Read Northwest Gbaya SIRAK 49 Bible Online

SIRAK 49 - Northwest Gbaya bible

SIRAK 49

¹Jozias Taamɔ wen Jozias dúk hee ŋma de pɛr urdi nɛ wi-gi de pɛr mɔ zaŋá nɛ ŋmaa ga, dúk hee nyɔɔ̧ gɔrɔ kɔ̧ nú-wi ga, dúk hee zia de giti biɔ̧-gbaŋa nɛ de dɔ̧ɔ̧ a̧-a̧ sɛnɛ ga.

²A̧ baa de yuwar tɛ kpaia dukaa ko dukbii in tɛ dora yuwar ɗafa geesɔ̧.

³A̧ zika see-a lɛŋ si tɛ Gasa Wan, ɓɛɛ a̧ ha̧ nɔɔŋgiɗi ha̧ o bíí mɛ gasi Sɔ̧ tɛ ŋgimbi nɛ o ɗaŋwi ee nɛ A̧ tɛ gee mɔ. O Sɔŋkur Wannu in o Sɔŋkur Witɔ̧wen oi nuà Sɔ̧ Jeremii

⁴Bá David, Ezekias in Jozias yinɛ, o oi wannu lɛŋ kusa ɗaŋmɔ zu ŋmaa. Wa siŋa heembea ko Wan-mɛ-ŋgɔn pi nu. Sɔ̧ ee o wannu Judaa duk:

⁵A̧a̧ ha̧ŋgai kɔ-wa ha̧ o ŋma bii, in gasi kɔ-wa mbɛt ha̧ o ŋma gɔni duk.

⁶O wisɛn pii wee tɛ gasa ye nɛ Sɔ̧ hoka, ye nɛ Sa̧a̧-Tua dúk sɛnɛ, ɓɛɛ o beegara kɔ̧-a̧ kifi bɛ́ɛ̀-oi,

⁷wen wa usa so bɔnɛ ha̧ Jeremii, a̧ n'A̧a̧ hoka so nɛ́ witɔ̧wen oi nu-Wi, dika kɔ zaŋ naa kɔ̧-a̧, wen zuɗa mɔ yinɛ, ɗaŋá mɔ in gbinaa a nu, ɓɛɛ mbɛt wen mboo mɔ in guna mɔ. Ezekiɛl

⁸Hɔɗoŋ-aa duka nɛ Ezekiɛl, nɛ zɔka gasamɔ ko Sɔ̧ zaŋ hɔɔzu; a̧ zɔka mɔ‘i zu keeke ko o keribim,

⁹wen tɛ-a mbaŋá ɗoŋ o wisɛn sɛn zaŋ ndiɓa-kórò, ɓɛɛ a̧ de demɔ in o wi nɛ bá tana yuwar. O geɗɛk witɔ̧wen oi nú-Sɔ̧

¹⁰Nɛ war ko gba̧a̧tɛ o witɔ̧wen oi nú-Sɔ̧ ɓu-zu-a-yiitoo’ɛ, wa a ɓɔ́ kpɛlɛ kpɛlɛ woyo daŋnɛ́ nɛ kɔ̧ pɛsi mɛ, wen wa ha̧so nɔɔŋgiɗi ha̧ dukbii ko Jakɔb, ɓɛɛ wa kpasa a̧, wen nɛ tɛ-wa mbɔi tɛ ee ta nɛ Sɔ̧ na̧ Zorobabɛl in Jozué

¹¹A'i zɔn nin Zorobabɛl hee ge? A̧, n'aa duka hee wele-tumbal wii-er ga’ɛ?

¹²Nɛ́ kpɔk in Jozué, bem ko Josedɛk mbɛt: nɛ́ wa a baa so Sa̧a̧-Tua e ŋgɔn woyo tɛ ŋgimbi kɔ-wa, wa mboo Sa̧a̧-Fara, nɛ‘i tɛ zɔn kpoo nɛ kpoo ha̧ Gasa Wan. Nehemii

¹³Nehemii mbɛt dee zɔm mɔ, nɛ tɛ-yɛ bi ɗoŋ aa na; a̧ baa so o gbina garo ye k’ɛ́ɛ́ e ŋgɔn, a̧ ɗafa so o kpar-nutua in o mɔɔ-gɔm-aa, ɓɛɛ ka̧ a̧ ba so o tua k’ɛ́ɛ́ e ŋgɔn’ɛ. Henɔk

¹⁴Ŋma bii zu nu’ɛ, nɛ Sɔ̧ dea hɔ ŋmaa in Henɔk bo na, a̧ n'A̧ baa so ɓɛlɛm, nɛ oi kiitɛ, yinɛ zu nu. Jozɛf

¹⁵Ŋma bii woyo, hee Jozɛf ga, bo na; a̧ n'a̧-a̧ duka so nɛ wan ko o nya-a, in sara-tɔn-mɔ ko dukbii kɔ̧-a̧. Wa ɗafa gba̧tɛ-a nɛ dea. O kuti zɔmdáà

¹⁶Sɛm in Sɛt kpaa gasi mgbara o bii; ɓɛɛ mgbara o wi nɛ yá zu o bii lɛŋ nɛ Sɔ̧ dea, nɛ́ Adam á a̧-a̧ ti.