Read Northwest Gbaya SIRAK 40 Bible Online

SIRAK 40 - Northwest Gbaya bible

SIRAK 40

¹Bɔnɛ ko bii zaŋnu Dukaa ko bii zaŋnu nɛ́ gasa bɔnɛ, ɓɛɛ dita tui a̧-a̧ zu o bem ko Adam, dika wese nɛ wa gboo nɛnɛ kɔ̧ zaŋ naa kɔ-wa, hɔ́ nɛnɛ wese nɛ wa tɛ si nɛ ɗoŋ tɛ nu, nɛ dúk nɛ nàà ko bii lɛŋ.

²Mɔ nɛ wa ta, mɔ nɛ ba fara kɔ̧ see-wa in nɛ pi̧ kii tɛ wa, nɛ́ wese fio kɔ-wa.

³Dika tɛ wi nɛ dúk nu zu kiti-wan hɔ nɛnɛ tɛ gee bii nɛ duk nu zu fuunu in bùk,

⁴Dika tɛ wi nɛ pi̧ nɛ gbɛ̧ laa-wan in mɛtɛwol hɔ nɛnɛ tɛ wi nɛ pi̧ nɛ gee fɛŋa zɔ̧-laa,

⁵kana nɛ nyimsea, ee see tɛ ŋmaa, sakalamɔ in naka-tɛ, kii fio, kiri in kpɛri. Ɓɛɛ ka ŋgimbi ɔm tɛ zu gado hɔ́, ɓɛɛ yá zɛ tɛ̀ɛ̀ kai nɛ́ o mbe sakalamɔ tɛnɛ woyo.

⁶Dika tɛ be ɔɔ tɔŋ-ya wen ɔmatɛ, wen'i nu'i ɓɛɛ o zu-kii hɔɔ mɛ sakali wa, hee mɛ́ bu-wese ga. Wa zɔk tɛ-wa zaŋ zu hee o wi-yu-kii feaa yi biro ga.

⁷Ŋgimbi nɛ dúk hee wa a tɛ fe'i ga, ɓɛɛ wa tuna ɓɛlɛm ya nɛnɛ ɓekeyeke wen zu gee tum kii nɛ wa dea.

⁸O ŋgaŋa mɔ nɔ'ɔ tɛ hɔ zu mɔ lɛŋ nɛ Sɔ̧ dea dika nɛ tɛ bii hɔ nɛnɛ tɛ saɗi, ɓɛɛ nɛ́ war ko o ɗaŋwi a tɛ ŋgai batɛ, war mɔɔrɔ-ɗoŋ-yiitoo.

⁹O ŋgaŋa mɔ nɔ‘i nɛ fio, tɔk, kpɛri, gbapaa, biro, kaɓa, ɗaŋamɔ, ŋga bɔnɛ.

¹⁰O mɔ nɔ‘i lɛŋ dea wen o ɗaŋwi, ɓɛɛ nɛ́ wen zu wa mbɛt a gasa ha̧a̧yi hɔɔ so sɛnɛ.

¹¹Mɔ nɛ tɛ́ nɛ tɛ nu tɛ si ɗoŋ tɛ nu, ɓɛɛ mɔ nɛ tɛ́ nɛ tɛ yi tɛ si ɗoŋ tɛ gbatɔp. Mɔ nɛ ɔ dee in wan nɛ de na

¹²Ha̧-a̧mɔ-ye-wi in gɔámɔ tɛ kaɗi, ɓɛɛ nɛ́ kó yoraa ɗɔŋ nú tɛ duk kpoo nɛ kpoo.

¹³O mbɔi ko o gɔɔwi tɛ gɔn hee be-zer mɛ bɛ̀ɛ̀ ga, ɓɛɛ yaka hee ŋga mbaŋa-koro ŋgimbi ndiɓa-koro ga.

¹⁴O wi nɛ huia er wen ha̧mɔ tɛ kpa desee, ɓɛɛ o ɗaŋwi tɛ tir kɔ‘i a nu.

