Read Northwest Gbaya SIRAK 43 Bible Online

SIRAK 43 - Northwest Gbaya bible

SIRAK 43

¹Wese Oe gba de gɛɗa yizan ŋgɔn mɛ‘i wa! oe ŋma demɔ‘e yiwese, tɛ zɔka gasamɔ kɔ̧-a̧ wa!

²Daŋa ko wese usi nɛ mɔ nɛ Wan-gɔn-mɛ-ŋgɔn dea lɛŋ nɛ mɔɔ-ɗɛɗɛ-wi nyɛmna.

³Ka a̧ hɔ bɛɗɛ-zu, ɓɛɛ nu zɔma. Nɛ́ o’ɔ a nyɛma mɛ yor ɗɔɔ kpɔraa kɔ̧-a̧, o?

⁴Wi ufi wee nɛ ŋgaya wen o tom de nɛ wee, ɓɛɛ wese nɛ do o kaya kpɔra war taar gan wee: buk-a yo wi hee wee ga, a̧ pɛ̧ nɛ mbul-wee zar nɛ yi-wi.

⁵Wan nɛ dee wese ɔ gasa; nɛ́ wen mɛ nu-A̧ a̧ fo a nɛ́ nɛ nɔ nɛ hayaa. Nyaŋazɛ

⁶Nyaŋazɛ mbɛt hɔ́ nyɛm nɛ ŋgimbi-a usi nɛ fiozɛ in yakaa ko ŋgimbi.

⁷Nɛ́ tɛ nyaŋazɛ a'i iŋ nɛ ŋgimbi gbaŋá, a̧ n'a̧-a̧ kɛn kɛn ɗoŋ n'a̧-a̧ tó ndaa nɛ nu kaɗi.

⁸Fiozɛ kpa nin kɔ‘i, nɛ ɗɔŋ a̧. Oe, ŋma demɔ ŋgimbi n'a̧-a̧ hɔ mɛ daŋ nɛnɛ woyo wa! a̧ nɛ́ widukti ko o gii sɔra nɛ yá yizan tok nɛnɛ ŋgol ŋgol. O Sɔra

⁹Nɛ́ tokaa ko o sɔra a de ha̧ yiwese mɛ de; wa tók sɛn kusa fara ko Gasa Wan hee mɔɔ-ɗafi-tɛ ga.

¹⁰Wa yor nyɛm nɛ ɗoŋ fara nɛ Sa̧a̧-Wi ee wa sɛnɛ; ŋma kpɔk siŋ fara-pɛm-mɔ kɔ‘i e dúk na. Ɓùtù

¹¹Mɛ zɔk ɓùtù, ɓɛɛ mɛ zɔ́n wi nɛ dee a̧; ŋgimbi n'aa yɔr nɛnɛ, oe gba de gɔna dap-aa wa!

¹²A̧ yɔr nɛ ŋma kirkiti-gasamɔ sɛn yiwese. Nɛ́ er Wan-mɛ-ŋgɔn a bir a̧. O Mɔɔ zu nu

¹³Nɛ tɛ ha̧a̧nu kɔ̧-A̧ a mbul-mbul ɓɔrɔ ai nɛnɛ, ɓɛɛ A̧ toma nɛ o pi̧i̧-koro wen ha̧ mɔ n'A̧a kɔ̧a̧ mɛ hɔ gba̧a̧.

¹⁴Nɛ hegɔ a o nu dam kɔ̧-A̧ mɛ ŋgɔn hu̧i̧ nɛnɛ, ɓɛɛ o duule bu̧a nɛnɛ hee o nɔi̧ ga.

¹⁵Nɛ te ŋgayamɔ kɔ̧-A̧, A̧ a dee nɛnɛ ha̧ o duule mɛ kpai nɛ ŋgaya hee ta ga, ɓɛɛ wa mbaŋa sɛ́kɛ́ sɛkɛ́ nɛ gba̧a̧ ɓɔrɔ a nu.

¹⁷Nu nak nak tɛ zia giti dikaa kɔ̧-A̧, o kaya pi̧i̧ liki liki tɛ zɔka A̧. Búk kazan mɛ dɔɔ yú ŋgimbi n'A̧a kɔ̧, gú nɛ gbabúk kazan mɛ ŋgɔn in ŋga harabúk mbɛt. A̧ sɛ̧ mbul ɓɔrɔ hee o gii nɔi̧ nɛ zir a nu ga, hee gba-dɔya nɛ ai nɛ yiwese ga.

