Read Northwest Gbaya SIRAK 39 Bible Online

SIRAK 39 - Northwest Gbaya bible

SIRAK 39

¹Zɔna wi-we-ɗoŋ-heembea Wár ko wi nɛ e kɔ‘i ta tɛ taa mɔ zu heembea ko Wan-mɛ-ŋgɔn nɛtɛ, A̧ kii nɛ ndaa ɗuka-taamɔ ko o kuti wanusimɔ, ɓɛɛ a̧ ha̧ŋgimbi kɔ̧-a̧ lɛŋ wen taa mɔ zu o wen ko o witɔ̧wen oi nú Sɔ̧.

²A̧ kasi o wen ko o wi nɛ nin ɔ hura kasi, ɓɛɛ a̧ sara ndaa wen ko o wan-ɗuka-taamɔ.

³A̧ kii nɛ mgbak mgbara hu̧sá̧ gbaa tua-wen; A̧ zik gba̧a̧ ɗuka tua-wen si hɛ̧ɛ̧ si hɛ̧ɛ̧.

⁴A̧ de nɛ tom tɛ kɔ̧ o gasawi, ɓɛɛ a̧ usa tɛ-a sɛn mgbara o wannu. A̧ yár nɛ gɔngɛnɛ nu, wen a̧ iŋa mgbara mɔ nɛ dúk nɛ dea sɛn tɛ o bii in wan nɛ de na.

⁵A̧ e see-a tɛ gboo tuyɛ sitɛ Gasa Wan nɛ dee a̧, ɓɛɛ a̧ aia nú-a̧ ti Wan-mɛ-ŋgɔn. A̧ hu̧i̧ nu-a wen kɔfa Sɔ̧, ɓɛa a̧ gɔma er-a wen o ɗaŋmɔ kɔ̧-a̧.

⁶Ka Gasa Wan Sɔ̧ nɛ ɔ gasa a kɔ̧a̧, A̧ tɛ dun a̧ nɛ ɔmi zia mgbara mɔ, A̧ tɛ sɛ̧ wen ɗuka-taamɔ kɔ̧-a̧ hee yikoro ga, ɓɛɛ a̧ tɛ zɔn Gasa Wan tɛ kɔfasɔ̧ kɔ̧-a̧.

⁷Tɔ̧ɔ̧ mbɔrɔ kɔ̧-a̧ in iŋamɔ kɔ̧-a̧ tɛ nɛ́ nɛ yuwar-a, ɓɛɛ a̧ tɛ ta mɔ zu o hu̧sa̧mɔ ko Sɔ̧.

⁸A̧ tɛ de ha̧ o mɔ n'aa yamba mɛ tok tok, ɓɛ a̧ tɛ zɔn tɛ-a tɛ heembea nɔ̧ɔ̧-tɔk ko Gasa Wan.

⁹Bíí nɛ dɔka tɛ zɔn iŋamɔ kɔ̧-a̧; tɛ-wa beka bi dɔŋ a̧ na. Tɛ-wi beka bi ɗoŋ a̧ na, ɓɛɛ nin-a tɛ hur mgbara o bezaŋ yak nɛnɛ sɔ̧i̧.

¹⁰O gɔni zuduk tɛ tɔ̧ nyɛrɛ ɗuka-taamɔ kɔ̧-a̧, ɓɛɛ o giiwi tɛ zɔn a̧.

¹¹Ka a duk zaŋnu ɗoŋ-aa nyɛi, nin-a̧ tɛ hur gan o dɔkaa lɛŋ, ɓɛɛ ka a̧ fe, ɓɛɛ i̧i̧ nyɛma kɔ‘i a̧. Zɔna Sɔ̧ wen tom kɔ̧-A̧

¹²Ɗoŋ n'am taa mɔ kaɗi, mi tɛ tɔ̧ mbe wen woyo, wen mi duna dɛrɛŋ hee nyaŋazɛ nɛ mbɛra biɔ̧ ga.

¹³O sa̧-a̧ bem kɔ‘m, ɛnɛ zíí am, ɓɛɛ ɛnɛ gásí hee de ɓɔɔ-te nɛ gbai sɛn ka zaŋ yi ga.

¹⁴Ɛnɛ yá hee nyama nɛ pɛr-aa kur ɓisisi ga, ɓɛɛ ɛnɛ ya hee gbadɛŋ nɛ dó nɛ dea’ɛ ga. Ɛnɛ bá ger-‘nɛ́ nɛ ŋgɔn, ɛnɛ bii gima in o ŋmaa de nɛ osoko ha̧ Gasa Wan wen zu o mɔ lɛŋ n'A̧a dea.

¹⁵Ɛnɛ gasi nin-A̧, ɓɛɛ ɛnɛ zɔn A̧ dam fara lɛŋ, ɛnɛ gái gima mbɛ́r nɛ koloŋ, ɓɛɛ ɛnɛ tɛ zɔn A̧ hee mɔ'ɔ ga:

¹⁶Oe gee gba demɔ nɛ Gasa Wan dea wa! ɓɛɛ o ha̧a̧nu kɔ-A lɛŋ hɔ́ gba̧a̧ nyɛm nɛ ŋgimbi-a.

