Read Northwest Gbaya SIRAK 37 Bible Online

SIRAK 37 - Northwest Gbaya bible

SIRAK 37

¹Dɛ sɛm in ɗaŋ sɛm Sɛm lɛŋ tɔ̧‘e: «Mi nɛ sɛm, mi mbɛt» mɔ kpɔk, pɛrti sɛm'i nɛ sɛm hur nin gee.

²Ŋma mɔɔ-ziimɔ nɛ tɛ̀ɛ̀ nyɛm ŋmaa in fio hee ŋma gbamayari in sɛm nɛ kpai nɛ wisɛn ga bó na.

³Hó yaa-ta-ɗaŋmɔ, mɛ gboo nɛ dee, sá mɛ kpee nɛ zu nu nɛ ɔrmɔ'ɛ ge?

⁴Ŋma gbamayari kpá nɛ kpɔk desee in sɛm kɔ‘i ŋgimbi bɔtɛ, ka ŋgimbi bɔnɛ hɔ́, ɓɛɛ a̧ tɛ̀ɛ̀ bá zu dúk nɛ a̧.

⁵Ŋma gbamayari zɔk bɔnɛ in sɛm kɔ‘i wen zu nyɔŋmɔ, ɓɛɛ ka ŋgimbi biro hɔ́, ɓɛɛ a̧ ba nɛ ŋgee husi nɛ tɛ.

⁶Ká tɛ-mɛ bi ɗɔŋ sɛm kɔ-mɛ kɔ̧ see-mɛ na, ɓɛɛ ká ta-zu-mɛ bi ɗɔŋ a̧ ŋgimbi kpaa mɔ kɔ-mɛ na. De wi-tɔ̧-mbɔrɔ in ɗaŋ-a

⁷Wi-tɔ̧-mbɔrɔ lɛŋ dúk tɛ nɛ war wen kɔ‘i, ɓɛɛ o ŋma tɔ̧ kɔ‘i mbɔrɔ wen zu wi nɛ zu wi.

⁸Mɛ kasi zu-mɛ nɛ wi-tɔ̧-mbɔrɔ, mɛ kii ndaa mɔ n'aa kɔ̧a̧ sɛ́ — wen a̧ kii nɛ war mɔ kɔ̧-a̧ mɛ́ zu-a sɛ́ — ŋma ɓɛɛ a̧ kii mɛ ɔr nɛ mɛ.

⁹Ɓɛɛ ka a̧ tɛ̀ɛ̀ tɔ̧ ha̧ mɛ‘e: «Yuwar deemɔ kɔ-mɛ ɔ dee», ɓɛɛ a̧ tɛ̀ɛ̀ yor nɛ nyɛia̧ mɛ zɔk nɛ mɔ nɛ tɛ hɔ zu mɛ.

¹⁰Ká mɛ ak mbɔrɔ er wi nɛ e see tɛ-mɛ na, ɓɛɛ mɛ hu̧si mɔ nɛ mɛ kɔ̧a̧ mɛ de lɛŋ nɛ o wi nɛ a̧-a̧ see mɔ kɔ-mɛ.

¹¹Ká mɛ ak mbɔrɔ er ŋma okóò wen zu gɔya-a na, koo wi-kii wen zu biro na, koo wiɗɔrmɔ ŋgimbi hi̧fa̧ mɔ na, koo wi-hifi-mɔ ŋgimbi ɗɔra mɔ na koo wi-de-sunu wen zu dea osoko na, koo wi-ŋga-er wen zu dee demɔ na, koo wi-tɛɛri wen ŋma tom na, koo wi-ba-sede-tom kpɔk wese wen zu kaɗa ko tom na, koo wi-de-tɛɛri-tom wen zu ŋma gasa tom na, Ká mɛ zii mbɔrɔ nú ŋma wi nɔ‘i kpɔk na.

¹²Ɓɛɛ mɛ gbam in kpasa wiyukii Sɔ̧, nɛ mɛ iŋa'e ndak nɛ ɗoŋ heembea, nɛ taamɔ kɔ̧-a̧ hɔɔ ŋmaa in kɔ-mɛ, in nɛ tɛ gbak mɛ, ŋgimbi tikaa kɔ-mɛ.

