Read Northwest Gbaya SIRAK 42 Bible Online

SIRAK 42 - Northwest Gbaya bible

SIRAK 42

¹Mɔ nɛ‘i beka de foe-aa na Ká foe mɔɔ nɔ'ɔ de mɛ na, ɓɛɛ ká mɛ kpa war-a mɛ de nɛ ɗaŋmɔ na mbɛt.

²Ká foe de mɛ tɛ heembea ko Wan-mɛ-ŋgɔn in nɔɔtɔk kɔ̧-A̧ na, koo tɛ gɔna de kita zu ɗaŋwi nɛ bo nɛ wen zu na na.

³Ká foe de mɛ tɛ tɔra sede n’ɛnɛ ɗaŋa in sɛm kɔ-mɛ, koo in gbamayari kɔ-mɛ, nɛ damaa na koo tɛ kɛ̧a mɔɔ-oi fio in o ŋmaa na;

⁴Ká foe de mɛ tɛ nyɛmaa sɛnɛ ko kilo in o be-a na, kóó tɛ kpaa mɔ nɛ dɔkaa koo tikiɗi zu gun sede kɔ-mɛ na.

⁵Ká foe de mɛ tɛ kpaa mɔ nɛ wiɗɔrmɔ kpá zu mɔɔgɛnɛ kɔ‘i na, koo tɛ gusa o bem ye tɛ-wa, koo tɛ ee da̧i̧ ɔm ɗaŋ widetom na.

⁶Ka yí-koo kɔ-mɛ á ɔɔ kora, nɛ mɛ gɔm nu-mɔ kɔ̧́ tua gɔm; fara nɛ bii ɔ dɔka sɛnɛ, mɛ man nu-mɔ kɔ-mɛ man nɛ nana-sɔtɛ.

⁷Mɛ tɔr mɔ nɛ mɛ ha̧ ha̧ bíí mɛ ba e dúk ha̧ mɛ tɔr, ɓɛɛ mɛ we ditaa mbɛt. Mɔ nɛ mɛ ha̧ in mɔ nɛ mɛ kpa, mɛ yɔ́r yɔr.

⁸Ká foe de mɛ tɛ usa de yuwar ha̧ mgbelewi in wi-bɔkɔ koo ha̧ sɔka gbɛrɛ nɛ de dala na; nɛ́ hegɔ a mɛ tɛ usi nɛnɛ‘e mɛ́ nɛ́ kpasa wi-iŋ-mɔ, ɓɛɛ bii lɛŋ tɛ zɔn mɛ. Gɔna-ɗɛɗɛ ko dáà wen zu bokobem kɔ‘i

⁹Bokobem dúk nɛ ŋma hu̧sa̧ mɔá-gɔn-yá yi-dáà kɔ‘i, nɛ bii iŋ na. Taamɔ n'aa tui pi nu'i dor nɛ ya yi-dáà kɔ̧-a̧, wen ká ŋgimbi baa wii tɛ̀ɛ yak a̧ tɛ zɔŋa, ka a̧ nɛ baa nɛ wi kaɗi, ká wii tɛ̀ɛ̀ sɛn a̧;

¹⁰ŋgimbi n'aa tɛ iŋ wiwii na, ká wiwii tɛ̀ɛ̀ ɔr a̧, ɓɛɛ ka a̧ tɛ̀ɛ̀ ɗaŋ sɛn nutua, in ka a̧ tɛ̀ɛ̀ ba zaŋ kɔ̧ tua ko dáà kɔ̧-a̧; ɓɛɛ ŋgimbi n'a̧-a̧ baa wii kaɗi, ka a̧ tɛɛ de dala in wen ka a̧ tɛ̀ɛ̀ yar ndɔra kɔ̧ tua ko wi kɔ̧-a̧.

¹¹Mɛ yor mitak, ká tɛ bokobem de gɔna yi wen ka̧ a̧ tɛɛ de ha̧ mɛ mɛ kifi nɛ mɔɔ-zɛkɛɗɛ ko o wisɛn kɔ-mɛ, ká o wi-ssaye tɛ̀ɛ̀ mam mɛ suu suu de nɛnɛ, ha̧ bii mɛ mɔi̧ nduŋ nduŋ, ɓɛɛ ká a̧ tɛ̀ɛ̀ pi foe tɛ-mɛ mgbara bii. Kasa zu nɛ okóò

¹²Ká mɛ e yí-mɛ tɛ dee ko ŋma bii kpɔk na, ɓɛɛ ká mɛ dúk nu mgbara o okóò na.

