Read Northwest Gbaya SIRAK 34 Bible Online

SIRAK 34 - Northwest Gbaya bible

SIRAK 34

¹Ɔɔ-zu nɛ gee mɔ Gee ee-ta ɔ́r nɛ́ o mgbelewi, ɓɛɛ ɔɔ-zu há̧ nɛ gasa-zu ha̧ wi nɛ bo nɛ zu na.

²Ndaka ɗoŋ ɔɔ-zu hɔɔ ŋmaa in kiaa mɛ ba giɔ̧, kóó ndaka ɗoŋ búk.

³Ɔɔ-zu nɛ gee giɔ-mɔ, bo nɛ kpasa mɔ na; dúk hee saŋayi-wi sɛn yí darŋgel ga.

⁴Nɛ ŋma ge sa̧a̧mɔ ge a'i nyɛma mɛ kpa tɛ ndiŋmɔ ge? Mbɛt, nɛ ge kpasawen ge a̧ tɛ gbo nɛ tɛ ndela ge?

⁵Zɔka ŋgálá, pi̧i̧ tani in ɔɔ-zu nɛ geemɔ, hee gee taamɔ ko okóò nɛ zaŋ nyim mɛ ko’ɛ ga.

⁶Ka nɛ boo nɛ Wan-mɛ-ŋgɔn a toma wa mbáŋ nɛ tɛ-mɛ na, ká mɛ e see-mɛ si tɛ wa na.

⁷Wen o ɔɔzu ɔra o bii nɛ dɔkaa, ɓɛɛ o wi nɛ ee so ta nɛ wa lɛn tika ɔrɔp.

⁸Heembea tɛ hɔ gba̧a̧, ndela bo na. A̧ iŋa mgbara mɔ n'a̧-a̧ tɔ̧; mɔ n'a̧-a̧ tɔ̧, a̧ tɛ de. Yárá nu

⁹Wi nɛ yara nu iŋa mɔ nɛ dɔkaa, ɓɛɛ wi-iŋ-mgbara mɔ tɔ̧ kɔ‘i wen nɛ yuwar-a.

¹⁰Wi nɛ mɔ we na iŋ mɔ dɔ́k na.

¹¹Wi nɛ yara nu iŋa yuwar deemɔ nɛtɛ nɛtɛ.

¹²Mi zɔka mɔ nɛ dɔkaa zaŋ yara nu kɔ‘m, ɓɛɛ mi zii mgbara mɔ nɛ dɔkaa, gan mɔ n'am tɔ̧.

¹³Mi gboo ɗoɔ ŋgaŋa mɔɔ fio war ɔ dɔka, ɓɛɛ mi kpasi wen zu iŋa-mgbara-mɔ kɔ‘m. Yuu kii Sɔ̧

¹⁴O wi nɛ yu kii Gasa Wan tɛ ya kpasa, ɗoŋ-aa nyɛi.

¹⁵Wen ee-ta kɔ-wa lɛŋ dúk zu Wi nɛ nyɛma mɛ kpasi wa.

¹⁶Wi nɛ yú kii Gasa Wan de kii ŋma mɔ na; tɛ-a nak na ndo-ndo-ndo, wen Gasa Wan nɛ yaa-e-nɛ-ta kɔ̧-a̧.

¹⁷Desee a̧-a̧ in wi nɛ yú kii Gasa Wan.

¹⁸Wi n'a̧-a̧ tɛɛ e nɛ tɛ-a̧ nɛ́ o? Wi nɛ tɛ ha̧ ŋgai ha̧ a̧, nɛ́ o?

¹⁹Yi Gasa Wan a̧-a̧ tɛ o wi nɛ kɔ̧ A̧, A̧ nɛ dúk nɛ ŋgaŋa wi-ye-ɗoŋ bii, nɔ̧ɔ̧ wi-gbak-wi, fara-hu̧si-tɛ wen wee hara-búk, giɔ̧-ɔmtɛ ɗɔɔ wese bɛdɛ zu; A̧ nɛ dúk ti ha̧ bii wen ŋgaŋamɔ, Wi-ye-ɗoŋ-wi wen yoo nu.

²⁰A̧ tɔi bii e ŋgɔn, ɓɛɛ A̧ dee ha̧ saŋayi-wi mɛ tok, A̧ ha̧ hayatɛ, duka-kpasa in de yoŋgɔ. Kpasa yuwar kia Sɔ̧

²¹Ɗafa Sɔ̧ nɛ mɔɔ-zu̧zu̧ nɛ́ zɛkɛɗa Sɔ̧ ɓɛɛ.

²²Sɔ̧ nyɛm mɛ kpɛk ha̧a̧mɔ ko o wi nɛ gbin heembea kɔ̧-A̧ na.

²³Wan-mɛ-ŋgɔn kpɛk ha̧a̧mɔ ko o ɗaŋwi na, ɓɛɛ bó nɛ wen zu dɔka saɗi nɛ‘i gɔna A̧ a e nɛ ɗaŋmɔ na.

²⁴Baa ŋma mɔ ko wisan ɗafi nɛ Sɔ̧ dúk hee gɔna gɛr bem nɛ yi dáà kɔ̧-a̧ ga.

²⁵Wisan kpa nyɔŋmɔ zú kɔfamɔ in bɔnɛ; ɓɛɛ wi nɛ dor nyɔŋmɔ‘i nu-a̧ nɛ́ wi-gbɛ-zu.

²⁶Ɓará mɔɔ-nyɔŋ ko ŋma-wi er-a yinɛ, nɛ́ gbɛɛ a̧.

²⁷Dorá mboi-oi-tom er widetom nɛ gbɛɛ fio.

²⁸Ŋma bii mbó, ɓɛɛ ɓi-aa gbina a nu: ɓɛɛ ŋma mɔɔ-oi-aa nɛ wa kpaa gan zu bɔnɛ nɛ́ ge?

²⁹Ŋma tók kɔ‘i nɛ de yoŋgɔ, ɓi-aa tɛɛ tok kɔ‘i nɛ ɗaŋ yoŋgɔ. Ɓɛɛ wi nɛ Gasa Wan tɛ zii tigɛr-a nɛ́ o?

³⁰Wi nɛ zui simbo wen n'a̧-a̧ foo wɔr-bii, ɓɛɛ nɛ̀ɛ̀ fo wɔr-i woyo, ɓɛɛ zuia simbo'i gbaka a̧ nɛ́ ge?

³¹Hegɔ mbɛt, wi nɛ zim mɔ wen o ɗaŋmɔ kɔ‘i, ɓɛɛ sii ɗoŋ nɛ́ɛ́ de kpɔk mɔ'ɔ nɔ‘i woyo. O tɛ yéŋ zer tɛ kɔfamɔ kɔ̧-a̧, o ndé? Ŋma gba̧a̧ zimamɔ kɔ̧-a̧‘i nɛ́ ge?