¹³Mɛ yor zu mɔ nɛ see-mɛ usi ha̧ mɛ, wen ŋma bii nɛ demɔ nyɛm tɛ-mɛ hee see-mɛ‘i ga bo na.

¹⁴Wen taamɔ ko bíí usi mɔ usi ha̧‘i nɛ sa̧-a̧ gan giiwi-pɛm-mɔ nɛ‘i aa zu kusa fara.

¹⁵Zu mɔ‘i lɛŋ, mɛ ak mɔ er Wan-mɛ-ŋgɔn ha̧ A̧ mgbɔ mɛ si tɛ kpasawen. Kpasa ɗuka-taamɔ in fio-a

¹⁶Ɛnɛ zii ŋmaa nɛti, seka mɛ ku̧u̧ tom; mɛ ta mɔ kaɗi seka mɛ ku̧u̧ naŋ ŋma mɔ.

¹⁷Kunin o taamɔ lɛŋ nɛ́ see.

¹⁸Gbaa-er-a gbái tɛ fara naar: demɔ in ɗaŋmɔ, duka-kpasa in fio, ɓɛɛ nɛ́ leɓe-wi a kɛ̧ kɛ̧ɛ̧ mgbara-a.

¹⁹Tɛ ŋma bii ɔ́ kpɔra wen usa mɔ há̧ o ŋma-a̧, ɓɛɛ ŋma gba̧a̧mɔ kɔ̧-a̧ wen tɛ-a̧ bo na.

²⁰Ŋma wibúrwen dak nɛ wen pii zu, a̧ beka kpa be nyɔŋmɔ na, koo tikiɗi.

²¹Gasa Wan dee ha̧ a̧ mɛ de yi bii na, wen a̧ bo nɛ ŋma be ɗuka-taamɔ na, koo tikiɗi.

²²Ŋma bii a̧-a̧ nɛ ɗuka-taamɔ wen zu a ɓɛɛ; mɔɔ-oi iŋamɔ kɔ̧-a̧ yá wen tɛ-a̧.

²³Wan-ɗuka-taamɔ usi mɔ usi ha̧ dukbii kɔ‘i, ɓɛɛ wi nyɛma mɛ e te-wi nɛ mɔ nɛ gbó nɛ tɛ iŋamɔ kɔ̧-a̧.

²⁴Toka de yoŋgo hura wan-ɗuka-taamɔ dinyɔ́m, ɓɛɛ bii lɛŋ nɛ zɔk a̧ ŋgan nɛ mɔ‘e a̧ nɛ wan-desee.

²⁵Wi tɔ́r zɛ duka-kpasa ko bii tɔr, ɓɛɛ wi nyɛm mɛ tɔr war zɛ ko Israɛl na.

²⁶Wan-ɗuka-taamɔ tɛ duk nɛ yaa-e-nɛ-ta mgbara dukbii kɔ‘i, ɓɛɛ nin-a tɛ duk kpoo nɛ kpoo. Kasa zu

²⁷Bem kɔ‘m, mɛ we tɛ-mɛ nɛ tɛ-mɛ tɛ dukaa kɔ-mɛ; mɛ zɔk mɔ nɛ duk nɛ ɗaŋá wen mɛ, ɓɛɛ mɛ dor tɛ-mɛ sɛnɛ.

²⁸Wen bó nɛ mɔ lɛŋ a bá nɛ bii lɛŋ na, ɓɛɛ bó nɛ mɔ lɛŋ a ɔ dee tɛ bii lɛŋ na.

²⁹Ká mɛ de ɗaɗa mɔ lɛŋ nɛ ɔ dee tɛ-mɛ na, ɓɛɛ ká mɛ nak tɛ-mɛ wen nyɔŋmɔ gan na.

³⁰Wen nyɔŋa mɔ gan zu-wi nɛ mɔɔ-ha̧-zɛ́ɛ́, ɓɛɛ ɗaɗa nɛ mɔá-ha̧-zɛ́ɛ́ ɓaɓa-zaŋ.

³¹Bíí nɛ dɔkaa fea wen zu ɗaɗa kɔ-wa, ɓɛɛ nɛ kɔ wi nɛ kasi ko'i zu, zɛ-a tɛ dɔk zaŋnu.