¹⁷Ka'i tɔ̧‘e: «i̧i̧ wen ge?» nde na, wen mɔ lɛŋ tɛ de tom nyɛm nɛ ŋgimbi-a. Tɛ wen mɛ nú-A̧, yi mɔi̧a̧ yor dɔŋgɔrɔá, ɓɛɛ o gbatɔp in o zer yor tɛ wen kɔ̧-A̧.

¹⁸A̧ ha̧nu-A̧, ɓɛɛ mɔ lɛŋ de hee mɔ n'A̧a kɔ̧a̧ ga; ŋma bii kpɔk nɛ nyɛma mɛ dor A̧ tɛ kpasa bii bo na.

¹⁹Tom ko o bii lɛŋ a̧-a̧ ti A̧; ɓɛɛ ŋma mɔ nyɛm mɛ yak yi-A̧ na.

²⁰A̧ zɔk mɔ dika tɛ ku̧u̧naŋ-a hɔ nɛnɛ sɔŋkur-aa, ɓɛɛ ŋma mɔ nɛ yek A̧ bo na.

²¹Ka'i tɔ̧‘e: «i̧i̧ wen ge nde?» na, wen mɔ n'A̧a dea lɛŋ a̧-a̧ nɛ tom kɔ‘i.

²²De yoŋgo kɔ̧-A̧ duk hee ha̧nanayi nɛ hura nu lɛŋ ga, hee bɔ̧zɔ̧ŋ nɛ duk dɔŋgɔro zu nu ga.

²³Nɛ hegɔ mbɛt a tu̧u̧see kɔ̧-A̧ tɛ dam nɛnɛ zu o wi nɛ iŋ A̧ hee mɔ n'A̧a kpaia so nɛ demɔka nu nɛ ŋga nu tɔ̧ŋ'ɛ ga.

²⁴O yuwar kɔ̧-A̧ ya kɔ‘i nɛ tanaa wen o sa̧a̧ bii kɔ̧-A̧; ɓɛɛ nɛ ko o ɗaŋwi nɛ́ o mɔɔ-to-naŋ a duna sɛnɛ.

²⁵Dika tɛ ku̧u̧naŋmɔ, Sɔ̧ dee o demɔ wen o de bii in o ɗaŋmɔ wen o ɗaŋwi.

²⁶Mgbak mɔ nɛ kasi bii tɛ dukaa kɔ̧-a̧ nɛ́ mɔ'ɔ: yì, wee, boi in tɔ́ŋ, fuu alkamaari, yibere in gɔrɔ, dɔ̧ɔ̧-waya-nyak, nɔ̧́ in laa.

²⁷Mɔ nɔ‘i lɛŋ nɛ o demɔ wen wi-yu-kii Sɔ̧, ɓɛɛ tɛ̀ɛ̀ kifi nɛ ɗaŋmɔ wen o ɗaŋwi.

²⁸Sɔ̧ dee o ŋma búk wen usa bɔnɛ ha̧ bii, ɓɛɛ ka see-A̧ nyim ɓɛɛ A̧ tɛ̀ɛ̀ ŋgai kpɔri kɔ-wa ŋgai ŋgai siti, ɗaŋ nɛ mɔ woyo. Nɛ ŋgimbi ɗaŋa mɔ a̧ wa kpɔ́r nɛnɛ siti, ga̧-a̧ nɛ see-Wi nɛ de wa.

²⁹Wee, ɓɔrɔ, kaɓa, fio, nɛ́ mɔá-usi-bɔnɛ ha̧ bii, oi ɗaŋmɔ.

³⁰O gake-nin o bokónam, o tore, o ŋga gɔk, gbapaa-kifi-er ha̧ o daŋwi wen zu yɔɔkaya kɔ-wa;

³¹wa lɛŋ, wa kpɛk nɛ ha̧a̧nu kɔ̧-A̧, dɛ nɛ nyɛŋɛ mbo nɛ zú nɛ desee. Sen zu nu wa ya dɔ̧ɔ̧ zɛm nɛ tom n'A̧a tɛ usi; ɓɛɛ ka ŋgimbi-a hɔ, wa bɛ̧ wen nu-A̧ na.

³²O mɔ nɔ‘i lɛŋ duk so nɛ sa̧-a̧ wen am dika tɛ ku̧u̧naŋ tom kɔ‘m; mi taa mɔ zu a, ɓɛɛ mi yɔr'e:

³³«O mɔ nɛ Gasa Wan dea lɛŋ ɔ́ dee. A̧ gbak bii gbak tɛ haazi lɛŋ, nyɛm nɛ ŋgimbi-a;

³⁴«Ká‘i tɔ̧‘e «ɛ̧ɛ̧ mɔɔ ɗaŋa gan i̧i̧» na, wen mɔ lɛŋ tɛ dúk nɛ demɔ tɛ ŋgimbi-a;

³⁵ɓɛɛ kinii ɛnɛ bii gima nɛ See'nɛ́ lɛŋ, in nɛ hee-gɛr, ɓɛɛ ɛnɛ zɔn nin Gasa Wan.»