¹⁵O bezaŋ o ɗaŋwi beka gba er na, ɓɛɛ o ɗaŋ kunin-wa tɛ yá nɛ zu yɔɔ ta

¹⁶Wi zuɗi toro nɛ hɔ́ ka̧ zaŋ yi ti ha̧ o gee zɔ̧ lɛŋ.

¹⁷Dee demɔ in bíí bó dúk hee de ti-giɔ̧-ɔmtɛ ga, ɓɛɛ ha̧mɔ nɛ ta-tɛ ha̧ bíí tɛ́ duk yi-Sɔ̧ ɓɔnsɛnɛ. Demɔ nɛ gana ŋma lɛŋ nɛ́ yuu kii Sɔ̧

¹⁸Wi nɛ a̧-a̧ nɛ mɔ nyɛm er in widetom ya zaŋ ga̧a̧mɔ, ɓɛɛ nɛ́ wi kpaa gasa mbɔi a gana wa lɛŋ nɛ deseee

¹⁹Koo o bem, in dee gasa ye nɛ́ mɔ'ɔ ha̧ hura nin, ɓɛɛ mɔ nɛ dee gan mɔ nɔ‘i yiitoo'i lɛŋ nɛ́ okóò nɛ demɔ nɛ yuwar-a.

²⁰Dɔ̧ɔ̧ in biɔ̧ ha̧ nɛ desee, ɓɛɛ kɔ̧ɔ̧ ɗuka-taamɔ ha̧ nɛ desee gan

²¹Fol in koloŋ ɗafi nɛ gɛr gima, ɓɛɛ de nu-wen gana mɔ nɔ‘i yiitoo'i lɛŋ.

²²Gbaayí kii kɔ‘i nɛ de ɓɔɗa-te in de saŋayi, ɓɛɛ nɛ́ de ɓɔɔ-fɔ a dee gan wa lɛŋ.

²³Kpaa ŋmaa ko sɛm in ko gbamayari ɔ dee, ɓɛɛ wan nɛ gana nɛ́ kpaa ŋmaa ko kóò in wii kɔ̧-a̧.

²⁴O nya-wi in wi-ye-ɗoŋ-wi gbak wi ŋgimbi bɔnɛ, ɓɛɛ nɛ́ ha̧mɔ nɛ ta-tɛ a kpasi wi.

²⁵Lɔr in bu-mbɔi nɛ́ o mɔ nɛ de ha̧‘i mɛ i̧si̧ nu mitak, ɓɛɛ nɛ́ de mbɔrɔ a gbak gan.

²⁶Mbɔi in ŋgai nɛ́ mɔ'ɔ-ha̧-nɔɔŋgiɗi, ɓɛɛ nɛ́ yuu kii Gasa Wan a gana. Ŋma mɔ ɓan wi-yu-kii Gasa Wan na; wi kii ŋma wi-gbak-wi nɛtɛ gan zu-a ɓɔna.

²⁷Yuu kii Gasa Wan nɛ de giɔ̧-ɔmtɛ, ɓɛɛ a gɔn zu wi gan kóó ge gasamɔ ge nde lɛŋ. Kɔfa mɔ er bii de na

²⁸Bem kɔ‘m, ká mɛ dúk nɛ wikɔfimɔ er bii na; gana so feaa ba nɛ kɔfa mɔ er bíí.

²⁹Duka-kpasa ko wi-zɛm ɗɔɔ nu-bii bó nɛ kpasa duka-kpasa na. A̧ ɗáŋ nɛ wargɛr-a̧ nɛ gɔni nyɔŋmɔ; wi-iŋ-mɔ in wi-iŋ-de-dukaa beka de pɛrti mɔ‘i na.

³⁰Kó wi nɛ iŋ yuwar de-dukaa na, nyɔŋmɔ n'aa kɔfa er-bii ɔ nyɔɔ̧ ɔɔ nu-a; mɔ kpɔk, ŋma wee tɛ gbɛŋ nyak-zaŋ-a̧.