Read Northwest Gbaya SIRAK 50 Bible Online

SIRAK 50 - Northwest Gbaya bible

SIRAK 50

¹Simɔn gasa Wanɗafisɔ̧ Nɛ́ Simɔn, gasa wan-ɗafi-sɔ̧, bem ko Onias, a̧ ɗafa Tua ko Sɔ̧, ŋgimbi n'aa duka nɛnɛ nɛ gbaayi; nɛ́ kpɔk ŋgimbi'i a̧ a ɗafa nɛ ɗoŋ Sa̧a̧-Fara'i nɛ nɔ̧a siti.

²Nɛ́ a̧ a ea naŋ ɓii kusa ŋgeŋ, nɛ wa mboo garo-zik-Tua ko Sɔ̧ zu a.

³Nɛ́ tɛ kpɔk ŋgimbi kɔ̧-a̧‘i a̧ wa za̧-a̧ gasa gɔnayi, gba kɔ̧, nɛ pɛsa-a duk hee ko gbatɔp ga.

⁴Tɛ taamɔ wen ká bɔnɛ tɛɛ tik zu dukbii kɔ̧-a̧, a̧ mboo garo zik nɛ ye ɗɛkɛt, wen ka wisɛn tɛ̀ɛ̀ kɛr ye.

⁵Oe zɔm gasi n'a̧-a̧ duk so sɛnɛ ŋmɛkɛkɛ, mgbara o bii kɔ̧-a̧, ŋgimbi n'a̧-a̧ gbo nɛnɛ nɛ ɗoŋ gbabir-kpé-Sa̧a̧ Fara in n'aa zik nɛ Tua ko Sɔ̧ wa!

⁶Dúk so hee sɔra-doke zaŋ duule ga, hee nyaŋazɛ nɛ to ndaa nɛ nù ga,

⁷hee wese nɛ nyɛk zu Tua ko Wan-mɛ-ŋgɔn ga; hee yɔra-ɓutu nɛ tok zaŋ duule ga,

⁸hee gba de dote mɛ bɛ̀ɛ̀ ga, hee gbadɛŋ ka kpuput-yi ga, hee de bɔɔ-te Liban mɛ nukoro ga,

⁹hee fuu-nyama nɛ wa dɔ Fara-ɗafi-sɔ̧ ga, hee de kpana-lɔr, nɛ‘i ɗafa ɗoŋ-a nɛ o de kina-ta nɛ mbɔi-a ɔ dɔka ga,

¹⁰hee te-nɔ́ nɛ wayá wɔsɔkɔɗɔ ga, hee gbatui nɛ kusi mɛ tɔn yiwese ga.

¹¹Nɛ́ hegɔ a̧ Simɔn duka so nɛnɛ, ŋgimbi n'a̧-a̧ daŋ so si Sa̧a̧ Fara-ɗafi-Sɔ̧, nɛ oi o laa-gbooyi in o de laa-ɗafi-Sɔ̧ tɛ-a̧: Tua ko Sɔ̧ lɛŋ duna nɛ gasamɔ kɔ̧-a̧.

¹²Ŋgimbi n'a̧-a̧ ba so nɛ o ha̧a̧mɔ er o wiɗafisɔ̧ yor nɛnɛ, sɛn ka̧ kusiɗafisɔ̧, o nya kɔ̧-a̧ zika a̧ kpa nú ŋmaa, hee be kɔmbɔ gbatui sɛn Liban ga; wa yàá zik a̧ hee bɔnyá te-ndɛŋgɛ ga;

¹³o bem ko Aarɔn lɛŋ, nɛ oi o laaɗafisɔ̧ kɔ‘i, yora ti giiwi Israɛl, nɛ oi ha̧a̧mɔ ko Gasa Wan kɔ̧ er-wa.

¹⁴Simɔn duka ɗafi nɛ Sɔ̧ ká̧ taŋge-ɗafisɔ̧ há̧ nɛ mɔ nɛ tu̧tɛmɔ ha̧ Wan-mɛ-ŋgɔn, Sɔ̧ nɛ a̧-a̧ nɛ ŋgayamɔ lɛŋ.

