ mɛ tɛ nyim tɛ-mɛ zu a bo na.

²⁰Ká mɛ nɛ́ nɔ nɛ ɗaŋ yuwar na, wen ká mɛ tɛɛ́ tó naŋ-mɛ nɛ ta.

²¹Ká mɛ pem kɔ-mɛ nɛ yɔka yuwar na.

²²Kóó nɛ o mgbak bem kɔ-mɛ, mɛ kasi zu-mɛ nɛ wa mbɛt.

²³Mɔ nɛ mɛ de lɛŋ, mɛ de nɛ yuwar-a. Nɛ hegɔ a mɛ tɛ kasi nɛ o heembea.

²⁴Wi nɛ hɛr tɛ nɛ heembea há nɛ tɛ-mɛ ndak ɗoŋ o gɛŋa, ɓɛɛ wii nɛ e ta nɛ Gasa Wan, ŋma mɔ nɛ tɛ pi bɔnɛ zu a, koo tikiɗi, bo na.