Read Northwest Gbaya SIRAK 51 Bible Online

SIRAK 51 - Northwest Gbaya bible

SIRAK 51

¹Sɔŋkur wen Kɔfasɔ̧ ko Jezu bem ko Sirak Mi kɔ̧a̧ mɛ de osoko h’Ɛnɛ, Gasa Wan, Wannu. Mi kɔ̧a̧ mɛ gasi'Nɛ́, Sɔ̧ Wankpasa'm.

²Mi zɔn nɛ́ nin-‘Nɛ́, wen Ɛnɛ duka nɛ wi-ye-doŋ‘am, in wi-gbaka'm; ɓɛɛ Ɛnɛ e ha̧ war tɛ‘m mɛ yɔ na. Ɛnɛ gbo'm yi pɛ́r ko o wi-kai-ndaa in yi gɔna-tɛ ko o wi-ndela.

³Ɛnɛ yee ɗoŋ am sɛn ti o wi nɛ nas'am, ɓɛɛ Ɛnɛ kpasa'm, nyɛm nɛ ɗoŋ gasa dee-ko k’Ɛ́nɛ́ in hura nin-‘Nɛ́. Ɛnɛ kpasa'm yi gba̧a̧-nin o wi nɛ yaa so dɔ̧ɔ̧ mɛ gur'am, in sɛn er o wi nɛ kia so mɛ gbɛ‘m. Ɛnɛ daka'm yi o bɔnɛ nɛtɛ nɛtɛ.

⁴Ɛnɛ dak am yi ŋma gbɛŋa-wee nɛ kɛra so'm, in see ŋma wee n'am ye so na.

⁵Ɛnɛ dak am nɛ ye ko fio ɗɔɔ mɛ‘i; Ɛnɛ kpasa'm tɛ ɗaŋ wen in tɛ wen-ndela,

⁶nɛ ɗaŋa wen tɛ‘m ti wannu. Mi hɛɗa so fio kaɗi, ɓɛɛ naŋ-am míí so míí nu kɔ̧fio.

⁷Wa kɛra sɔ‘m liŋgɔm, ɓɛɛ ŋma bii-gbaka'm bó so na; mi kii so nɛ ŋma bii mɛ gbaka'm, ɓɛɛ mi kpá na.

⁸Hegɔ, tɛ‘m mbaŋa ɗoŋ deako k’Ɛ́nɛ́, Gasa Wan, in gbaka bii n’Ɛnɛ gbak dika ɓee. Ɛnɛ kpasi o wi nɛ e ta nɛ Ɛnɛ kpasi yi bɔnɛ, ɓɛɛ Ɛnɛ gboo wa er o ɗaŋwi.

⁹Mi dee ha̧ aia-nú kɔ‘m mɛ ɗaŋ hɔ́ tɛ-‘Nɛ́ ŋgɔn mɛ, ɓɛɛ mi kɔfa'Nɛ́ mɛ ba'm yinɛ yi fio.

¹⁰Mi kɔfi mɔ: Gasa Wan, Ɛ́nɛ́ nɛ dáà kɔ‘m; k’Ɛ́nɛ́ bɛ‘m? 3ŋ wese bɔnɛ kɔ‘m na, ŋgimbi n'am duk yi o wi-gɔɔtɛ, ɓɛɛ wi-gbaka'm bo na.

¹¹Mi tɛ zɔn nin-‘Nɛ́ ɓɔnsɛnɛ, mi tɛ bii gima de nɛ osoko h’Ɛ́nɛ́.

¹²Gasa Wan, Ɛnɛ kpɛka kɔfamɔ kɔ‘m. Ɛnɛ kpasa'm tɛ yɔa kɔ‘m, ɓɛɛ Ɛnɛ gboo'm yinɛ tɛ ŋgaya ŋgimbi. Nɛ́ wen mɔ‘i sa'm kɔ̧a̧ mɛ de osoko h’Ɛ́nɛ́ in mɛ gasi'Nɛ́, ɓɛɛ mi tɛ zɔn nin Gasa Wan. Hee ge wi-yɔr kalata’ɛ kpaa ɗuka-taamɔ ge?

¹³Ŋgimbi n'am ɓɔna so nɛ ŋgaiwi, nɛti ha̧‘m mɛ yar nɛnɛ, mi kia ɗuka-tamɔ zaŋ kɔfasɔ̧ kɔ‘m, mi hu̧si na.

