Read Northwest Gbaya SIRAK 47 Bible Online

SIRAK 47 - Northwest Gbaya bible

SIRAK 47

¹Natan in David Hɔ ɗoŋ Samuɛl, nɛ́ Natan a hɔa mɛ tɔ̧ wen oi nu Sɔ̧, tɛ ŋgimbi ko David.

²Tɛ ɗafa Sɔ̧ wen kpaa ga̧a̧mɔ, wi e de nɔ̧-kpoo wen Gasa Wan; nɛ́ hegɔ mbɛt a'i hoka nɛ David e nɛtɛ mgbara o be Israɛl.

³A̧ bá so o dila dé nɛ zɛŋ, hee o be dua ga, ɓɛɛ o baŋgiiɗoŋ ya ti a̧ hee o be-sami ga.

⁴Ŋgimbi ŋgaiwi kɔ̧-a̧, a̧ gbɛ́ so ŋgaŋa-wi na ndé? A̧ yo so Goliat wi-ŋmaŋ-tɛ gbɛ nɛ kii-ta-birndiŋ gɔ́n nɛ foe yi-dukbii yinɛ na nde?

⁵A̧ kɔfa so Gasa Wan, Wan nɛ duk ŋgɔn mɛ, ɓɛɛ Gasa Wan'i ha̧ ŋgai ha̧ wii-er-a̧ mɛ gbɛ nɛ ŋgaŋa-widebiro. Nɛ́ hegɔ a̧ a baa nɛ nin ko dukbii kɔ̧-a̧ e ŋgɔn.

⁶Hegɔ, wa gasa a̧ wen n'a̧-a̧ gbɛa wisɛn booro-ɓu; wa zɔna a̧ de nɛ osoko ha̧ Gasa Wan, ɓɛɛ wa kar mɛtɛwol-wan zu a̧.

⁷Wen a̧ kuma o wisɛn zikanu'i lɛŋ, a̧ gbina gba̧a̧tɛ o be Filistii wisɛn kɔ̧-a̧, ɓɛɛ a̧ kaɗi ŋgai kɔ-wa hɔ sɔsɔɔ.

⁸Tɛ o zɔm mɔ n'a̧-a̧ dea lɛŋ, a̧ zɔna Sa̧a̧-Wi nɛ duk ŋgɔn mɛ, tɛ bia o gima gasi nɛ A̧, a̧ bia o gima zɔn Gasa Wan, nɛ see-a lɛŋ, ɓɛɛ a̧ kɔ̧́ Wi nɛ dee a̧.

⁹A̧ aa o wi-bii-gima ti fara-ɗafi-sɔ̧, ɓɛɛ wa yá hi̧i̧ ku̧i̧ nɛ o de gɛr-gima.

¹⁰A̧ dea ha̧ o gbooyi ko Gasa Wan mɛ ɓɔk, ɓɛɛ a̧ ɗafi ɗoŋ o gbaŋa nɛ dea tɛ zɔna sa̧-a̧ Nin Gasa Wan. Nɛ́ dika gɔna-ndaazan a'i zii nɛ gima-zɔn-Sɔ̧ kɔ̧ Sa̧a̧ Tua.

¹¹Gasa Wan foo ɗaŋmɔ kɔ̧-a̧ yinɛ, ɓɛɛ de ha̧ wan kɔ̧-a̧ mɛ duk yaknɛ sɔ̧́i̧. A̧ ee nú ha̧ o bezaŋ-a mɛ ba wan oi-aa, in ha̧ wan kɔ̧-a̧ zu Israɛl mɛ duk nɛ nɔ̧a̧ mitak Salomɔŋ

¹²Hɔ ɗoŋ David, ŋma bem nɛ duna nɛ iŋamɔ, ɓɛɛ nɛ duka tɛ yɔli wen zu a duká oi a̧.

