Read Northwest Gbaya SIRAK 6 Bible Online

SIRAK 6 - Northwest Gbaya bible

SIRAK 6

¹Wen ɗaŋ hu̧ra-nin dak nɛ foe in zɛkɛɗɛ pii tɛ wi: mɔ nɛ zɛm wi-de-ɗaŋmɔ nɛ a̧-a̧ nɛ leɓe-wen yiitoo a̧‘i.

²Ká mɛ gasi zu-mɛ tɛ mɔ nɛ mɛ de wɔ-a na, wen ká ŋgai tɛ-mɛ tɛ̀ɛ̀ yai dɛsɛ́-ɗɛsɛ́, (hee ko kalaldi ndai ga.)

³Wen ká mɛ tɛ̀ɛ̀ kifi hee kora te, nɛ o wa̧a̧ in wayaa aia a nu ga.

⁴Ɗaŋ wɔ-mɔ gbɛ́ kana nɛ wan kɔ‘i, ɓɛɛ a̧ dee ha̧ o wisɛn kɔ̧-a̧ mɛ zɛkɛɗ‘a̧. Dee Sɛm

⁵Tɔ̧ɔ̧ nyɔɔ̧ wen nɛ mɔɔ dɔk sɛm. De leɓewen mbɛt de ha̧ bii mɛ kpɛk mɛ nɛ dea.

⁶O wi-fan mɛ a dɔk, ɓɛɛ wi tɔ̧ mbɔrɔ ha̧ mɛ a dúk nɛ kpɔk mgbara bii booro.

⁷Ka mɛ́ nɛ́ kɔ̧ɔ̧ mɛ ba sɛm, mɛ we a̧ sɛ́. Ká mɛ́ ha̧ tɛ-mɛ ha̧ a̧ bee bee na.

⁸Ŋma bii a̧-a̧ sɛnɛ nɛ de kɔ‘i sɛm nɛ ŋgimbi-a, ɓɛɛ mɛ beka de sɛm'i ŋgimbi bɔnɛ kɔ-mɛ na.

⁹Ŋma sɛm nyɛma mɛ kifi wisɛn tɛ tɔ̧ɔ̧ ndaa k’ɛ́nɛ́, wen pii foe tɛ-mɛ.

¹⁰Ŋma sɛm nyɔŋmɔ a̧-a̧ sɛnɛ nɛ beka dúk ka tɛ-mɛ, wese bɔnɛ kɔ-mɛ, na.

¹¹Tɛ ŋgimbi bɔtɛ kɔ-mɛ, a̧ duk hee kiitɛ-mɛ ga; a̧ tɛ usi ɗoŋ mɔ ha̧ o widetom kɔ-mɛ nyɛm sɛnɛ nɛ dea,

¹²Mɔ kpɔk, ka mɛ de geemɔ, a̧ tɛ tɛ̀ɛ̀ duk nɛ wisɛn kɔ-mɛ, a̧ tɛ hu̧si yi-a nɛ mɛ.

¹³Ɗoŋ-mɛ a nyɛi nɛ o wisɛn kɔ-mɛ, mɛ kásí zu-mɛ́ nɛ osɛm kɔ-mɛ

¹⁴De sɛm nɛ kpasa fara-hu̧si-tɛ, wi nɛ kpaa a̧ kpaa gasa mbɔi.

¹⁵De sɛm bó nɛ mɔɔ-gɛnɛ na, wi nyɛm mɛ gɔn gɛnɛ-a̧ na.

¹⁶De sɛm dúk nɛ nyina duká-kpasá. O wi nɛ yu kii Gasa Wan tɛ kpa a̧.

¹⁷Wi nɛ yu kii Gasa Wan hok sɛm kɔ‘i nɛ dea, wen nɛ hee mɔ n'a̧-a̧ dúk nɛnɛ́ ga a gbamayari kɔ̧-a̧ dúk nɛnɛ mbɛt. Yuwar kpaa ɗuka-taamɔ

¹⁸Bem kɔ‘m, mɛ kpɛk iŋamɔ dika nɛ mɛ́ ɓɔna nɛ daŋa-ŋgaiwi hɔ́ nɛnɛ́ ŋgimbi nɛ mbui tɛ hɔ nɛnɛ́ zu mɛ́, ɓɛɛ mɛ tɛ kpa ɗuka-taamɔ.

¹⁹Hee mɛ nɛ wiwafɔ in wi-pɛ-kpar-nyɔnɔ ga, mɛ ɗɔ́l pii ka tɛ duka-taamɔ ɓɛɛ mɛ pɛ́m nɛ o de waya-a; wen ŋgimbi waa fɔ-a, mɛ tɛ zɔk be bɔnɛ tikiɗi, ɓɛɛ dekpaa mɛ nyɔŋa waya-a.