¹⁴Mi kɔfa Sɔ̧ sɛn nu Tua ko Gasa Wan wen kpaa a̧, ɓɛɛ mi tɛ kii kana a̧ hɔ nɛnɛ́ wese fio kɔ‘m.

¹⁵Ŋgimbi n'a̧-a̧ mira nɛnɛ́ hee dóte a de mɛ wai ga, mi kpaa desee wen aa. Mi nɛ̀ɛ̀ nɔ tɛ tana war, mi ndaka pata naŋ-a̧ dika tɛ ŋgaiwi kɔ‘m.

¹⁶Yeŋa zer-am n'am yéŋa tikiɗi, mi kpaa a̧, ɓɛɛ a̧ usi mɔ ha̧‘m nɛ dɔkaa.

¹⁷Mi gasa siti wen zu a. Mi tɛ zɔn wi nɛ ha̧ɗuka-taamɔ‘i ha̧‘m,

¹⁸wen mi ee see-am ha̧‘m mɛ ba a̧ de nɛ tom. Mi ha̧ŋgai tɛ‘m lɛŋ wen dee demɔ, ɓɛɛ mi beka nyim tɛ‘m na ndo-ndo-ndo.

¹⁹See-am gbɛŋa wen zu a, ɓɛɛ mi kasi Heembea nɛ nɔ̧aa. Mi nyɛia er-am si yiwese ai nɛ nu'm wen o yɔɔkaya n'am dea si tɛ a̧.

²⁰Mi zika see-am lɛŋ si tɛ a̧, mi ɗafa war tɛ‘m, ɓɛɛ mi kpa a̧. Mi kpaa iŋamɔ wen zu a dika tɛ ku̧u̧naŋmɔ mɛ. Kalea a'i, sa a̧ beka siŋ am pi nu na ndo-ndo-ndo.

²¹See-am duka tɛ a lɛ́k lɛ́k, hegɔ ɓɛɛ mi kpaa gba demɔ.

²²Gasa Wan ha̧iŋa-tɔ̧ɔ̧-wen ha̧‘m nɛ oi-aa, ɓɛɛ nɛ wen'i a'm tɛ gasi nɛ A̧.

²³Ɛnɛ tɛ́ pii tɛ‘m, ɛ́nɛ́ n’ɛnɛ iŋ mɔ na’ɛ, ɛnɛ tɛ̀ɛ̀ yambi ɗuka-taamɔ.

²⁴Wen ge s’ɛnɛ tɔ̧‘e wi kpa kɔ‘i a̧ na, ɓɛɛ nɛ wɔ-a gbɛ́ nɛ ɛ́nɛ́ lɛ́k lɛ́k’ɛ ge?

²⁵Mi tɔ̧ nɛ hee-gɛr h’ɛ́nɛ́‘e: ɛnɛ tɛ̀ɛ̀ bá sɔɔgee, bó nɛ́ nɛ sede na.

²⁶Ɛnɛ pi kpaŋa kɔ̧-a̧ ger-‘nɛ́ h’ɛnɛ mɛ kpa usamɔ kɔ̧-a̧; a̧ dúk ka tɛ‘nɛ́ dɔŋgɔɗɔɔ.

²⁷Ɛnɛ zɔk nɛ tɛ-‘nɛ́‘e mi zɔka bɔnɛ wen aa batɛ na; kinii mi kpaa ɔmatɛ.

²⁸Ɛnɛ pi̧ tɛ-‘nɛ́ tɛ usa ɗuka-taamɔ, kóó nɛ hi̧faa hifi nɛ dɔka sede mbɛt; a̧ tɛ de h’ɛ́nɛ́ mɛ kpa lɔr nɛ dɔkaa.

²⁹Nyɛrɛ a pi̧ ‘nɛ́ wen zu deako ko Gasa Wan, ɓɛɛ ká foe de'nɛ́ tɛ zɔna A̧ na.

³⁰Ɛnɛ kaɗi tom k’ɛ́nɛ́ nɛti ha̧ ŋgimbi-a, ɓɛɛ Gasa Wan tɛ ha̧ mɔɔ-oi-tom k’ɛ́nɛ́ h’ɛ́nɛ́ tɛ ŋgimbi n'A̧a kɔ̧a̧. Ɗuka-taamɔ ko Jezu bem ko Sirak, nɛ́ mɔ‘i!