Read Northwest Gbaya SIRAK 45 Bible Online

SIRAK 45 - Northwest Gbaya bible

SIRAK 45

¹Mɔisɛ Sɔ̧ foo ŋma widedemɔ gbónɛ́ nɛ tɛ Jakɔb, ɓɛɛ nɛ ɔ dee yi-bii lɛŋ; wi’ɛi nɛ́ Mɔisɛ, nɛ Sɔ̧ in o bii kɔ̧ɔ̧ nyɛmna, ɓɛɛ nɛ‘i tok nɛ de yoŋgo ha̧ a̧ ŋgimbi nɛ‘i ta mɔ wen a̧.

²A̧ ha̧gasamɔ ha̧ a̧, hee ko o betom mɛ yiwese ga, ɓɛɛ A̧ há̧ ŋgai ha̧ a̧ pi nɛ kii tɛ o wisɛn kɔ̧-a̧.

³Sɔ̧ dora o mɔɔkifi nɛ ɗoŋ wen ko Mɔise, ɓɛɛ A̧ ha̧ gasi ha̧ a̧ sɛn ti o wannu. Sɔ̧ ha̧o heembea ha̧ a̧ wen dukbii kɔ‘i, ɓɛɛ usi ŋma be nú-gasamɔ kɔ‘i ha̧ a̧.

⁴Wen zu mboozu in mɔkasee kɔ̧-a̧, Sɔ̧ baa a̧ e nɛtɛ; A̧ hoka a̧ mgbara o dɔka bii;

⁵A̧ dea ha̧ a̧ mɛ zii tigɛr-A̧, ɓɛɛ ba a̧ pi mgbara ŋmak ŋmak turazan; A̧ ha̧heembea ha̧ a̧ gbaayi nɛ gbaayi, heembea duka-kpasa in iŋa-mgbara-mɔ wen usa yuwar nɔɔtɔk ha̧ o bezaŋ Jakɔb? 1, in usa gɛŋa kɔ̧-A̧ ha̧ o be Israɛl. Aarɔn

⁶A̧ ha̧gasi ha̧ Aarɔn, ŋma sa̧a̧-bii hee Mɔisɛ ga, nya kɔ̧-a̧ sɛn nutua ko Levii.

⁷Sɔ̧ dee nɔɔtɔk in a̧ wen ɓɔnsɛnɛ, ɓɛɛ de a̧ nɛ wan-ɗafi-sɔ̧ ha̧ dukbii. A̧ pi̧i̧ o de gasa laa-ha̧-desee tɛ a̧ gee, ɓɛɛ már dura laa-gbooyi sɛn guntir-a̧.

⁸A̧ aa o de ɗilɛɛ laa tɛ a̧, ɓɛɛ A̧ ɗafi tɛ-a̧ nɛ o mɔɔwan kɔ̧-A̧: nɛ́ yɛm-yɛm laa mɛ ɗɔɔ, dura laa, in laa-wor-sɔ̧ nɛ‘i sa'e Efod.

⁹O be mɔ nɛ hɔɔ ŋmaa in koko, in o zɔm dɔka mana nɛ‘i dee nɛ lɔr, zika kpa naŋ-laa lɛŋ, ɓɛɛ giti-wa de so nɛ mɔ nyɛm nɛ ɗoŋ pii naŋ kɔ̧-a̧ si kɔ̧ tua ko Sɔ̧, mbaŋ nɛ tɛ o bii.

¹⁰A̧ pi̧i̧ laaɗafisɔ̧ tɛ-a, laa nɛ witoklaa toka nɛ garaazi lɔr, gbɛ̧ zɔŋ zɔŋ zɔ̧-laa zili nɛ gbɛ̧a kerere mbɛt; nɛ zu-a, A̧ pia laa-kpe-yiŋguɗi wen gɔna kita, nɛ‘i hɛra Urim in Tumin sɛnɛ;

¹¹o de kina-ta nɛ lɔr a̧-a̧ ɗoŋ-aa, nɛ wi-sɛk-ta sɛka hee tumbal ga, tók tòki zu laa'i mbɛt; nin o dukbii Israɛl lɛŋ yɔra sɛnɛ: mɔ‘i duka nɛ wen ha̧ tɛ-Sɔ̧ mɛ mbaŋ ɗoŋ wa.

¹²A̧ pi̧i̧ kárà lɔr zu mɛtɛwol kɔ̧-a̧, nɛ‘i yɔra gba̧a̧ wen’ɛ sɛnɛ: «Ɛ̧ɛ̧ wi’ɛ nɛ ko Gasa Wan»: mɔ‘i duka nɛ mɔɔ-usi-gasi, nɛ‘i ɗafa war-a nɛ dea mbɛt, nɛ bá yi-bii lɛŋ, ɓɛɛ nɛ‘i gɔna dap-aa nɛ dea.