¹⁸Buaa kɔ̧-a̧ tal tal'i zar nɛ yi-wi bar-bar; ŋgimbi n'A̧a ai, bii lɛŋ de nɛ nyɛŋɛ.

¹⁹A̧ gbai ɓɔrɔ kpe zu nu hee fuu tɔŋ ga: ka a̧ ŋgai ɓɛɛ tɛ̀ɛ̀ kifi hee tɛnmɔ ga.

²⁰Ka gɛ̧ɛ̧ búk kazan mɛ ŋgɔn yú, ɓɛɛ zu yi kaŋa ŋgai hee ta ga; a̧ kpe zu gɔna yi, ɓɛɛ a̧ guu wa lɛŋ hee ŋgee ga.

²¹Búk ka̧-zan mɛ ɗɔɔ de ha̧ o kaya mɛ ba wee kpororo, dɔ́ nɛ ŋga gbara mbɛt: a̧ ɗaŋ tɔr-mɔ hee wee a dɔ́ ga.

²²Haya nyina mɔ nɔ‘i lɛŋ nɛ́ kutu; mbɛŋ nɛ kpai ŋga gbɛŋmɔ bá nɛ desee pii nɛ ɗoŋ.

²³Nyɛm nɛ ɗoŋ ɗafamɔ kɔ̧-A̧, A̧ kpa ŋgai zu gbatɔp, ɓɛɛ A̧ aa o seekisi nɛ see a̧.

²⁴O wi nɛ yar zu gbatɔp nɛ gasa kombon tɔ̧ nɛ nyɛrɛ mɔɔ-kii kɔ̧-a̧ h’ɛ́ɛ́, ɓɛɛ ɛɛ ya yemsele gee.

²⁵O ŋma mɔ-gɔn-ɗɛɗɛ, nɛ‘i iŋ zu-a na, a̧-a̧ sɛn hi̧i̧: o yaayi saɗi ɗɔɔ yi nɛtɛ nɛtɛ, in o ndiɓa.

²⁶Ɓɛɛ Sɔ̧ de dee ha̧ wi n'Aa tom mɛ nɛ́ nɔ hɔ ti, in mɔ lɛŋ nɛ́ nɛ wara, nyɛm nɛ ɗoŋ wen mɛ nú -A̧.

²⁷Ɛɛ nyɛma so mɛ tɔ̧ nyɛrɛ mɔ nɔ‘i siti, nd’ɛ́ɛ́ beka kaɗi na mbɛt; «Sɔ̧ nɛ́ mɔ lɛŋ», sɔŋkur gbɛ́ɛ́ zú wen k’ɛ́ɛ́ a̧‘i.

²⁸Ɛɛ tɛ kpa ŋgai gasi A̧ dee? Wen A̧ ɔ́ Gasa, A̧ gana mɔ lɛŋ n'A̧a dea.

²⁹Gasa Wan nɛ Wan-pi-kii tɛ wi, ɓɛɛ a̧ ɔ́ gasa nyɛmna, A̧ nɛ ŋgaŋa-wi nyɛmna, bó nɛ mɔ'ɔ tɔ̧ na.

³⁰Ɛnɛ zɔ́n Gasa Wan, ɛnɛ ŋgan A̧, hee mɔ n’ɛnɛ nyɛma ga. A̧ gana zu mɔ nɔ‘i lɛŋ. Ɛnɛ ŋgan A̧ nɛ ŋgai tɛ-‘nɛ́ lɛŋ. K’ɛ́nɛ́ mbɔi tɛ-‘nɛ́ na, wen ŋgana A̧ beka hɔ nduti na.

³¹Wi nɛ zɔka A̧ kà nyɛm tɔ̧ɔ̧ wen-a̧-a̧ nɛ sa̧-a̧ h’ɛ́ɛ́, nɛ́ o? Wi nɛ tɛ gasi A̧ nyɛm nɛ ɗoŋ dukaa kɔ̧-A̧, nɛ́ o?

³²O ŋma mɔ nɛ ɔ́ hu̧sa̧, ɓɛɛ nɛ gasa gan ɛ̧ɛ̧ nɔ'ɔ a̧-a̧ sɛnɛ, wen o mɔ n'A̧a dea, nɛ́ tikiɗi ɛɛ zɔka ɓɛɛ.

³³Nɛ mbetɛ, nɛ́ Gasa Wan a dea o mɔ lɛŋ, ɓɛɛ A̧ ha̧ ɗuka-taamɔ ha̧ o wi-yu-kii A̧.