¹⁵A̧ nyɛi̧a er-a zu be-ɗele-dɔ̧ɔ̧, ɓɛɛ a̧ tɛ́n yi-dɔ̧ɔ̧ mɔktɛ á naŋ-faraɗafisɔ̧, hee de pɛr nyama nɛ ɔ́ dee tɛ Wan-mɛ-ŋgɔn nɛ ɔɔ wan zu mɔ lɛŋ'ɛ ga.

¹⁶Bɛɛ o bezaŋ ko Aarɔn á nú tɛ gaia mɔ, dɔ́m nɛ o gagaazi kɔ-wa ndɔ dee nɛ bu-mbɔi, gɛr-wa sakari ha̧ tɛ Wan-mɛ-ŋgɔn mɛ mbaŋ ɗoŋ wa.

¹⁷Ɓɛɛ o giiwi lɛŋ guu yi nu nyɛm ŋmaa mɛ gasi Gasa Wan, Wan-ŋgayamɔ, Sɔ̧ nɛ dúk ŋgɔn mɛ.

¹⁸Ɓɛɛ o wi-bii-gima gasi nɛ A̧ nɛ heeger; giti gɛr-wa lɛŋ yee ŋmaa, ɓɛɛ ɔ̧́ nɛ nyɔɔ̧ tɛ zia-a.

¹⁹Dukbii yaa ai nɛ nú ha̧ Gasa Wan nɛ dúk ŋgɔn mɛ́, kɔfi nɛ Yaa-de-ko hɔ ŋgimbi nɛ zɔna Gasa Wan in mɔi̧a̧a kaɗa nɛnɛ.

²⁰Hɔɗoŋ-aa, Simɔn zira, ɓɛɛ nyɛi er zu o be Israɛl nɛ mɔi̧a̧, tɔk nɛ de yoŋgo nɛ nin Gasa Wan zu wa, kpa nɛ́ yuwar sa nin-A̧.

²¹Tɛ war yiitoo-a, wa lɛŋ guu nu wen kpaa de yoŋgo ko Wan-mɛ-ŋgɔn. Kɔfasɔ̧ de yoŋgo

²²Ɓɛɛ kinii, ɛnɛ dé osoko ha̧ Sɔ̧, nɛ ɔ wan zu mɔ lɛŋ, nɛ de gasa mɔ dam fara lɛŋ, nɛ kasa ɛɛ tɛnɛ dika kɔ̧ zaŋ naa k’ɛ́ɛ́, ɓɛɛ nɛ demɔ in yɛɛ nɛ ko.

²³A̧‘a ha̧ desee h’ɛ́ɛ́, ɓɛɛ A̧‘a de ha̧ ga̧a̧mɔ mɛ hɔ sɛn Israɛl, tɛ ŋgimbi k’ɛ́ɛ́ kinii, yak nɛnɛ sɔ̧ɔ̧‘i.

²⁴Kɔ̧ɔ̧mɔ kɔ̧-A̧ a duk in yɛɛ ɓɔnsɛnɛ, ɓɛɛ A̧‘a kpasi yɛ tɛ dukaa k’ɛ́ɛ́. O ɗaŋ zuduk

²⁵Zuduk a̧-a̧ sɛnɛ yiitoo nɛ see-am sɛna, ɓɛɛ taar-a bó nɛ ŋma kpasa zuduk na:

²⁶Nɛ́ o wi ya sɛn mgbara kaya Seir, o be Filistii, in o mgbele wi nɛ ɔ́ sɛn Sikɛm. Gbɛɛ zu-wen

²⁷Nɛ́ Jezu, be Jerusalɛm, bem ko Sirak, bezaŋ Eleazar, a yɔra o zɔm gasa iŋamɔ in usa-ɗoŋ-mɔ zaŋ kalata’ɛ. A̧ sɛ̧ɛ̧ ɗuka-taamɔ nɛ duka kɔ̧ see-a a sɛnɛ hee kórò ga.

²⁸Wi nɛ tɛ hɛr tɛ nɛ o usamɔ nɔ'ɔ ɓɔnsɛnɛ a dúk nɛ desee. Wi nɛ tɛ kasi wen’ɛ kɔ̧ see tɛ kifi wan-ɗuka-taamɔ.

²⁹Ka a̧ ba wa de nɛ tom, a̧ tɛ kpa ŋgai zu mɔ lɛŋ, wen sa̧a̧mɔ ko Gasa Wan tɛ nyɛk yuwar kɔ̧-a̧.