¹³Salomɔŋ ɔɔ wan tɛ ŋgimbi ga̧a̧mɔ. Sɔ̧ dea ha̧ o mɔ mɛ́ ya mgbitiŋ tɛ zikanu kɔ̧-a̧ lɛŋ kà de ká Salomɔŋ mboo Tua wen zɔna Nin-A̧ in ha̧ a̧ ɗafi Sa̧a̧-Fara ha̧ A̧ wen ɓɔnsɛnɛ.

¹⁴Ho Salomɔŋ! oe ɗuka-taamɔ nɛ mɛ́ duka nɛnɛ́ ŋgimbi ŋgaiwi kɔ-mɛ wa! Mɛ́ duna so nɛ iŋamɔ hee ŋgere-yi ga.

¹⁵Iŋamɔ kɔ-mɛ kpee zu nu lɛŋ; mɛ duna a̧ nɛ o lizaŋ in o sumgba;

¹⁶Nin-mɛ́ hura hó sɛn tɛ nduti seekisi lɛŋ, ɓɛɛ bii lɛŋ kɔ̧ɔ̧ so mɛ, wen nɛ mɛ pi̧i̧ ga̧a̧mɔ mgbara bii.

¹⁷O gima kɔ-mɛ, o tua-wen kɔ-mɛ, o lizaŋ ko-mɛ, in o wee-ɗoŋ-mɔ kɔ-mɛ dea ha bii lɛŋ mɛ zɔn mɛ.

¹⁸Mɛ kusa lɔr zu ŋmaa hee tuŋgu ga, ɓɛɛ mɛ mɔi̧ bu-mbɔi a zu ŋmaa, hee ɓɔɗa-boe ga nɛ nin Gasa Wan, nɛ‘i sa'e Sɔ̧ ko Israɛl.

¹⁹Mɛ ha̧tɛ-mɛ ha̧ o okóò, ɓɛɛ mɛ kifi bara kɔ-wa.

²⁰Mɛ aa ndiŋ tɛ gasi kɔ-mɛ. Mɛ ɗaŋa nin bezaŋ-mɛ, dak nɛ nyimsea ko Sɔ̧ pi zu o bem kɔ-mɛ; mɔɔ-mgbele kɔ-mɛ pii bɔnɛ zu wa.

²¹Wan kɛ̧a̧ tɛ fara yiitoo, ɓɛɛ ŋma ŋgazu dukbii gbo nɛ tɛ Efraim.

²²Mɔ kpɔk, Gasa Wan bɛ̧́ deako kɔ‘i na; A̧ e ha̧ ŋma wen kɔ̧-a̧ mɛ tik gee na. A̧ bɛ̧ nyɛɓaa ko bezaŋ-wi n'a̧-a̧ hoka na. A̧ kum kpar wi nɛ kɔ̧ɔ̧ so A̧ na. A̧ ha̧ be oi-bem ha̧ Jakɔb, ɓɛɛ A̧ e ŋma bezaŋ nɛ tɛ gbo nɛ tɛ-a̧ ha̧ David. Roboam

²³Salomɔŋ fea, ɓɛɛ nɛ̀ɛ̀ kpa o zɔmdáà kɔ‘i, ɓɛɛ e ŋma bezaŋ-a oi aa, gasa mgbelewi nɛ gana o dɔkaa lɛŋ; gee ŋma be iŋamɔ tikiɗi bó kɔ̧ zu-a na. Nɛ́ Roboam nɛ o gɛŋa kɔ̧-a̧ ira o bii a tɛ dee ŋgazu. Jeroboam Jeroboam, bem ko Nevat, foo dukbii Israɛl a tɛ ɗaŋmɔ, ɓɛɛ usi yuwar ɗaŋmɔ ha̧ o bíí ko Efraim.

²⁴Hegɔ ɗaŋmɔ kɔ-wa tɛ̀ɛ̀ dɔ́k dɔ̀k siti nyɛmna, ɓɛɛ wa kai wa nɛ bara si gɔni nu nɛ nyɛiaa.

²⁵Wa dea ɗaŋmɔ zɛkgbɛlɛk hɔ ŋgimbi nɛ Sɔ̧ foo nɛ bɔnɛ oi ɗaŋmɔ pi zu wa.