¹³Wen zɛmɛ-nyɔŋ-laa gbo nɛ tɛ laa, ɓɛɛ ɗaŋ ko okóò gbo nɛ tɛ okóò.

¹⁴Gana so ɗaŋ ko wiwii ba nɛ dee demɔ ko okóò; okóò nyɛma mɛ dak foe in búù pi zu wi. Mɔɔrɔ Usamɔ Gasi in ɗuka-taamɔ ko Sɔ̧ sɛn zu nu

¹⁵Kinii, mi tɛ mbaŋ tɛ-‘nɛ́ zu o mɔ lɛŋ nɛ Gasa Wan dea: mɔ n'am zɔka, mi tɛ ɓa h’ɛ́nɛ́. Gasa Wan deemɔ lɛŋ tɛ tɔ̧ɔ̧ wen, nyɛm nɛ ɗoŋ taamɔ kɔ̧-A̧.

¹⁶Wese nɛ zár zɔk nɛ o mɔ lɛŋ, ɓɛɛ mɔ nɛ Gasa Wan dea lɛŋ duna nɛ gasamɔ kɔ̧-A̧.

¹⁷Wee ɗoŋ mɔɔ-gɔn-ɗɛɗɛ nɛ a̧-a̧ sɛn zaŋnu’ɛ lɛŋ gana o sa̧a̧ bii ko Gasa Wan, o wan nɛ Wan-ŋgayamɔ dee e nu mgbip, wen ha̧ zaŋnu nɛ oi-aa lɛŋ mɛ duk ɗɔɔ a mitak zaŋ gasamɔ kɔ̧-A̧.

¹⁸A̧ zɔk mɔ zɔk hɔ sɛn ndaa gbatɔp in kɔ̧ see-wi mbɛt: A̧ iŋa ndaa hu̧samɔ nɛ wa kɔ̧ɔ̧ mɛ de lɛŋ, wen Wan-mɛ-ŋgɔn a̧-a̧ nɛ ŋgai mɛ iŋ mɔ lɛŋ; yi-A̧ duk zaa sɛn tɛ o mɔɔ-usi-kpaiaa ko o ŋgimbi.

¹⁹A̧ tɔ̧ nɛ wen zu mɔ nɛ yaka in mɔ nɛ tɛ hɔ, ɓɛɛ A̧ tɔ̧ɔ̧ ndaa o hu̧sa̧mɔ.

²⁰Ŋma taamɔ ko bii n'A̧a iŋ na bo na; ŋma wen kpɔk nɛ hu̧sa̧ nɛ A̧ bo na.

²¹A̧ ɗafa o gasa demɔ, nɛ ɗuka-taamɔ kɔ̧-A̧ usa ha̧ A̧ lɛŋ, á nɛ war-a, wen A̧ a̧-a̧ sɛnɛ dika ɛti, ɓɛɛ A̧ kpai na kpoo nɛ kpoo: ŋma mɔ daŋ zu A̧ kóó yuu A̧ bo na, ɓɛɛ A̧ bo so nɛ haazi ŋma wi-tɔ̧-mbɔrɔ ha̧ A̧ na mbɛt.

²²Ho! oe gee gba de o mɔ n'a̧-a̧ dea wa, hɔ nɛnɛ tɛ be sɔŋkur mbul-a nɛ‘i nyɛma mɛ zɔk.

²³Mɔ nɔ‘i lɛŋ ya nɛ kpasa, ɓɛɛ dúk kpoo nɛ kpoo wen hazi lɛŋ, mbo nɛ zu tɛ mɔ lɛŋ mbɛt.

²⁴O mɔ lɛŋ gbam yiitoo yiitoo, ɓi-wi nyɛma ŋmaa in ɓii-aa, ɓɛɛ ŋma wan nɛ ɓɔna ŋgerɗek bo na.

²⁵Ɓii-wi ha̧ nɛ ŋgai ha̧ ɓi-aa. Nɛ́ o a̧ tɛ tɛ́ mbɔi tɛ zɔka gasamɔ ko Sɔ̧ o nde?