Read Northwest Gbaya SIRAK 36 Bible Online

SIRAK 36 - Northwest Gbaya bible

SIRAK 36

¹Kɔfasɔ̧ wen zu gboa tɛ bara ko Israɛl in dee wan ha̧ a̧ Ɛnɛ dé ko h’ɛ́ɛ́, Gasa Wan, Sɔ̧ nɛ ɔ wan zu mɔ lɛŋ.

²Ɛnɛ dé ha̧ o gɔni-nu lɛŋ mɛ yu kii'Nɛ́.

³Ɛnɛ úsí er-‘Nɛ́ ɗɔɔ yí o gɔni duk, ha̧ wa mɛ zɔk ŋgai k’Ɛ́nɛ́.

⁴Hee mɔ n’Ɛnɛ usa ha̧ wa'e war tɛ-‘Nɛ́ ɔ sa̧-a̧ tɛ mɔ n’Ɛnɛ dee in yɛɛ ga, hegɔ mbɛt, Ɛnɛ usi gasi k’Ɛ́nɛ́ h’ɛ́ɛ́ tɛ dea ŋga mɔ in wa,

⁵ha̧ wa mɛ iŋ ti'Nɛ́, hee mɔ n’ɛɛ́ iŋa k’ɛ́ɛ́ nɛnɛ‘e ŋma Sɔ̧ bó yak zu'Nɛ́ na’ɛ, Gasa Wan.

⁶Ɛnɛ dé o mbe mɔɔ-usi-mɔ k’Ɛ́nɛ́ woyo, ɓɛɛ Ɛnɛ ku̧ o mɔɔkifi k’Ɛ́nɛ́ woyo.

⁷Ɛnɛ usi ŋgai mɛ er-‘Nɛ́ in ɓaa-‘Nɛ́ mɛ wiiko.

⁸See'Nɛ́ a ŋgai siti, ɓɛɛ Ɛnɛ usi tu̧u̧see k’Ɛ́nɛ́.

⁹Ɛnɛ kúm wi-ba-zu dúk nɛ Ɛnɛ, ɓɛɛ Ɛnɛ gbɛ wisɛn.

¹⁰Tɛ-‘Nɛ́ a mbaŋ ɗoŋ o ha̧a̧nu k’Ɛ́nɛ́. Ɛnɛ dé mɔ nɛ hayaa, wen ha̧ nyɛrɛ o gasamɔ k’Ɛ́nɛ́ mɛ hu̧r dam fara lɛŋ.

¹¹Wee-nyimsea k’ɛ́nɛ́ a do o wi nɛ ɓɔna nɛ kpasa, ɓɛɛ o wi nɛ dé dukbii k’Ɛ́nɛ́ nɛ bɔnɛ a kum lɛŋ.

¹²Ɛnɛ hɔ́n zu o gasawi ko o wisɛn nɛ tɔ̧‘e: «Ŋma bii nɛ nyɛma in yɛɛ bo na.» wo'i.

¹³Ɛnɛ mɔ́i o zudukbii ko Jakɔb lɛŋ,

¹⁶b Ɛnɛ há̧ nu kɔ-wa si nɛ ɗoŋ ha̧ wa hee tɛ ku̧u̧naŋmɔ ga.

¹⁷Gasa Wan, Ɛnɛ dé ko ha̧ dukbii nɛ‘i aa nin-‘Nɛ́ ha̧ a̧‘i. Ɛnɛ dé ko ha̧ Israɛl, n’Ɛnɛ baa so hee kaya bem ga'i

¹⁸Ɛnɛ dé ko ha̧ gasa ye nɛ sa̧a̧ Fara k’Ɛ́nɛ́ a̧-a̧ sɛnɛ, Jerusalɛm, fara-duk k’Ɛ́nɛ́.

¹⁹Ɛnɛ dun ye Siɔn nɛ nyɛrɛ o ŋgaŋamɔ k’ɛ́nɛ́. Ɛnɛ dun sa̧a̧ Fara k’Ɛ́nɛ́ nɛ gasamɔ k’Ɛ́nɛ́.

²⁰Ɛnɛ dé sedaako wen mɔ n’Ɛnɛ dea dika ku̧u̧naŋ fara mɛ. Ɛnɛ dé ha̧ wen nɛ o witɔ̧wen oi nu-‘Nɛ́ tɔ̧ɔ̧ mɛ hɔ gba̧a̧.

²¹Ɛnɛ há̧ mɔɔ-oi ee-ta ha̧ o wi nɛ zɛm'Nɛ́, Ɛnɛ dé ha̧ wen ko o witɔ̧wen oi nu-‘Nɛ́ mɛ duk nɛ kpasawen.

²²Gasa Wan, Ɛnɛ kpɛ́k kɔfamɔ ko o widetom k’Ɛ́nɛ́, nyɛm nɛ ɗoŋ dee-demɔ k’Ɛ́nɛ́ si tɛ dukbii k’Ɛ́nɛ́, wen ha̧ o bii nɛ ya zaŋnu lɛŋ mɛ iŋ nde Ɛ́nɛ́ nɛ Gasa Wan, Sɔ̧ nɛ dúk kpoo nɛ kpoo. Iŋa kɛ̧ɛ̧ mgbara mɔ

²³Gbazaŋ gur o nyɔŋmɔ nɛtɛ nɛtɛ; mɔ kpɔk, o ŋma nyɔŋmɔ a̧-a̧ sɛnɛ nɛ dee gan o ŋmaa

²⁴Nɛ́ hee mɔ nɛ war-gɛr iŋ nɛti kpoo-saɗi tɛ nyɔa̧-a̧'ɛ ga, a wi-iŋ-mgbara-mɔ tɛ iŋ nɛ ti o wen-ndela.

²⁵Gɔɔmɔ kɔ̧ see-wi ha̧ nɛ ɗaŋsee ha̧ wi, ɓɛɛ wi-iŋ-mgbara-mɔ tɛ iŋ kifa er ha̧ a̧. Hoká koo

²⁶okóò kpɛ́k kɔ‘i wi nɛ nu tum; mɔ kpɔk, o ŋma zɔŋa a̧-a̧ sɛnɛ nɛ dee gan o ŋmaa.

²⁷Dee ko okóò há̧ nɛ desee ha̧ wii, ɓɛɛ mɔ‘i gana zu mɔ lɛŋ nɛ wiwii kɔ̧a̧.

²⁸Ka a̧ nɛ boo nɛ kɔ̧ɔ̧mɔ in nyɔɔ̧-wen, ɓɛɛ ŋma wan-desee hee wii kɔ̧-a̧ ga bo na.

²⁹Wi nɛ bá koo ku̧ nɛ naŋ dee mbɔi; a̧ kpaa wi-gbak-a̧ nɛ hɔɔ ŋmaa in a̧, in wi-ɛk-tɛ kɔ̧-a̧.

³⁰Fara nɛ ɓoramɔ bó sɛnɛ na dak nɛ o wi-ɗaŋ-mɔ. Fara nɛ okóò bó sɛnɛ na, wiwii yár nɛ mbɔɗɔnu, nyim nɛ tɛ nɛnɛ.

³¹Wi nɛ tɛ e tɛ nɛ haya wizu̧zu̧ nɛ ndɛn nɛ tɛ o ye, nɛ́ o? Nɛ́ kale kpɔk mɔ mbɛt in wiwii nɛ bó nɛ tua na, ɓɛɛ nɛ ɔ́ fara lɛŋ nɛ zɛ ba a̧ sɛnɛ.