Read Northwest Gbaya SIRAK 46 Bible Online

SIRAK 46 - Northwest Gbaya bible

SIRAK 46

¹Jozue in kalɛb Jozue, bem ko Nun, duka so nɛ ŋma hayatɛ wi biro. Nɛ́ a̧ a duka oi Mɔisɛ wen tɔ̧ɔ̧ wen oi nú Sɔ̧, ɓɛɛ nyɛm mɛ ɗoŋ gba̧a̧ wen nɛ nin-a̧ tɔ̧, a̧ kifa gasawi wen kpasa o bii nɛ Gasa Wan hoka, wen dee bɔnɛ nɛ o wisɛn nɛ bá zu dúk nɛ A̧, in wen dea ha̧ Israɛl mɛ ba nu kɔ‘i.

²Oe, gasi n'a̧-a̧ kpaa so ŋgimbi n'a̧-a̧ baa nɛ er-a nɛ ŋgɔn usi nɛ gbapaa si tɛ o gasa ye wa!

³Ŋma bii nɛ nɔ̧ɔ̧ so see nɛti hee a̧ ga, nɛ́ o? Nɛ́ a̧ nɛ zu-a a duka so ti, bi nɛ biro ko Gasa Wan.

⁴Bó nɛ a̧ a dora wese, ɓɛɛ ká kpɔk zɛ kifi hee zɛ yiitoo ga’ɛ na nde?

⁵A̧ kɔfa Wan-mɛ-ŋgɔn, Wan-ŋgayamɔ, ŋgimbi nɛ o wisɛn nasi so nɛ a̧ dam fara lɛŋ, ɓɛɛ Gasa Wan, nɛ ɔ wan zu mɔ lɛŋ, zii kɔfamɔ kɔ̧-a̧, ɓɛɛ sɛ́ ŋga kii-ɓɔrɔ a zu wa.

⁶A̧ tika zú nu ko o wisɛn kɔ̧-a̧, ɓɛɛ a̧ kúm o wisɛn tɛ zira kaya, wen ha̧ o gɔní-duk mɛ iŋ ŋgai boe-biro kɔ̧-a̧; biro'i wa de in Gasa Wan nɛ mbetɛ, wen a̧ ndak kana, kɔ̧-a̧, nɛ ɗoŋ Wan-ŋgayamɔ.

⁷Tɛ ŋgimbi ko Mɔise, a̧ usa so mboozu kɔ̧-a̧, kpɔk in Kalɛb, bem ko Yefunɛ: tɛ dukaa mitak ti giiwi, wa dora dukbii tɛ dea ɗaŋmɔ in tɔ̧a̧ sɛkɛ́ sɛkɛ́ ɗaŋ wen.

⁸Hegɔ, nɛ wa yiitoo ɓɛɛ a kpasa sɛn mgbara o wibiro boro-gɔmŋmaa-mɔɔrɔ-ɗoŋ-kpɔk, wen yeaa tɛ nu, nɛ Gasa Wan ee ha̧ wa nɛ mɔ-oi, nu nɛ yibere in gɔrɔ fók fok sɛnɛ.

⁹Ɓɛɛ Gasa Wan ha̧ ŋgai ha̧ Kalɛb, ŋgai nɛ gbaka a̧ hɔ tɛ sɔki, mɛ ba nɛ kusa fara tɛ nu'i, nɛ bezaŋ-aa a tɛɛ kasi hee mɔɔ-oi kɔ̧-a̧ ga.

¹⁰Nɛ́ hegɔ a o be Israɛl iŋa nɛnɛ‘e ndaka pata Gasa Wan ɔ́ dee. O Wigɔnkita

¹¹O wigɔnkita mbɛt, nɛ nin-wa hura nyɛm nɛ ɗoŋ tom kɔ‘i, nɛ há̧ see-wa ha̧ o geesɔ̧ na, nɛ zik ɗoŋ-wa ha̧ Gasa Wan na mbɛt, de yoŋgo a dúk zu wa!

¹²Gba̧a̧tɛ-wa a ɓɔ́ nɛ kɔ̧ pɛsi mɛ, ɓɛɛ nɛ nin o gasawi nɔ‘i a hur woyo nɛ ɗoŋ o bem kɔ-wa. Samuɛl

¹³Samuɛl nɛ wi nɛ Gasa Wan kɔ̧ɔ̧ nyɛmna. A̧ nɛ witɔ̧wen oi nú Gasa Wan, nɛ ɗafa mɔɔwan, ɓɛɛ nɛ sɔ̧ɔ̧ sa̧-a̧ nɔ̧-wan tɛ o bii nɛ tɛ ya zu dukbii kɔ̧-A̧.

¹⁴A̧ gɔna kita zu o bíí nyɛm nɛ ɗoŋ heembea ko Gasa Wan, ɓɛɛ Gasa Wan ye ɗoŋ Jakɔb.

¹⁵Tɛ yora ɗoŋ wen kɔ̧-a̧, a̧ usa'e wi nɛ kpasa witɔ̧wen oi nu Sɔ̧; ɓɛɛ wen n'aa tɔ̧a̧ dea ha̧‘i mɛ iŋ‘e a̧ nɛ kpasa wi-mgbaŋ-tɛ-bii zu mɔ nɛ tɛ hɔ.

¹⁶Ŋgimbi nɛ o wisɛn duka nasi nɛ a̧ dam fara lɛŋ, a̧ kɔfa Gasa Wan, Wan-ŋgayamɔ, ɗafi nɛ A̧ nɛ be-sami.

¹⁷Gasa Wan tuɓa da orop nɛ yiwese mɛ tɛnɛ́, ɓɛɛ tigɛr-A̧ dík ɗiirr.

¹⁸A̧ kuma o gasawi ko o wisɛn in o be-wan Filistii lɛŋ.

¹⁹Nɛti ha̧ ŋgimbi ya nɛ wa beka tun na mɛ hɔ, a̧ dee sedaako ti Gasa Wan, in ti wi n'a̧-a̧ sɔ̧ɔ̧ nɔ̧ zu-a'e: «Mi tɛ ba ŋma mɔ ko ŋma bii ka bo nɛ koo gee ndara kɔ̧-a̧ na», ɓɛɛ ŋma bii de wen in a̧ na.

²⁰Koo ɗoŋ n'a̧-a̧ fee kaɗi mbɛt, a̧ tɔ̧ɔ̧ kana wen oi nu Sɔ̧, mbaŋ nɛ tɛ wannu zu fio n'a̧-a̧ tɛ fe. Tigɛr-a gboo nɛ ɗɔɔ nu mɛ tɔ̧ nɛ wen oi nu Sɔ̧, wen bia ɗaŋmɔ ko dukbii yinɛ.