Read Northwest Gbaya SIRAK 44 Bible Online

SIRAK 44 - Northwest Gbaya bible

SIRAK 44

¹Zɔna nin o zɔmdáà Ɛnɛ zɔ́n o wi nɛ nin hura so, o zɔmdáà k’ɛɛ, o nde nyɛm nɛ ŋgimbi kɔ‘i.

²Gasa Wan ha̧gasa hura-nin ha̧ wa, usi nɛ gasi kɔ‘i dika ɓeemɛ.

³O ŋma ɔɔ so wan sɛn nu kɔ‘i, nin-wa hura wen ŋgai kɔ-wa. Iŋa-mgbara-mɔ ko o ŋma dee ha̧ wa mɛ ya nɛ o kpasa wi-tɔ̧-mbɔrɔ, tɔ̧́ nɛ wen zú mɛ nɛ tɛ hɔ.

⁴O ŋma yaa nɛ o wi-usi-yuwar mɔ ha̧ o dukbii kɔ‘i, tɛ tɔ̧ɔ̧ mbɔrɔ, tɛ iŋa yuwar usa mɔ ha̧ o dukbii kɔ‘i, in tɛ ɗuka-taamɔ nɛ gbo nɛ gbo nɛ usamɔ kɔ-wa.

⁵O ŋma yaa so gbó nɛ o de gɛr-gima, yɔ́r nɛ o de ɗuka nyɔɔ nyɛrɛ.

⁶O ŋma yaa nɛ o wanmbɔi, nɛ a̧-a̧ so nɛ ŋgai, ya nɛnɛ́ fara duk kɔ-wa zaŋ ga̧a̧mɔ.

⁷Nin o wi nɔ‘i lɛŋ hura tɛ ŋgimbi kɔ-wa, ɓɛɛ tortɛ bá so o bii ŋgimbi kɔ-wa wen zu wa.

⁸O ŋma mgbara wa ee de nin, nɛ de ha̧‘i mɛ zɔn wa hɔ́ kinii.

⁹O ŋma a̧-a̧ sɛnɛ, nɛ tɛ-wi bii ɗoŋ wa kaɗi. Wa yaka yi-bii, hee wa yá so kpasa ga na, wa yá hee wa bo so nɛti na ga. Nɛ kale kpɔk mɔ wen o be-oi-wa mbɛt.

¹⁰Ɓɛɛ zɔk o widedemɔ nɛ tɛ-wi bi ɗoŋ dee demɔ kɔ-wa na hɛ̧ɛ̧;

¹¹Oi demɔ kɔ-wa yá wen o bezaŋ-wa; mɔɔ-oi kɔ-wa yá wen o be-oi-wa.

¹²O bezaŋ-wa yór ɗoŋ nɔɔtɔk nɛ nɔaa; o bé-koo-wa zok nɛ ɗoŋ mɔ kɔ-wa mbɛt.

¹³O bezaŋ-wa tɛ ya kpoo nɛ kpɔá, ɓɛɛ hura-nin kɔ-wa beka kaɗi na.

¹⁴Wa guna wa zaŋ ga̧a̧mɔ, ɓɛɛ nin-wa dúk kpasa pɛ nɛ pɛ.

¹⁵O dukbii tɛ tɔ̧ nyɛrɛ ɗuka-taamɔ kɔ-wa, ɓɛɛ giiwi tɛ zɔn nin-wa. Henɔk

¹⁶Henɔk de yí Gasa Wan, ɓɛɛ Gasa Wan ba a̧ si ŋgɔn A̧ nɛ wi-usi ɗoŋ kifa see ha̧ Sɔ̧ ha̧ o bezaŋ mɛ ɗoŋ. Nɔe

¹⁷Gasa Wan kpaa'e Nɔe nɛ kpasa widemɔ nɛ yuwar-a. Ŋgimbi tu̧u̧see ko Gasa Wan; nɛ́ á̧ a̧ duka oi o bii nɛ kuma; nɛ́ wen zu a a be oi bii ɓɔna nɛnɛ́ zu nu, ŋgimbi nɛ ha̧a̧yi ndiɓa-kòrò hɔɔ nɛ́nɛ.

¹⁸Gasa Wan dee nɔɔtɔk nɛ dúk kpoo nɛ kpoo in a'e Wi beka kum o bii nɛ pɛrti ha̧a̧yi'i ɓɔna. Abraham

¹⁹Abraham duka nɛ gasa zɔmdáà ko gba gii bii; ŋma bii nɛ nin-a̧ hura nyɛm ŋmaa in a̧ bona

²⁰A̧ ndaka pata heembea ko Wan-mɛ-ŋgɔn, ɓɛɛ a̧ dee nɔɔtɔk in A̧, A̧ dee nɔɔtɔk'i sɛn tɛ murtɛ-a̧; ŋgimbi nɛ Gasa Wan wee nɛ a̧, a̧ yora ɗoŋ wen kɔ̧-a̧.

²¹Nɛ́ wen zu mɔ‘i a Sɔ̧ ha̧nɛ nú ha̧ a̧ tɛ kanamɔ mɛ tok de yoŋgo zu o dukbíí lɛŋ nɛ ɗoŋ bezaŋ-aa; A̧ tɛ de ha̧ o bezaŋ-aa mɛ nyɛɓi hee fuunu ga, A̧ tɛ tɔi wa e ŋgɔn hee o sɔra ga, mɛ ha̧ nu ha̧ wa mgbara o gbatɔp yiitoo, dika tɛ gasa nanayi hɔ́ nɛnɛ́ nduti nu mɛ. Izaak in Jakɔb

²²Nɛ́ kpɔk ha̧a̧nu'i a̧ Sɔ̧ ha̧a̧ ha̧ Izaak wen zu dáà kɔ̧-a̧ Abraham.

²³De yoŋgo kɔ̧-A̧ zu o bii lɛŋ in nɔɔtɔk kɔ̧-A, Sɔ̧ e zu Jakɔb. A̧ tok de yoŋgo a zu a woyo, ɓɛɛ ha̧ nu ha̧ a̧ nɛ mɔɔ-oi. A̧ kɛ̧a saŋa nyɛm nɛ ɗoŋ o zudukbii ɓu-zu-a-yiitoo.