¹³Nɛti ha̧ Aarɔn, ŋma mɔ nɛ dee so yi-wi hegɔ bó na; ŋma gee bii tɛ́ a pɛrti mɔɔ-dafi-tɛ nɔ‘i tɛ nɛti na, kana nɛ o bem kɔ̧-a̧ in o bezaŋ-aa kpoo nɛ kpoo ɓɛɛ.

¹⁴Dɔɔkposɔ̧ kɔ̧-a̧ bii wee kór kór war yiitoo dam ɗoŋ zɛ lɛŋ ɓɔnsɛnɛ.

¹⁵Nɛ́ Mɔise a ea a̧ zu tom tɛ sɔ̧ɔ̧ sa̧-a̧ nɔ̧ zu a. Mɔ‘i duka nɛ ŋma nɔɔtɔk nɛ beka kaɗi na wen a̧ in o bezaŋ-aa, hɔ nɛnɛ sɔŋkur ŋgimbi, wen dee tom ha̧ Sɔ̧ in ɗafa A̧, in wen toka de yoŋgo ha̧ dukbii kɔ̧-A̧, nɛ nin-A̧.

¹⁶Sɔ̧ hoka a̧ sɛn mgbara o bii lɛŋ wen ɗafá Gasa Wan tɛ́ ha̧nyama in urdi, nɛ pɛr-aa ɔ dee, wen mbaŋá tɛ Gasa Wan in ɗafa war tɛ-bii, oi ɗaŋmɔ.

¹⁷A̧ ha̧ŋgai tɔ̧ɔ̧ mgbara heembea ha̧ Aarɔn, wen usa mɔ nɛ Jakɔb tɛ de ha̧ A̧, in wen usa mgbak yi heembea kɔ̧-A̧ ha̧ Israɛl.

¹⁸O gɔni duk baa zu dúk nɛ ŋmaa in a̧, ɓɛɛ e yí tɛ a sɛn ŋga gbara, zaŋ gasa tu̧u̧see. Duka nɛ o bii ko Datan, Abiram in o bii ɗɔŋ Koréé.

¹⁹Gasa Wan zɔka mɔ‘i, ɓɛɛ kpa ɗaŋsee nyɛmna: gasa ɗaŋsee'i dea ha̧ A̧ mɛ kum wa lɛŋ. A̧ dee ŋma mɔá-gɔn-ɗɛɗɛ-bii in wa tɛ doo wa nɛ leɓe-wee.

²⁰A̧ ha̧gasi ha̧ Aarɔn siti woyo, ɓɛɛ A̧ ha̧ zu-nyɔnɔ nɛ mɔɔ-oi ha̧ a̧ in o bezaŋ-aa. Mɔ‘i duka nɛ ku̧u̧naŋ ha̧nyɔŋmɔ-sur-zaŋ ha̧ wa,

²¹wen nyɔŋmɔ kɔ-wa nɛ́ mɔ nɛ‘i ɗafi nɛ Gasa Wan; A̧ ha̧mɔɔ nɔ‘i ha̧ Aarɔn in o bezaŋ-aa.

²²Mɔ kpɔk, a̧ bó nɛ ŋma mɔɔ-oi sɛn nu Israɛl na; ŋma war mɔ kɔ̧-a̧ bó sɛn mgbara dukbii na wen Gasa Wan tɔ̧ɔ̧ wen ha̧ Aarɔn'e: «Mi nɛ tɛ‘M, Mi nɛ́ war mɔ in mɔɔ-oi kɔ-mɛ.» Pinhas

²³Pinhas bem ko Eleazar, nɛ taar bii tɛ gasi, wen ha̧tɛ kɔ̧-a̧ tɛ yuu kii Gasa Wan, in wen zu kpeesee kɔ̧-a̧; ŋgimbi dee ŋgazu ko dukbii, a̧ nɔ̧ɔ̧ see-a̧. Nɛ́ hegɔ a a̧ kpaa nɛ ea-ɗaŋmɔ ko Sɔ̧ ha̧ Israɛl.

²⁴Kalea a̧‘i sá Sɔ̧ de nɔɔtɔk ga̧a̧mɔ in a̧, wen ha̧ a̧ mɛ ɔ wan zu Sa̧a̧-Fara ko Sɔ̧, in zu dukbii kɔ̧-A̧, wen ha̧ gasa wan-ɗafi-sɔ̧ mɛ duk nɛ́ a̧ in o bezaŋ-aa yak nɛnɛ́ kpoo nɛ kpoo.

²⁵Ŋma nɔɔtɔk mbɛt dea so in David, bem ko Jɛssé, be-nutua ko Juda; mɔɔ-oi wannu dúk wen ŋma bem kɔ̧-a̧ kpɔk ɓɛɛ.

²⁶(Nɛ́ k’ɛ́nɛ́, bezaŋ Aarɔn), Gasa Wan a e ɗuka-taamɔ kɔ̧ see'nɛ́ wen gɔna kita zu dukbii kɔ̧-A̧ nɛ yuwar-a, wen ká war kpaamɔ in gasi k’ɛ́nɛ́ tɛ̀ɛ̀ yɔ kpoo nɛ kpoo.