Read Northwest Gbaya SIRAK 33 Bible Online

SIRAK 33 - Northwest Gbaya bible

SIRAK 33

¹Wi nɛ yu kii Gasa Wan beka iŋ bɔnɛ na, ɓɛɛ a̧ tɛ gbo ɗɔɔ o weamɔ ɓɔnsɛnɛ.

²Wan-ɗuka-taamɔ sɛ́n heembea na, ɓɛɛ wi nɛ ndak ɗoŋ a̧ nɛ see yiitoo dúk hee kombon nɛ gba-búk bá ga.

³Wi-iŋ-mgbara-mɔ e tɛ́ tɛ Heembea; a̧ ndak ɗoŋ Heembea hee mɛ nɛ wen ko Sɔ̧ ga.

⁴Ka mɛ nɛ kɔ̧a̧ ha̧ bii mɛ zii mɔ nɛ mɛ tɔ̧, mɛ ɗafi gba̧a̧ wen-aa nɛti sɛ́; mɛ mɔi̧ iŋamɔ kɔ-mɛ, sɛka mɛ ha̧kifanú.

⁵Taamɔ ko wi-bɔkɔ zík zík hee naŋ-keeke ga, ɓɛɛ kɛ̧ɛ̧ mgbara mɔ kɔ̧-a̧ kpai kpai hee wii-see naŋ-keeke ga.

⁶Sɛm zɛkɛɗi-wi dúk hee wiwii-nyaŋá daŋ ŋmaa nɛ hiɗi mɔ ŋgimbi nɛ ŋma bii dáŋ nɛ zu a ga. Mɔ nɛ Sɔ̧ dee nyɛ́m ŋmaa na

⁷Zɛ kpók kpɔ́k zaŋ pɛ lɛŋ kpá sa̧a̧mɔ kɔ‘i nɛ ɗoŋ wese, ɓɛɛ mɔ nɛ de bɔɔ ha̧ ŋma zɛ mɛ gan ɓi-aa, nɛ́ ge?

⁸Nɛ́ Gasa Wan a kɛ̧ɛ̧ saŋa-tɛ-wa nɛ ŋmaa, nyɛm nɛ ɗoŋ taamɔ kɔ̧-A̧; A̧ n'A̧a̧ ee o ŋgimbi in o gbaŋá nɛtɛ nɛtɛ'ɛ.

⁹A̧ dea o ŋma nɛ gasa sa̧-a̧ wese, ɓɛɛ A̧ e o oi-aa nɛ gee wese.

¹⁰Bíí lɛŋ gboo nɛ tɛ fuu-nu, ɓɛɛ nɛ tɛ nu a'i dee nɛ Adam.

¹¹Gasa Wan dee wa nɛtɛ nɛtɛ, nyɛm nɛ ɗoŋ iŋa-mgbara-mɔ kɔ‘i, ɓɛɛ de há̧ koo o nde mɛ́ nɛ nɔ sɛn tɛ yuwar kɔ‘i nɛtɛ nɛtɛ mbɛt.

¹²A̧ toka de yoŋgo zu o ŋma ha̧ nɛ de sɔnti ha̧ wa; A̧ sa̧-a̧ war-tɛ o ŋma, ɓɛɛ kai wa ndaɗi nɛ tɛ-A̧; A̧ toka ɗaŋ yoŋgo zu o ŋmaa, ɓɛɛ A̧ gbɔsi wa si ɗɔɔ; A̧ kpaia fara-duk kɔ-wa lɛŋ.

¹³Hee mɔ nɛ wiɓukpana va̧i̧ nɛ gii kɔ̧ er-a hee mɔ nɛ see-a kɔ̧a̧ ga, nɛ́ hegɔ mbɛt a o bii yá nɛnɛ́ kɔ̧ er-Wi nɛ dee wa: A̧ ha̧mɔɔ-oi-tom ha̧ wa, nyɛm nɛ ɗoŋ taamɔ kɔ̧-A̧.

¹⁴Demɔ a̧-a̧ nɛ mgbaar, ɗaŋmɔ mbɛt nɛ mgbaar; duka-kpasá a̧-a̧ nɛ mgbaar, fio mbɛt nɛ mgbaar. Hegɔ mbɛt, wi-de-ɗaŋmɔ a̧-a̧ nɛ mgbaar, widedemɔ nɛ mgbaar.

¹⁵Mɛ mbaɗi o mɔ lɛŋ nɛ Wan-mɛ-ŋgɔn dea, nɛ gbam yiitoo yiitoo zɔk nɛ yi-ŋmaa.

