Read Northwest Gbaya SIRAK 35 Bible Online

SIRAK 35 - Northwest Gbaya bible

SIRAK 35

¹Ndaka ɗoŋ heembea nyɛma ŋmaa in ha̧mɔ nɛ dɔkaa.

²Hɛra tɛ nɛ o heembea nyɛma ŋmaa in ɗafa Sɔ̧ gaŋmɔ.

³Dee osoko ha̧ Sɔ̧ nyɛma ŋmaa in aa zɛzɛ.

⁴Ɓɛɛ ha̧mɔ ha̧ bii nyɛma ŋmaa ha̧a̧mɔ-zɔn-Sɔ̧

⁵Mɔ nɛ dee tɛ Gasa Wan nɛ zika ɗoŋ ha̧ ɗaŋmɔ, ɓɛɛ yuu gɔɔmɔ nyɛma ŋmaa in ɗafasɔ oi ɗaŋmɔ.

⁶Ká mɛ hɔ ti Gasa Wan nɛ gee er-mɛ na,

⁷o ɗafasɔ nɔ‘i lɛŋ nɛ́ nɛ ɗoŋ ha̧a̧nu ko Gasa Wan, mɛ dé kana.

⁸Ha̧-a̧mɔ ko widemɔ nɛ yuwar-a nyɛma sɛnɛ: nɔ-a ɓon zu taŋge-ɗafisɔ̧, ɓɛɛ de ɓisisi pɛr-aa ɗáŋ ɗaŋ hɔ tɛ Wan-mɛ-ŋgɔn.

⁹Gasa Wan kpɛk ha̧a̧mɔ ko widemɔ nɛ yuwar-a nɛ dea, ɓɛɛ tɛ-A̧ beka bi ɗoŋ-aa na ndo-ndo-ndo.

¹⁰Ká mɛ de ŋgoko ŋgimbi zɔna nin Gasa Wan na; ká mɛ kaŋ tɛ-mɛ ŋgimbi nɛ mɛ ha̧ zu-nyɔnɔ kɔ-mɛ ha̧ A̧ na mbɛt.

¹¹Saŋayi-mɛ a gɔn nɛ mami, ŋgimbi lɛŋ nɛ mɛ ha̧ mɔ ha̧ Gasa Wan, ɓɛɛ mɛ ha̧ zu-mɔ kɔ-mɛ nɛ desee.

¹²Mɛ ha̧ mɔ ha̧ Wan-mɛ-ŋgon nyɛm nɛ ɗoŋ mɔ n'A̧a̧ ha̧ha̧ mɛ, nɛ desee in nyɛm nɛ ɗoŋ kpaamɔ kɔ-mɛ.

¹³Wen Gasa Wan bó nɛ wi-ŋgoko na. A̧ tɛ ha̧ mɔ‘i pii nɛ ɗoŋ ha̧ mɛ woyo, war mɔɔrɔ-ɗoŋ-yiitoo.

¹⁴Ká mɛ we be yee a̧ nɛ o ha̧a̧mɔ gee na, A̧ beka kpɛk na.

¹⁵Ká mɛ e tɛ-mɛ nɛ o mɔɔ-zu̧zu̧ ɗafi nɛ Sɔ̧ na; beka gbak mɛ na, wen Gasa Wan nɛ wigɔnkita nɛ hok bii na.

¹⁶A̧ e wisan wɔkɔrɔɔ na; A̧ zii kɔfamɔ ko wi ndɔ usi bɔnɛ ha a̧ zii.

¹⁷A̧ e aia-nú ko be-oi tɛ geemɔ ka bo nɛ ko kogɛra na.

¹⁸Mɔ‘i bo nɛ miikɔ̧a̧ ko kogɛra ai ai a zaɗa-a̧ na nde?

¹⁹Ɓɛɛ bo nɛ hiɗimɔ kɔ̧-a̧ wuli nɛ wi de ha̧ a̧ mɛ hiɗi mɔ‘i na nde?

²⁰Gasa Wan kpɛ́k wi nɛ de tom ha̧ A̧ nɛ see kpók kpɛk, ɓɛɛ akamɔ kɔ̧-a̧ hɔ́ hɔɔ yiwese mɛ.

²¹Kɔfamɔ ko ga̧-a̧wi hɔ́ yiwese hɔɔ, ɓɛɛ ka kɔfamɔ‘i hɔ́ na, see-a gá̧ na; ka Gasa Wan de ŋma mɔ na, tɛ-a̧ mbɔi na mbɛt,

²²hɔ́ nɛnɛ́ ŋgimbi n'A̧a̧ tɛ de nɛ mɔ nɛ nyɛma sɛnɛ in o widemɔ nɛ yuwar-a, gɔ́n nɛ de kita; Gasa Wan beka nik naŋ mɔ na, A̧ beka de munyal in wa na hɔ́ nɛnɛ́ ŋgimbi n'A̧a̧ tɛ gbin nɛ gba̧a̧-ɔ́m o wi nɛ bó nɛ kó na.

²³A̧ tɛ kifi er ha̧ o gɔni zuduk, kum nɛ o wi-de-ŋgazu, in gbin nɛ o dɔra-wan ko o wi-de-gɔɔmɔ,

²⁴hɔ́ nɛnɛ́ ŋgimbi n'A̧a̧ tɛ yoɓi nɛ bii, nyɛm nɛ ɗoŋ deemɔ kɔ-wa, in ha̧a̧ mɔ ha̧ o bii nyɛm nɛ ɗoŋ tom in mɔ nɛ wa tá mɛ de,

²⁵hɔ́ nɛnɛ́ ŋgimbi n'A̧a tɛ gɔn nɛ kita zu dukbii kɔ̧-A̧, há nɛ desee ha wa, nɛ ɗoŋ deako kɔ̧-A̧.

²⁶Deako kɔ̧-A̧ tɛ ŋgimbi ditasee ɔ́ dee hee tɛaa ko nyiá-koro mɛ bɛ̀ɛ̀ ga.