Read Northwest Gbaya SIRAK 38 Bible Online

SIRAK 38 - Northwest Gbaya bible

SIRAK 38

¹Wan-nyina in zɛ́ɛ́ Mɛ tu̧ tɛ wan nyina, wen zu o tom kɔ-a̧, wen a̧ mbɛt nɛ́ Gasa Wan a̧ dee a̧.

²Kpasa bii tɛ zɛ́ɛ́ tɛ nɛ tɛ Wan-mɛ-ŋgɔn, ɓɛɛ nɛ́ Gasa Wan'i a ha̧ ŋgai-a ha̧ wan-nyina.

³Iŋamɔ ko wan-nyina de dee ha̧ a̧ mɛ ba zu-a nɛ ŋgɔn; o gasawi mbɛt yéŋ nɛ a̧.

⁴O nyina gbó nɛ tɛ nu; nɛ́ Gasa Wan a dee wa. Wi-iŋ-mgbara-mɔ e wa tɛ geemɔ na.

⁵Ɛɛ iŋa nɛ mbetɛ nde nɛ́ ɓirate nɛ‘i pii ɗɔɔ páŋ yi ɓeemɛ a̧ dee ha̧ a̧ mɛ kifi de yi-nɔɔ. Nɛ́ hegɔ a'i zɔka nɛ ŋgai ko Sɔ̧.

⁶A̧ ha̧iŋamɔ ha̧ o bii lɛŋ wen ha̧ wa mɛ zɔn A̧ wen zu kpɔraa ko o nyina kɔ-A̧.

⁷Nɛ́ o nyina nɔ‘i a wi-gi-nyina zaŋ nɛ ŋmaa, ɓɛɛ dɔkta baa kpasi nɛ zɛ́ɛ́, gá̧ nɛ nyimmɔ mbɛt.

⁸Hegɔ, tom ko Sɔ̧ kaɗi na, ɓɛɛ hayatɛ nɛ tɛ nɛ tɛ A̧ dama zaŋnu.

⁹Bem kɔ‘m, ká mɛ dúk wɔkɔro ŋgimbi zɛ́ɛ́ kɔ-mɛ na; mɛ kɔfi Gasa Wan, ɓɛɛ A̧ tɛ kpasi mɛ.

¹⁰Mɛ siŋ o yɔákaya kɔ-mɛ pi nu, mɛ demɔ nɛ yuwar-a, mɛ fɔ́r see-mɛ tɛ ɗaŋmɔ lɛŋ.

¹¹Mɛ a fuu-nyama in zɛzɛ ha̧ Gasa Wan wen ha̧ tɛ-A̧ mɛ mbaŋ ɗoŋ mɛ. Mɛ há̧ kpasa mɔ ha̧ nyɛm nɛ ɗoŋ kpaamɔ kɔ-mɛ.

¹²Ɓɛɛ mɛ sá dɔkta, wen a̧ mɓɛt nɛ́ Gasa Wan a dee a̧; ɓɛɛ, ká á nyɛi nɛ mɛ na, wen mɛ́ a̧-a̧ nɛ haazi kɔ̧-a̧.

¹³Ŋma ŋgimbi a̧-a̧ sɛnɛ, nɛ yuwar kpaa hayatɛ kɔ-mɛ tɛ dúk kɔ er-wa.

¹⁴Wen wa mbɛt, wa tɛ kɔfi Gasa Wan mɛ gbak wa, ha̧ wa mɛ ga̧ zɛ́ɛ́ ko-mɛ, in mɛ kpa yi yina nɛ tɛ kpasi mɛ.

¹⁵Wi nɛ de ɗaŋmɔ ti wi nɛ dee a̧ a tik kɔ̧ er dɔkta. Hi̧a̧ fio

¹⁶Bem kɔ‘m, mɛ hi̧i̧ bii nɛ fea. Mɛ ba gima-fio hee bii nɛ see ŋmana ga. Mɛ gun a̧ nɛ dea ha̧ mɛ nyɛm sɛnɛ, ɓɛɛ ká mɛ e pɛsi kɔ̧-a̧ wɔkɔrɔɔ na.

¹⁷Mɛ nyim tɛ-mɛ nɛ kpasaa, miikɔ̧a̧ a gbo yi-mɛ nɛ wee, mɛ nyaŋ fio kɔ̧-a̧ nɛ dea, tɛ zɛ kpɔk koo yiitoo, wen ká bii tɔ̧́ ɗaŋ wen tɛ-mɛ; ɓɛɛ mɛ ga̧ see-mɛ zu gbɛŋa ɗɛɗɛ kɔ-mɛ.

¹⁸Wen fio nyɛma mɛ tɛ nɛ tɛ gbɛŋa-ɗɛɗɛ, ɓɛɛ ɗaŋsee kaɗi ŋgai tɛ-wi kaɗi.

¹⁹Ɗaŋsee a kaɗi wese zui yi-fio; bɔnɛ nɛ tik zu wi de ha̧‘i mɛ duk nɛ ɗaŋsee, see-wi kɔ̧ duka nɛ ɗaŋsee ɓɔnsɛnɛ na.

²⁰Ká mɛ kpa ɗaŋsee gan batɛ na, mɛ wɛr a̧ e nɛ mgbaar, ɓɛɛ mɛ tá nɛ mɔ mɛ ɗoŋ.

