Read Northwest Gbaya SIRAK 4 Bible Online

SIRAK 4 - Northwest Gbaya bible

SIRAK 4

¹Bem kɔ‘m, ká mɛ dor nyɔŋmɔ nú-wisan na, ká mɛ de ha̧ yí-wisan mɛ ɗuk na.

²Ká mɛ e wi nɛ wɔ gbɛ tɛ bɔnɛ na, ká mɛ ɗaŋ see-bii nɛ mɔ ɓan na.

³Ká mɛ ɗaŋ see-bii siti gan na; ká mɛ e ha̧ wi nɛ san ba mɛ zɛm mɔ na.

⁴Ká mɛ ndak wikɔfimɔ nɛ a̧-a̧ tɛ bɔnɛ na; ká mɛ hu̧si̧ sɔnti-mɛ nɛ wikɔsa na.

⁵Ká mɛ wɛr yí-mɛ nɛ wi nɛ mɔ ɓan na; ká mɛ de ha̧ a̧ mɛ fɔm mɛ na.

⁶Wen, ka a̧ fɔm mɛ zaŋ tu̧u̧see kɔ̧-a̧‘i, Wi nɛ dee a̧ tɛ zii kɔfamɔ kɔ̧-a̧.

⁷Mɛ de ha o bii mɛ zɔk mɛ nɛ de yí, mɛ zum zu-mɛ si ɗɔɔ ti gasawi.

⁸Mɛ yéŋ zer-mɛ tɛ sara ko wisan, ɓɛɛ mɛ kifi nú-wen ha̧ a̧ nɛ ga̧-a̧.

⁹Mɛ gbo bara sen er dɛ́-bara kɔ̧-a̧, ká mɛ de kii ŋgimbi nɛ mɛ gɔn kita na.

¹⁰Nɛ ko o be-oi, mɛ duk hee daa kɔ-wa ga, in hee wi ko nàà kɔ-wa ga: mɛ tɛ duk hee bem ko Wan-mɛ-ŋgɔn ga; A̧ tɛ kɔ̧ mɛ gan nàà kɔ-mɛ. Usamɔ ko ɗuka-taamɔ

¹¹Ɗuka-taamɔ ba nɛ nin o bem kɔ‘i e ŋgɔn, ɓɛɛ a̧ hakala o wi nɛ kii a̧.

¹²Wi nɛ kɔ̧ɔ̧ a̧ kɔ̧ɔ̧ nɛ duká-kpasá; o wi nɛ kúr mɛ tutuyɛ sút wen zu a̧ tɛ kpa gasa desee.

¹³Wi nɛ a̧-a̧ nɛ ɗuka-taamɔ tɛ kpa gasamɔ nɛ mɔɔ-oi. Gasa Wan tok nɛ de yoŋgo zu a̧ fara n'a̧-a̧ nɛ́ lɛŋ.

¹⁴O wi nɛ de tom ha̧ a̧ ɗafi nɛ Sa̧-a̧ Wi; o wi nɛ kɔ̧ɔ̧ a̧, Gasa Wan kɔ̧ɔ̧ wa mbɛt.

¹⁵Wi nɛ zii nu-a̧ tɛ gɔn gɛ́r-wen nɛ yuwar-a. Wi nɛ hɛr tɛ nɛ a̧ tɛ duk zaŋ ga̧a̧mɔ.

¹⁶Wi nɛ e ta nɛ a̧ tɛ kpa a̧ nɛ mɔɔ-oi, ɓɛɛ o bezaŋ-a tɛ kpa kpɔk mɔɔ-oi'i mbɛt.

¹⁷A̧ tɛ mgbɔ wi’ɛi nɛ tɛ o gɔŋga war-sɛ́, A̧ tɛ pi̧ kii in bele zaŋ-a. A̧ tɛ sakali a̧ nɛ ŋgaya heembea kɔ̧-a̧ hɔ́ nɛnɛ́ ŋgimbi n'A̧a̧ tɛ e nɛ ta nɛ a̧. A̧ tɛ we a̧ nɛ o ŋgaŋga gɛŋa kɔ̧-A̧.

¹⁸Hoɗoŋ-aa A̧ tɛ pii ɗoŋ zééŋ tɛ wi’ɛi, ɓɛɛ a̧ ha̧desee ha̧ a̧, ɓɛɛ A̧ gbaa ndaa hu̧samɔ kɔ̧-a ha̧ a̧

¹⁹ɓɛɛ, ka wi’ɛi yɔ yuwar, ɓɛɛ ɗuka-taamɔ tɛ siŋ a̧ pi nu, ɓɛɛ A̧ ee ha̧ a̧ mɛ tik. Kasá zu in yuu kii yí-bii

²⁰Mɛ zɔk o mɔ nɛ yak, ɓɛɛ mɛ kasi zu-mɛ tɛ dee ɗaŋmɔ. Ká mɛ de foe tɛ-mɛ́ nɛ tɛ-mɛ́ na.

²¹Wen ŋma foe-ir-wi pi tɛ ɗaŋmɔ a̧-a̧ sɛnɛ; ŋma a̧-a̧ sɛnɛ nɛ tɛ de ha̧ bii mɛ gasi mɛ in mɛ zɔk mɛ nɛ dea.

²²Ká mɛ fɛŋ zu-mɛ́ nɛ zu-mɛ na, ká mɛ fe fio-foe na.

²³Ká mɛ yú tɔ̧ɔ̧ wen ŋgimbi-a na.

²⁴Nɛ́ tɛ tɔ̧ɔ̧ wen a'i tɛ iŋ nɛ ɗuka-taamɔ kɔ-mɛ. Nɛ́ tɛ wen mɛ nu-mɛ́ a'i tɛ iŋ nɛ iŋamɔ kɔ-mɛ.

²⁵Ká mɛ ar ndaa kpasawen na, mɛ dé nɛ́ foe iŋamɔ kɔ-mɛ na ʼɛ̧́.

²⁶Ká foe de mɛ tɛ gbará ɗaŋmɔ kɔ mɛ na, ká mɛ we gɔna ti foka nanayi na.

²⁷Ká mɛ e ha̧ mgbelewi mɛ daŋ zu mɛ na. Ká mɛ zɔ́k ɗoŋ mɔ ko wan-ŋgai de nɛ kɔ-mɛ na.

²⁸Mɛ de biro wen kpasawen hɔ́ nɛnɛ́ tɛ fio, ɓɛɛ Gasa Wan Sɔ̧ tɛ de biro zu mɛ.

²⁹Ká mɛ ŋgai tɛ-mɛ tɛ tɔ̧ɔ̧ wen, ɓɛɛ mɛ tɛ̀ɛ̀ dúk nɛ wi-tɛɛri in wi nɛ de gba̧a̧mɔ-na, tɛ deamɔ kɔ-mɛ na.

³⁰Ká mɛ duk nɛ dila sɛn tɛ kɔ-mɛ, ɓɛɛ mɛ tɛ̀ɛ̀ dúk nɛ wi-kii mgbara o widetom kɔ-mɛ, na.

³¹Ká mɛ nyɛi er-mɛ wen baa mɔ, ɓɛɛ mɛ ɓurá ŋgimbi ha̧si nɛ ɗoŋ, na.