²⁰Kpaa ɗuka-taamɔ ɔ ŋgaya wen o wi nɛ íŋ mɔ na, wi nɛ bó nɛ mbozu na beka ndaɗi in a̧ ɗoŋ-aa nyɛi na.

²¹Ɗuka-taamɔ dúk hee ŋma dita ta nɛ we nɛ ŋgai kɔ̧-a̧ ga; ɗoŋ-aa nyɛi ha̧ a̧ mɛ́ siŋ a̧ pi nu na,

²²wen nin ko ɗuka-taamɔ‘i nyɛma sɛnɛ, o wi zɔk a̧ dɔ́k na.

²³Mɛ zii, bem kɔ‘m, ɓɛɛ mɛ kpɛk wen kɔ‘m, ká mɛ siŋ mbɔrɔ kɔ‘m pi taŋ na.

²⁴Mɛ pi̧ naŋ-mɛ́ kɔ̧ bolo-kana ko ɗuka-taamɔ, ɓɛɛ mɛ pi̧ kpaŋa-a gɛr-mɛ́.

²⁵Mɛ wɛr koŋgoɓaa-mɛ́ si ɗɔɔ wen tuia a̧. Ká see-mɛ ɗáŋ wen n'a̧-a̧ yuɓura mɛ́ na.

²⁶Mɛ nɛ si tɛ a nɛ see-mɛ lɛŋ, ɓɛɛ mɛ ndak pata yuwar kɔ̧-a̧ nɛ ŋgai tɛ-mɛ lɛŋ.

²⁷Mɛ ɓá oi naŋ-a, mɛ kii a, ɓɛɛ a̧ tɛ usi tɛ-a̧ ha̧ mɛ́. Ɓɛɛ ŋgimbi nɛ mɛ tɛ kasi a̧ nɔ̧́ er-mɛ́, ká mɛ́ ɗai er-mɛ sɛnɛ na.

²⁸Wen tɛ sɔŋkur-aa, a̧ tɛ duk nɛ fara-ɔmtɛ kɔ-mɛ; a̧ tɛ kifi dúk nɛ mɔɔ-ha̧-desee ha̧ mɛ.

²⁹Hegɔ, o poka kɔ̧-a̧ tɛ duk nɛ ŋgaŋga ŋgee-biro kɔ-mɛ, ɓɛɛ kpaŋá kɔ̧-a̧ kifa nɛ laa-wan kɔ-mɛ.

³⁰Kpaŋá kɔ̧-a̧ nɛ mɔɔ-ɗafi-tɛ nɛ‘i dee nɛ lɔr, ɓɛɛ nyak-hɛr-wi kɔ̧-a̧ nɛ gbɛ̧ zoŋ zoŋ zoa̧-laa-gaɓi-gɛr.

³¹Mɛ tɛ pi a̧ tɛ-mɛ, hee laa-gbaŋá ga, ɓɛɛ mɛ hɛra a̧ zu-mɛ hee mɛtɛwol-nyɛŋɛ ga.

³²Bem kɔ‘m, ka mɛ nɛ kɔ̧a̧, mɛ tɛ iŋ mɔ, ɓɛɛ ka mɛ e see-mɛ sɛnɛ, mɛ tɛ kifi wi-iŋ-mgbara-mɔ.

³³Ka mɛ kɔ̧́ zia mɔ, mɛ tɛ yambi mɔ. Ka mɛ yéŋ zer-mɛ́, mɛ́ tɛ kifi wan-ɗuka-taamɔ.

³⁴Mɛ dúk mgbara o sokawi, mɛ hɛr tɛ-mɛ nɛ ɗuka-taamɔ kɔ-wa.

³⁵Mɛ zii wen nɛ tɛ́ nɛ tɛ́-Sɔ̧ lɛŋ nɛ dea. Ká mɛ e ha̧ ŋma de tua-wen kpɔk mɛ yak mɛ́ na.

³⁶Ka mɛ nɛ zɔka ŋma wi-iŋ-mɔ, nɛ mɛ war yi si tɛ a̧ mɛ tutuyɛ sút, dap naŋ-mɛ́ a yɔk nutua kɔ-a̧.

³⁷Mɛ ta mɔ zu o ha̧a̧nu ko Gasa Wan. Mɛ e see-mɛ tɛ o heembea kɔ̧-A̧ nɛ nɔ̧a̧-a̧. A̧ tɛ nɔ̧ see-mɛ, ɓɛɛ A̧ ha̧ɗuka-taamɔ nɛ mɛ́ kɔ̧a̧‘i ha̧ mɛ́.