¹⁶Kɔ‘m, mi duka nɛ sɔŋkur bii mɛ de tom'i, hee wi-dɔr-oi nyɔnɔ, nɛ ɗoŋ wi-mɔi̧-nyɔnɔ ga.

¹⁷Nɛ́ wen zu de yoŋgɔ ko Gasa Wan a'm kpaa nɛ zu'm, ɓɛɛ mi dun nɛ gɔŋgɔ kɔ‘m, hee ko o ŋma wi-mɔi̧-wayate-de-dɔ̧ɔ̧́ ga.

¹⁸Ɛnɛ zɔ́k! bó nɛ wen zu'm ɛn'am a'm zɔka nɛ bɔnɛ‘i na, ɓɛɛ mɛ́ nɛ́ wen zu o bii lɛŋ nɛ kii iŋamɔ. Yuwar ɔ wan zu mbɔi in tua kɔ‘i

¹⁹Ɛnɛ zíí! ɛnɛ o wi-duk-ti, in ɛ́nɛ́ o wi-ya-zu-giiwi, ɛnɛ yéŋ zer-‘nɛ́.

²⁰Kóó nɛ bem kɔ-mɛ, kóó nɛ kóò kɔ-mɛ, kóó nɛ nya-mɛ, kóó nɛ sɛm kɔ-mɛ, ká mɛ kpɛk ha̧ a̧ mɛ kpa ŋgai zu mɛ, ŋgimbi nɛ mɛ ɓɔna nɛ kpasa na. Ká mɛ há̧ mbɔi kɔ-mɛ ha̧ ŋma bii nɛtɛ na, wen ká ŋma mbe taamɔ hɔ́ zu-mɛ, bɛɛ ká mɛ tɛ̀ɛ̀ ak mɔ kɔ-mɛ woyo.

²¹Ŋgimbi nɛ mɛ ɓɔna nɛ gbaayi káŋ, in nɛ mɛ ɔ́m ɔm, ká mɛ e ha̧ ŋma bii mɛ daŋ zu mɛ na.

²²Gana so o bem kɔ-mɛ a ak aka mɔ er-mɛ bá nɛ‘e mɛ kɔfi kɔfaa er wa.

²³Tɛ o mɔ kɔ-mɛ lɛŋ, mɛ dúk nɛ gasawi ɓonti, ɓɛɛ ká mɛ e ha̧ ŋma be mɔ mɛ ɗaŋ hura-nin kɔ-mɛ na.

²⁴Nɛ́ sai nɛ sɔŋkur wese duka-kpasa kɔ-mɛ in ŋgimbi fio be hɔ̧, a̧ mɛ tɛ kɛ̧ nɛ mɔ‘o oi mɛ. O bara

²⁵Zɔ̧, ɓirate in dita tui nɛ mɔ ko tuifuu; nɛ war ko widetom nɛ́ kam, bɔnɛ-nyasi in tom.

²⁶Mɛ há̧ tom ha̧ a̧, ɓɛɛ mɛ ɔma; ka mɛ e a nɛ yɔli, a̧ tɛ kii mɛ yu mɔ yak.

²⁷Wi difi ger ndai nɛ kpaŋá in gba̧a̧-pɛ́r, nɛ ko ɗaŋ widetom nɛ́ bɔnɛ in nyasi.

²⁸Mɛ ir a̧ si yi tom, wen ka a̧ tɛɛ dúk sɔɔgee.

²⁹Wen dukaa gee ir bii mɛ de ɗaŋmɔ nɛ dɔkaa.

³⁰Mɛ há nɛ tom nɛ nyɛma er-a ha̧ a̧; ɓɛɛ ka a̧ nɛ mboo zu na, mɛ pi̧ poka naŋ-a̧. Mɔ kpɔk, ka̧ mɛ de yaka-yi-mɔ si tɛ ŋma bii na, ɓɛɛ ka̧ mɛ de ŋma yɔɔkaya mɔ na mbɛt

³¹Ka mɛ a boo nɛ widetom kpɔk ɓɛɛ, mɛ ba a̧ hee gbagurtɛ-mɛ ga, wen mɛ kpaa a zu bɔnɛ in ŋgai tɛ-mɛ. Ka mɛ a boo nɛ widetom kpɔk ɓɛɛ, mɛ ba a̧ hee nya-mɛ ga, wen mɛ a̧-a̧ nɛ hazi-a hee kiitɛ-mɛ ga.

³²A̧À ka mɛ́ nɛ́ usa bɔnɛ ha̧ a̧, nɛ mɔ'ɔ n'aa yuu mɔ yak ɓɛlɛm’ɛ,

³³mɛ tɛ nɛ́ɛ́ kii a si dee?