²¹Ká tɛ-mɛ bi na, piaɗoŋ bo na. Ɗaŋsee kɔ-mɛ‘i beka gbak fio na; a̧ tɛ pi̧ nɛ bɔnɛ zu mɛ woyo.

²²Tɛ-mɛ a mbaŋ ndemɔ nɛ kpaa a'i tɛ kpa mɛ mbɛt: mboyɛɛ, nɛ́ kɔ‘m, sɔsɔɔ nɛ́ kɔ-mɛ.

²³Ka'i gun fio kaɗi, ɓɛɛ tɛ-wi a̧ bi ɗoŋ a̧; ɔmi kɔ̧-a̧ a yaka kaɗi, ɓɛɛ nɛ tɛ-mɛ a gá̧. Tom ko wi-usi-heembea gana tom ko widetom nɛ er

²⁴Wi-usi-heembea kpa ɗuka-taamɔ wen zu dɔka ŋgimbi ɔmtɛ n'aa a̧-a̧ nɛnɛ. Wi nɛ bó nɛ mɔɔ-dee dɔ́k na nyɛma mɛ kifi wan-ɗuka-taamɔ.

²⁵Nɛ́ hee ge a̧ wi-ba-wara-ndai tɛ kpa nɛ ɗuka-taamɔ ge? A̧ bá ŋgimbi kɔ̧-a̧ lɛŋ wen gusa ndai; ŋgimbi kɔ̧-a̧ lɛŋ nɛ wen tom-ndai in tɔ̧ɔ̧ nyɛrɛ zu o be-mɔdai ɓɛɛ.

²⁶See-a lɛŋ a̧-a̧ tɛ dee o taŋá, ɓɛɛ nyaŋa-ya kɔ̧-a̧ lɛŋ nɛ́ wen ha̧nyɔŋmɔ ha̧ o be-zɔŋa ndai kɔ̧-a̧.

²⁷Nɛ́ kale kpɔk mɔ mbɛt in o wi-duk-zu-zuduk-tom nɛtɛ nɛtɛ, nɛ de tom zɛ nɛ wese, koo wi nɛ de o tumbal há̧ nɛ ŋgai-tɛ wen gɔna yaayi dap-aa nɛtɛ nɛtɛ: a̧-a̧ ha̧ see-a lɛŋ ha̧ tom'i mɛ nyɛm yi-wan n'aa zɔka, ɓɛɛ nyaŋa-ya kɔ̧-a̧ lɛŋ nɛ́ wen ɗafa ɗoŋ tom'i.

²⁸Nɛ kale kpɔk mɔ mbɛt wen kela nɛ dúk nu sɛn ka̧ mboɗa-boi: hakilo kɔ̧-a̧ lɛŋ a̧-a̧ tɛ tom duia boi; gbɛŋmɔ-wee mɔk nɛ murtɛ-a, ɓɛɛ tɛ-a gbɛŋ gbɛŋ zɛk zɛk sɛn ka̧ kusi-wee; giti boi-gusi-mɔ mgbe nɛ zer-a, ɓɛɛ yi-a ɓɔŋ za̧-a̧ tɛ yi-mɔ n'aa dui'i. See-a lɛŋ nɛ́ wen ha̧ tom kɔ̧-a̧ mɛ de, ɓɛɛ nyaŋa-ya-zɛ kɔ̧-a̧ nɛ́ wen yɔka ɗoŋ wa kpɛ́rɛ́rɛ́.

²⁹Nɛ kale kpɔk mɔ mbɛt in wiɓukpana, nɛ duk nu ka̧ tom kɔ‘i, zik nɛ mɔɔ-ɓu-kpana nɛ naŋ; see-a lɛŋ a̧-a̧ tɛ gbɛŋaa wen tom kɔ̧-a̧, ɓɛɛ a̧ ki ha̧ tom kɔ̧-a̧ mɛ nɛ́ nɛ́ɛ́ siti.

³⁰Gii, n'aa ŋmaa nɛ naŋ-a'i a̧ vai nɛ er-a'i, a̧ va̧i̧ nɛ er-a; see-a lɛŋ nɛ́ wen sɔ̧ɔ̧ ɗáŋ ɗoŋ-aa, ɓɛɛ ɔ zɛ kɔ̧-a̧ lɛŋ nɛ́ wen mbia fara-wee.

³¹O wi nɔ‘i lɛŋ e ta nɛ er-wa, ɓɛɛ koo o nde iŋa mgbara tom kɔ‘i.

³²Ka wa bó na, wi nyɛm mɛ de ye na, wi beka ɔ́ so sɛnɛ na, wi beka yar so sɛnɛ na; mɔ kpɔk, tɛ fara ba keta ko bii, wi beka sa wa mɛ zii taamɔ kɔ-wa na;

³³ɓɛɛ, sɛn fara mɔi̧a̧, wa beka ba zu-wa nɛ ŋgɔn na; wa beka ya nu zu kiti ko wigɔnkita na: wa iŋ kɔ-wa ŋma mɔ tɛ heembea na; wi zɔk iŋamɔ kɔ-wa ka bo nɛ iŋa o heembe na; Wi beka kpa wa mgbara tɔ̧ o tua-wen na;

³⁴ɓɛɛ wa de dee ha̧ o mɔ nɛ Sɔ̧ dea so nɛtɛ ɓeemɛ mɛ nɛ́ɛ́ siti, ɓɛɛ kɔfasɔ̧ kɔ-wa nɛ́ wen zu tom kɔ-wa.