Read Northwest Gbaya SIRAK 41 Bible Online

SIRAK 41 - Northwest Gbaya bible

SIRAK 41

¹Fio Hó fio! oe gee tu̧u̧see nɛ wi nɛ dúk mɔ kɔ‘i gɛ́ɗɛ́k mgbara o mbɔi kɔ‘i, nɛ ɗɛɗɛ gɔn mgbút na, nɛ mɔ kɔ̧-a̧ lɛŋ nɛ́ nɛ dea, in nɛ ɓɔna nɛ oi ŋgai-tɛ wen dea o mɔ nɛ ɔ nyɔá̧ sɛn tɛ a̧, oe gee tu̧u̧see n'a̧-a̧ kpá tɛ taa mɔ wa!

²Hó fio! gɔna-gɛr wen kɔ-mɛ ɔ́ dee wen wi nɛ a̧-a̧ tɛ san, nɛ bó nɛ ŋgai ɓɔ na; wen wi nɛ sɔka kukuɗú, nɛ taamɔ gana zu, nɛ kpa ɗaŋsee wen sakalamɔ, ɓɛɛ nɛ bó nɛ munyal ɓɔna!

³Ká mɛ de kii fio na! Tɛ-mɛ a mbaŋ ɗoŋ o wi nɛ yaka ti ha̧ mɛ in o wan nɛ tɛ ndak ɗoŋ mɛ.

⁴Nɛ́ heembea ko Gasa Wan wen mɔ lɛŋ nɛ ɔ́m ɔm. Ɓɛɛ wen ge sa'i tɛ bɛ̧ mɔ nɛ Wan-mɛ-ŋgɔn kɔ̧a̧ ge? Kóó mɛ duk zaŋnu pɛ ɓu, kóó pɛ gɔmŋmaa, kóó pɛ booro, ŋma wen ko bii nɛ a̧-a̧ kɔ‘i ye ko fio bo na. Bɔnɛ oi tom ko o wi-de-ɗaŋmɔ

⁵O bem ko o wi-de-ɗaŋmɔ kifi kana nɛ o ɗaŋ bem nɛ ndɛ́n nɛ nutua ko o ɗaŋwi.

⁶Mɔɔ-oi ko o bem ko o wi-de-ɗaŋmɔ si nɛ nu sɔɔgee. Gasa ziimɔ tɛ tik zu o bezaŋ-wa ɓɔnsɛnɛ.

⁷Dáà nɛ iŋ Sɔ̧ na tɛ zii ɗaŋ wen ko o bem kɔ‘i, wen nɛ́ a̧ a dak ziimɔ pi zu wa.

⁸Bɔnɛ a̧-a̧ zu'nɛ́, o wi nɛ iŋ Sɔ̧ na, n’ɛnɛ siŋa heembea ko Wan-mɛ-ŋgɔn pi nu’ɛ.

⁹Wa ko'nɛ́ zu fom, ɓɛɛ k’ɛ́nɛ́ fe, mɔɔ-oe k’ɛ́nɛ́ nɛ́ fom.

¹⁰Mɔ, nɛ tɛ́ nɛ tɛ nu, tɛ si ɗoŋ tɛ nu. Nɛ́ hegɔ a̧ o wi nɛ iŋ Sɔ̧ na kur nɛnɛ nɛ yi fom si tɛ fio. De hura nin

¹¹Murtɛ-bii nɛ gee mɔ; ɓɛɛ nin-wi duk ɗoɔ heembea beka bi na.

¹²Mɛ hakali nin-mɛ, wen a̧ tɛ ɓɔn oe mɛ gan zɔm dɔka lɔr.

¹³Zɛ de-dukaa dɔ́k na, ɓɛɛ nɛ́ de hura-nin a dúk kpoo nɛ kpoo. Mɔ nɛ‘i de foe-aa

¹⁴O bem kɔ‘m, ɛnɛ kásí usamɔ kɔ‘m nɛ dea. Ɗuka-taamɔ nɛ dúk nɛ hu̧sa̧a̧ in gasa mbɔi nɛ‘i zɔk na, nɛ́ ge a'i tɛ kpaa sɛnɛ ge?

¹⁵Gana so hu̧sa mgbele kɔ‘i ba nɛ hu̧sa̧ ɗuka-taamɔ kɔ‘i.

¹⁶Mi tɛ tɔ̧ mgbak mɔ nɛ‘i tɛ de foe sɛnɛ, wen de ha̧‘i mɛ de foe tɛ mɔ lɛŋ na, ɓɛɛ mbɛt yi-bii lɛŋ zɔk mɔ hee ŋmaa ga na.

¹⁷Foe a de'nɛ tɛ dee yaka-yi-mɔ yi dáà in naa k’ɛ́nɛ́, tɛ dee ndela ti wanye in ti gasawi,

¹⁸tɛ dee ɗaŋmɔ ti wigɔnkita in wi-ɓa-kita, tɛ gbina heembea ti giiwi in ti dukbíí, tɛ dee gɔɔmɔ ti gbamayari in ti sɛm kɔ‘i,

¹⁹tɛ zu̧u̧ mɔ nɛ yi o wi nugara kɔ-mɛ; mɛ ta kpasawen in nɔɔtɔk kɔ Sɔ̧, ɓɛɛ foe a dé mɛ tɛ guaa zu nyɔŋmɔ, tɛ ha̧mɔ kóó tɛ baa mɔ sú nɛ tɛ,

²⁰tɛ bɛ̧ɛ̧ nú wi nɛ fan mɛ, tɛ kɛ̧i̧a̧ ko-duk-gee

²¹tɛ ndaka be ye kɔ-mɛ, tɛ baa mɔ ko bii, kóó ŋma mɔ nɛ wa ha̧ha̧ a̧, nɛ kɔ-mɛ, tɛ mbaɗa gɔni koo ko wan-aa.

²²Ká mɛ ndaɗi in kodetom kɔ-mɛ batɛ na, ɓɛɛ ká mɛ ndaɗi si ka gado kɔ̧-a̧ na. Foe a de mɛ tɛ tɔ̧ɔ̧ ɓaɗi-wen ha̧ o sɛm kɔ-mɛ; ka mɛ nɛ ha̧mɔ ha̧ bii kaɗi, ká mɛ pi foe tɛ a ɓɔ na. Foe a de mɛ tɛ wee ɗoŋ wen nɛ mɛ zia in tɛ gbaa ndaa hu̧sa̧mɔ; hegɔ mɛ tɛ gan zu mgbak mɔɔ-foe, ɓɛɛ bii lɛŋ tɛ zɔk mɛ nɛ de yí.